కరోనా విషయంలో చైనాకు అనుకూలంగా డబ్ల్యూహెచ్ఓ.. ట్రంప్ ఘాటు విమర్శలు



అమెరికాలో కరోనా వైరస్‌ తీవ్రత రోజు రోజుకూ పెరుగుతుండటంతో అమెరికన్లు మరింత ఆందోళన చెందుతున్నారు. వైరస్‌ను నియంత్రించడానికి ట్రంప్ యంత్రాంగం అహర్నిశలు శ్రమిస్తున్నా ఫలితాలు మాత్రం ఆశించినంతగా రావడం లేదు. రాబోయే రోజుల్లో మరిన్ని విపత్కర పరిస్థితులు ఎదురుకాబోతున్నాయని విశ్లేషకులు హెచ్చరిస్తున్నారు. ఈ నేపథ్యంలో అధ్యక్షుడు డొనాల్డ్ ట్రంప్‌ ఒకింత అసహనానికి గురవుతున్నారు. దీనికి ఆయన చేస్తున్న ప్రకటనలు, చర్యలే నిదర్శనం. హైడ్రాక్సీ క్లోరోక్విన్ విషయంలో భారత్ సానుకూలంగా స్పందించకుంటే ప్రతీకార చర్యలు తీసుకునేవారమని ట్రంప్ నోరుజారడం విమర్శలకు దారితీసింది.

తాజాగా, ప్రపంచ ఆరోగ్య సంస్థ (డబ్ల్యూహెచ్‌ఓ)పై ట్రంప్ విమర్శలు గుప్పించారు. చైనాకు అనుకూలంగా వ్యవహరిస్తోందని ఆరోపించారు. వైరస్‌ వెలుగు చూసిన తొలినాళ్లలో దాని తీవ్రత గురించి డబ్ల్యూహెచ్ఓ వద్ద సమాచారం ఉన్నా పంచుకోవడానికి ఇష్టపడలేదని వ్యాఖ్యానించారు. కరోనా మహమ్మారి విషయంలో చాలా తప్పటడుగులు వేసిందని దుయ్యబట్టారు. చైనాలో విజృంభిస్తున్న సమయంలో అక్కడ పర్యటించిన విదేశీయులు తమ దేశంలోకి రాకుండా జనవరి 31న నిషేధం విధిస్తే డబ్ల్యూహెచ్‌ఓ వ్యతిరేకించిందని గుర్తుచేశారు. ఇది అతిపెద్ద తప్పుడు నిర్ణయమని ఆయన అభిప్రాయపడ్డారు.

డబ్ల్యూహెచ్ఓకే తామే అత్యధికంగా నిధులు సమకూరుస్తున్నామని వ్యాఖ్యానించిన ట్రంప్.. ఆ నిధుల్ని నిలిపివేస్తున్నట్టు సంచలన నిర్ణయం తీసుకున్నారు. అయితే, డబ్ల్యూహెచ్ఓ‌పై ట్రంప్ ఆరోపణలు చేయడం ఇదే తొలిసారి కాదు. మీడియా సమావేశం తర్వాత కూడా ట్విట్టర్‌లోనూ ప్రపంచ ఆరోగ్య సంస్థపై ట్రంప్ విమర్శలు గుప్పించారు.

డబ్ల్యూహెచ్ఓకు 58 నుంచి 122 మిలియన డాల్లర్ల మేర నిధులు కేటాయించాలని ఈ ఏడాది ఫిబ్రవరిలో ట్రంప్ నిర్ణయం తీసుకున్నారు. 2020-21 ఏడాదికి 114,766,922 డాలర్లు అమెరికా అందజేయనున్నట్టు డబ్ల్యూహెచ్‌ఓ ఇటీవల ఓ ప్రకటనలో తెలిపింది.

ఇదిలా ఉండగా.. కొవిడ్‌-19పై డబ్ల్యూహెచ్‌ఓ స్పందిస్తున్న తీరుపై సెనేట్‌ విదేశాంగ సంబంధాల కమిటీ ఛైర్మన్‌ జిమ్‌ రిష్‌ అనుమానాలు వ్యక్తం చేశారు. ఈ విషయంలో డబ్య్లూహెచ్‌ఓపై సతంత్ర దర్యాప్తునకు ఆయన ఆదేశించారు. ఒక్క అమెరికానే కాదు ప్రపంచదేశాల్ని డబ్ల్యూహెచ్ఓ తప్పుదారి పట్టించిందని రిష్‌ ఆరోపించారు. అమెరికా పౌరులు కట్టే పన్నుల ద్వారా సమకూరిన ఆదాయాన్ని వేలాది మంది ప్రాణాల్ని ప్రమాదంలో పడేసిన నిర్లక్ష్యపు సంస్థకు కట్టబెట్టలేమంటూ ఘాటు వ్యాఖ్యలు చేశారు.

అంతకు ముందు, డబ్ల్యూహెచ్‌ఓ చీఫ్‌ పదవికి టెడ్రోస్ అధ్నామ్ గ్యాబ్రియోసిస్ రాజీనామా చేసే వరకు నిధుల్ని నిలిపివేయాలని కోరుతూ అమెరికాలో ఉభయపక్షాలకు చెందిన 24 మంది సభ్యులతో కూడిన చట్టసభల ప్రతినిధుల బృందం తీర్మానించింది.



Source link

Leave a Reply

Your email address will not be published. Required fields are marked *