ఉమర్ అక్మల్.. ధోనీ, కోహ్లీని చూసి నేర్చుకో: కమ్రాన్



మ్యాచ్ ఫిక్సింగ్‌ కోసం బుకీలు సంప్రదించిన విషయాన్ని దాచి మూడేళ్ల నిషేధానికి గురైన పాకిస్థాన్ సీనియర్ క్రికెటర్‌ ఉమర్ అక్మల్‌పై విమర్శలు కొనసాగుతున్నాయి. ఈ ఏడాది ఆరంభంలో పాకిస్థాన్ సూపర్ లీగ్‌లో ఫిక్సింగ్ కోసం బుకీలు ఉమర్‌ని సంప్రదించగా ఆ విషయాన్ని పాకిస్థాన్ క్రికెట్ బోర్డు (పీసీబీ) అవినీతి నిరోధక శాఖ అధికారులకి అతను తెలియజేయలేదు. దీంతో.. విచారణ జరిపిన పీసీబీ.. క్రికెట్‌లోని ఏ ఫార్మాట్‌లోనూ ఉమర్ అక్మల్ ఆడకుండా మూడేళ్లు నిషేధం విధించింది.

ఉమర్ అక్మల్ నిషేధంపై అతని సోదరుడు కమ్రాన్ అక్మల్ మాట్లాడుతూ ‘‘ఉమర్‌కి నేనిచ్చే సలహా ఏంటంటే..? అతను తన తప్పిదాల నుంచి గుణపాఠాలు నేర్చుకోవాలి. ఇప్పుడు వరల్డ్‌ నెం.1 బ్యాట్స్‌మెన్‌గా ఉన్న విరాట్ కోహ్లీ.. ఒకప్పుడు ఐపీఎల్‌లో తన వ్యవహారశైలితో విమర్శలు ఎదుర్కొన్నాడు. కానీ.. వాటి నుంచి అతను పాఠాలు నేర్చుకుంటూ ఎదిగాడు. అలానే మహేంద్రసింగ్ ధోనీ, సచిన్ టెండూల్కర్.. మైదానంలోనే కాదు.. వెలుపల కూడా హుందాగా ఎలా ఉండాలో చూపించారు. ముఖ్యంగా.. సచిన్ వివాదాలకి ఎప్పుడూ దూరంగా ఉండేవాడు. ఇలా వారి నుంచి ఉమర్ నేర్చుకోవాలి’’ అని సూచించాడు.

వాస్తవానికి కమ్రాన్ అక్మల్‌ కూడా కెరీర్‌లో చాలాసార్లు వివాదాలతో వార్తల్లో నిలిచాడు. 2010 ఆసియా కప్‌లో గౌతమ్ గంభీర్‌తో గొడవపడిన కమ్రాన్.. ఆ తర్వాత 2012-13లో బెంగళూరు వేదికగా జరిగిన టీ20 మ్యాచ్‌లో ఇషాంత్ శర్మతో వాగ్వాదానికి దిగాడు. అయితే.. 2017 నుంచి పాకిస్థాన్ టీమ్‌కి అతను దూరంగా ఉంటున్నాడు. తాజాగా అతని సోదరుడు ఉమర్ అక్మల్‌ కూడా మూడేళ్లపాటు టీమ్‌కి దూరమవగా.. మళ్లీ అతను పాక్ తరఫున ఆడటం అనుమానమే.



Source link

Leave a Reply

Your email address will not be published. Required fields are marked *