మంకీ‌గేట్ వివాదాన్ని కుంబ్లే బాగా హ్యాండిల్ చేశాడు: ఇర్ఫాన్ పఠాన్



ఆస్ట్రేలియా గడ్డపై 12 ఏళ్ల క్రితం చెలరేగిన మంకీగేట్ వివాదాన్ని అప్పటి టీమిండియా టెస్టు కెప్టెన్ అనిల్ కుంబ్లే చక్కగా హ్యాండిల్ చేశాడని మాజీ ఫాస్ట్ బౌలర్ ఇర్ఫాన్ పఠాన్ కొనియాడాడు. 2007-08లో నాలుగు టెస్టుల సిరీస్‌ని ఆడేందుకు భారత్ జట్టు అక్కడికి వెళ్లగా.. సిడ్నీ వేదికగా జరిగిన రెండో టెస్టులో ఆల్‌రౌండర్ ఆండ్రూ సైమండ్స్‌ని ఆఫ్ స్పిన్నర్ హర్భజన్ సింగ్ మంకీ అంటూ జాతివివక్ష వ్యాఖ్యలు చేసినట్లు ఆరోపణలు వచ్చాయి.

ఆ మ్యాచ్‌లో సచిన్ టెండూల్కర్‌, హర్భజన్ సింగ్ 8వ వికెట్‌కి 100 పరుగుల భాగస్వామ్యం నెలకొల్పగా.. ఆస్ట్రేలియా ఫాస్ట్ బౌలర్ బ్రెట్‌లీ ఉద్దేశపూర్వకంగానే భజ్జీపై స్లెడ్జింగ్‌కి దిగాడు. దాంతో.. వారిద్దరూ వాగ్వాదానికి దిగగా.. మధ్యలో ఎంటరైన సైమండ్స్ ఆ గొడవని మరింత పెంచాడు. ఆ సమయంలో సహనం కోల్పోయిన హర్భజన్ సింగ్ ‘మంకీ’తో తనని పోల్చినట్లు సైమండ్స్‌ ఫిర్యాదు చేశాడు. దాంతో.. క్రమశిక్షణ చర్యల కింద హర్భజన్‌ మ్యాచ్ ఫీజులో కోతతో పాటు నిషేధం కూడా విధించారు. అయితే.. ఆ నిషేధాన్ని ఎత్తివేయకపోతే టూర్‌ని రద్దు చేసుకుంటామని టీమిండియా బెదిరించగా.. ఆ సిరీస్‌లో అంపైర్లు కూడా ఆస్ట్రేలియాకి మద్దతుగా నిర్ణయాలు ప్రకటిస్తూ వచ్చారు. దాంతో.. కేవలం ఒక్క జట్టు మాత్రమే క్రీడాస్ఫూర్తితో ఆడిందని అనిల్ కుంబ్లే అప్పట్లో హుందాగా స్పందించాడు.

‘‘మంకీగేట్ వివాదం విషయంలో ఆస్ట్రేలియా మరీ చెత్తగా వ్యవహరించింది. భారత క్రికెటర్లపై నెగటివ్ కామెంట్స్‌తో వార్తలు గుప్పించింది. టీమిండియా కోపంతో ఆడుతోందని చెప్తూ.. మంకీగేట్ గురించే సిరీస్ సాంతం వార్తలు గుప్పించింది. ఎంతలా అంటే.. కనీసం ఒక కెమెరామెన్ హర్భజన్ సింగ్‌ని ఫాలో అవుతూ వచ్చేవాడు. కానీ.. అప్పటి కెప్టెన్ అనిల్ కుంబ్లే ఆ క్లిష్ట పరిస్థితిని చక్కగా హ్యాండిల్ చేశాడు. అయితే.. అప్పట్లో ఆసీస్ మీడియా అతి కారణంగా కనీసం హోటల్ వెలుపలికి కూడా మేము వెళ్లేందుకు ఇష్టపడలేదు’’ అని ఇర్ఫాన్ పఠాన్ వెల్లడించాడు.



Source link

Leave a Reply

Your email address will not be published. Required fields are marked *