కరోనా ఎఫెక్ట్: సెకండ్ హ్యాండ్ కార్లకు పెరిగిన డిమాండ్.. కారణమిదే!



రోనా మహమ్మారి అనేక రంగాలపై తీవ్రమైన ప్రభావం చూపింది. లాక్‌డౌన్ చాలా మంది జీవితాలను తలకిందులు చేసింది. ఇలాంటి సంక్షోభ పరిస్థితుల్లోనూ ఓ అంశం నివ్వెరపరుస్తోంది. కరోనా వైరస్ ప్రభావంతో భారీగా పెరిగాయి. అందులోనూ సెకండ్ హ్యాండ్ కార్ల క్రయ, విక్రయాలు మరింత ఎక్కువగా ఉన్నాయి. దీనికి బలమైన కారణమే ఉంది.

కరోనా వైరస్ నేర్పిన మొట్టమొదటి పాఠం స్వీయ రక్షణ. వైరస్ బారి నుంచి తమను తాము కాపాడుకోవడానికి చాలా మంది ప్రాధాన్యం ఇస్తున్నారు. బస్సులు, రైళ్లు లాంటి పబ్లిక్ ట్రాన్స్‌పోర్టు ప్రారంభించినా.. సొంత వాహనాల్లో ప్రయాణించడానికే మొగ్గు చూపుతున్నారు. బస్సులు, ఆటోలు ఎక్కాలంటే జంకుతున్నారు. బస్సులు ఎప్పటిలాగే తిరుగుతున్నా.. ప్రయాణికులు చాలా పలచగా ఉంటున్న విషయం గమనించవచ్చు.

కుటుంబ సభ్యుల భద్రతకు ప్రాధాన్యం ఇస్తున్న వారంతా సొంత వాహనాలపైనే ఎక్కువగా ఆధారపడుతున్నారు. అందులోనూ కార్లపై మొగ్గు చూపుతున్నారు. దీంతో కార్ల విక్రయాలు గణనీయంగా పెరిగాయి. లాక్‌డౌన్ నష్టాన్ని పూడ్చుకోవడానికి కార్ల కంపెనీలు, షాపులు తొలుత భారీ డిస్కౌంట్లను ప్రకటించాయి. కానీ, ఇప్పుడు డిమాండ్ పెరగడంతో ధరలను అమాంతం పెంచేశాయి.

కరోనా వైరస్ కంటే ముందు వరకు ధనవంతులు మాత్రమే కార్లను ఎక్కువగా వినియోగించేవారు. కానీ, కరోనా ప్రభావంతో ప్రస్తుతం మధ్యతరగతి వాళ్లు కూడా కార్లను కొనడానికి ఆసక్తి కనబరుస్తున్నారు. కొత్త కార్లను కొనుగోలు చేసే స్తోమత లేనివారు సెకండ్ హ్యాండ్ కార్ల వైపు మొగ్గు చూపుతున్నారు. కారు డ్రైవింగ్ రాని వారు కూడా సెకండ్ హ్యాండ్ కార్లకే ప్రాధాన్యం ఇస్తున్నారు. దీంతో సెకండ్ హ్యాండ్ కార్ల ధరలు ఒక్కసారిగా 100 శాతం వరకు పెరగడం గమనార్హం.

సెకండ్ హ్యాండ్ కార్లు కొనేవారు రూ.70,000 నుంచి రూ.3 లక్షల వరకు లభించే వాహనాలకు ప్రాధాన్యం ఇస్తున్నారు. దీంతో వీటికి డిమాండ్ ఏర్పడింది. ఇప్పటివరకు లక్ష రూపాయలు లభించిన కార్లు.. ఇప్పుడు ఏకంగా 2 నుంచి 3 లక్షల వరకు పలుకుతున్నాయి.

పెట్రోల్ కార్లకే మొగ్గు..
ఇంధనం ధరలు రోజురోజుకు పెరుగుతున్నాయి. ప్రస్తుతం పెట్రోల్‌, డీజిల్‌ ధరల్లో పెద్దగా వ్యత్యాసం లేదు. దీంతో కస్టమర్లు పెట్రోల్‌ కార్లకే ప్రాధాన్యం ఇస్తున్నారు. గతంలో నెలకు 10 సెకండ్ హ్యాండ్ కార్లను విక్రయిస్తే.. ప్రస్తుతం 30 నుంచి 40 కార్లు అమ్ముతున్నట్లు పాత కార్ల షాపుల యజమానులు చెబుతున్నారు. అంటే వీటికి ఏ స్థాయిలో డిమాండ్ ఏర్పడింతో అర్థం చేసుకోవచ్చు. అంతేకాదు, ఇలాంటి కార్లకు ఫైనాన్స్‌ కంపెనీలు లోన్ సౌకర్యం కల్పిస్తుండటం మరో విశేషం. ఈ అంశం అమ్మకాలకు మరింత దోహదం చేస్తోంది.



Source link

Leave a Reply

Your email address will not be published. Required fields are marked *