ఆ వ్యూహం ఫలించింది.. కరోనాపై జపాన్ విజయం, లాక్‌డౌన్ ఎత్తివేత



ప్రపంచమంతా కరోనా వైరస్ వల్ల బిక్కుబిక్కుమని గడుపుతుంటే.. జపాన్ మాత్రం మహమ్మారిని తరిమికొట్టి స్వేచ్ఛా వాయువులను పీల్చుతోంది. అమెరికా సైతం ఎదురించలేని కరోనా వైరస్‌ను జపాన్ సమర్థవంతంగా ఎదుర్కొని తన సత్తా చాటింది. లాక్‌డౌన్ ఎత్తేసి.. సాధారణ జీవితాన్ని మొదలుపెట్టింది. మరి జపాన్‌కు ఇది ఎలా సాధ్యమైంది? కోవిడ్-19ను వదిలించుకోడానికి ఏం చేసింది?

నిత్యం విపత్తులతో సావాసం చేస్తూ.. ప్రతికూల పరిస్థితులతో పోరాడే జపాన్‌.. కరోనా విసిరిన ఛాలెంజ్‌ను ధైర్యంగా స్వీకరించింది. చైనా కంటే మెరుగ్గా స్పందించిన జపాన్.. జనవరి నెలలో మొదటి కేసు నమోదుకాగానే దేశాన్ని అప్రమత్తం చేసింది. అప్పటికే చైనా వైరస్‌ గురించి తెలుసుకున్న ప్రజలు.. ప్రభుత్వం చెప్పకుండానే మాస్కులు ధరించడం, పరిశుభ్రత నియమాలు పాటించడం మొదలుపెట్టారు. ఫలితంగా ఆ వైరస్ ఎక్కువ మందికి సోకకుండా కొంతమందితోనే ఆగిపోయింది.

ప్రజల్లో ఉన్న చైతన్యం, ప్రభుత్వం అప్రమత్తంగా వ్యవహరించడం వల్ల కరోనా కేసులను ఎదుర్కోవడం జపాన్‌కు పెద్దగా కష్టమనించలేదు. ఎందుకంటే.. అక్కడి ప్రజలు ప్రభుత్వం చేసిన హెచ్చరికలను తూ.చ. తప్పకుండా పాటించారు. నిత్యవసర వస్తువుల గురించి కంగారుపడలేదు. ప్రజలు వాటిని ఎప్పుడైనా సరే కొనుగోలు చేసుకోవచ్చని, ఎక్కువ సమయం ఇంట్లో ఉండటానికే ప్రాధాన్యం ఇవ్వాలని ప్రభుత్వం చెప్పడంతో ప్రజలు సహకరించారు. పైగా జపాన్ చిన్న దేశమే కావడంతో తమకు అందుబాటులో ఉన్న వనరులన్నీ కరోనాను నియంత్రించేందుకే ఉపయోగించింది.

జపాన్ ప్రజలు మొదటి నుంచి పరిశుభ్రత విషయంలో అప్రమత్తంగా ఉంటారు. వైరస్‌లు రాకుండా మాస్కులు ధరిస్తారు. ఇది కూడా జపాన్‌కు కలిసొచ్చింది. అలాగే, వైరస్ సోకిన వ్యక్తుల నుంచి పూర్తి సమాచారాన్ని తీసుకుని.. బాధితులు కలిసిన వ్యక్తులపై కూడా నిఘా పెట్టారు. వారిని క్వారంటైన్లో ఉంచడం వల్ల ఇతరులకు వ్యాధి సోకకుండా నిలిచిపోయింది.

నిత్యం సునామీలు, భూకంపాలను ఎదుర్కొనే జపాన్.. ప్రజలకు అత్యవసర చికిత్స అందించడం కోసం 2018లోనే భారీ స్థాయిలో వైద్య సిబ్బందిని ఏర్పాటుచేసుకుంది. దీనివల్ల బాధితులకు మెరుగైన వైద్యం అందించడం సాధ్యమైంది. జపాన్ ఏప్రిల్ 7న దేశమంతా అత్యవసర పరిస్థితిని ప్రకటించింది. అయితే, ప్రభుత్వ నియమయాలను పాటించని పౌరులకు ఎలాంటి శిక్ష, జరిమానాలు విధించలేదు. ప్రజలను వర్క్ ఫ్రం హోమ్ చేయాలని, స్కూళ్లు మూసివేయాలని ప్రభుత్వం ఆదేశించింది. జపాన్‌లోని 47 ప్రాంతాల్లో లాక్‌డౌన్ అమలు చేసింది.

Also Read:

ఆరు వారాల్లోనే వైరస్ నియంత్రణలోకి వచ్చింది. దీంతో టోక్యోతో సహా 42 ప్రాంతాల్లో ఎత్తివేస్తున్నట్లు ప్రకటించింది. ప్రభుత్వం అధికారికంగా లాక్‌డౌన్ విధించినా ప్రజలు పెద్దగా ఆందోళన చెందలేదు. లాక్‌డౌన్‌లో కూడా సాధారణ జీవితం గడిపారు. భౌతికదూరం వంటి నిబంధనలు పాటిస్తూనే స్వేచ్ఛగా జీవించారు. ప్రభుత్వం కూడా వారికి జరిమానాలు విధించలేదు. దీనిపై ఎన్నో విమర్శలు కూడా వచ్చాయి. అలా చేయడం చాలా ప్రమాదకరమని వైద్య నిపుణులు హెచ్చరించారు.

Also Read:
126 మిలియన్ జనాభాలో ఉన్న జపాన్‌లో ఇప్పటివరకు 840 మరణాలు చోటుచేసుకున్నాయి. 83 మిలియన్ జనాభా కలిగిన జర్మనీతో పోల్చితే జపాన్‌లో మరణాలు చాలా తక్కువ. ఆ దేశంలో 8 వేల మంది మరణించారు. జపాన్ లైఫ్‌స్టైల్ ఇతర దేశాల్లో అమలు చేయడం సాధ్యం కాదని నిపుణులు అంటున్నారు. ఆ దేశంలో నాణ్యమైన వైద్యం, జీవన ప్రమాణాలను పాటిస్తోందని అందుకే కరోనాను సమర్ధవంతంగా ఎదుర్కోగలిగిందని తెలుపుతున్నారు. జపాన్ తరహాలోనే ఇండియా కూడా త్వరలో కరోనాను తరిమి కొట్టాలని కోరుకుందాం.



Source link

Leave a Reply

Your email address will not be published. Required fields are marked *