నువ్వు ఏమైనా చేసుకో.. స్మిత్ వికెట్ కావాలని కోహ్లీ కోరాడు: ఇషాంత్



భారత కెప్టెన్ విరాట్ కోహ్లీ, ఆస్ట్రేలియా మాజీ కెప్టెన్ స్టీవ్‌స్మిత్ మధ్య గత ఏడాది వరకూ ప్రచ్ఛన్న యుద్ధం నడిచింది. టెస్టుల్లో నెం.1 ర్యాంక్‌ కోసం పోటీపడుతున్న ఈ ఇద్దరూ.. మైదానంలోనూ 2019 వన్డే ప్రపంచకప్‌ వరకూ నువ్వా- నేనా అన్నట్లు పోటీపడ్డారు. ఇక కవ్వింపుల విషయంలోనూ ఇద్దరూ వెనక్కి తగ్గలేదు. కానీ.. బాల్ టాంపరింగ్‌తో 2018లో స్మిత్ ఏడాది నిషేధానికి గురైన తర్వాత.. అతనిపై కోపం తగ్గించుకున్న కోహ్లీ.. మద్దతుగా నిలుస్తున్నాడు.

2017లో భారత్, ఆస్ట్రేలియా మధ్య బెంగళూరు వేదికగా జరిగిన టెస్టు మ్యాచ్‌లో.. స్టీవ్‌స్మిత్‌‌ ఏకాగ్రతని దెబ్బతీసేందుకు ఫాస్ట్ బౌలర్ స్లెడ్జింగ్‌కి దిగాడు. బంతి విసిరిన ఇషాంత్.. స్మిత్ తరహాలో హావభావాల్ని ప్రదర్శించగా.. ఆ తర్వాత బంతిని డిఫెన్స్ చేసిన స్మిత్ కూడా అదేరీతిలో బదులిచ్చాడు. దాంతో.. స్లిప్‌లో ఫీల్డింగ్ చేస్తున్న విరాట్ కోహ్లీ పడిపడి నవ్వుతూ కనిపించాడు.

స్టీవ్‌స్మిత్‌పై ఇషాంత్ వరుస కవ్వింపులకి దిగుతుండటంతో.. ఆ మ్యాచ్‌లో కెప్టెన్‌గా అతని వద్దకి వెళ్లిన విరాట్ కోహ్లీ ఒక కోరిక మాత్రం కోరాడట. ఈ విషయాన్ని తాజాగా ఇషాంత్ శర్మనే వెల్లడించాడు. ‘‘నువ్వు ఏం కావాలన్నా చేసుకో.. కానీ.. నాకు వికెట్ కావాలని కోరాడు. అయితే.. నిషేధానికి గురయ్యేలా మాత్రం చేయొద్దు అని సూచిస్తూ.. శ్రీలంక గడ్డపై 2015లో నేను హద్దులు దాటిని విషయాన్ని పరోక్షంగా గుర్తుచేశాడు’’ అని ఇషాంత్ వెల్లడించాడు. ఆ మ్యాచ్‌లో శ్రీలంక ఓపెనర్ ఉపుల్ తరంగ వికెట్ పడగొట్టిన ఇషాంత్.. హద్దులు మీరి సంబరాలు చేసుకుని ఒక మ్యాచ్ నిషేధానికి గురయ్యాడు.



Source link

Leave a Reply

Your email address will not be published. Required fields are marked *