మిడతలపై యుద్ధం: వందల ఫైరింజన్లు, యూకే నుంచి స్ప్రేయర్లు.. మింగుడుపడని నిజాలు!



కరోనా వైరస్ వ్యాప్తితో దేశం కుదేలవుతున్న వేళ మిడతల దండు రూపంలో భారత్‌కు పొరుగు దేశాల నుంచి మరో ముప్పు వచ్చి పడింది. మిలియన్ల సంఖ్యలో దాడి చేస్తున్న ఎడారి మిడతల దండుతో పశ్చిమ భారతం ఉక్కిరిబిక్కిరవుతోంది. వాలిన క్షణాల్లో వేలాది ఎకరాల్లో పంటలను హాంఫట్ చేస్తున్న మిడతల నివారణ ఇప్పుడు పెద్ద తలనొప్పిగా మారింది. పంటలు చేతికొచ్చే దశలో మిడతలు దాడి చేస్తుండటంతో రైతులు లబోదిబోమంటున్నారు. రాజస్థాన్‌, గుజరాత్‌, మధ్యప్రదేశ్‌, పంజాబ్, ఉత్తర ప్రదేశ్ రాష్ట్రాల్లో మిడతల సమస్య తీవ్రంగా ఉంది. పలు రాష్ట్రాల్లో పంటలను నాశనం చేస్తూ మిడతల దండు దేశ రాజధాని ఢిల్లీ వైపు వేగంగా కదులుతోంది. మరిన్ని రాష్ట్రాలకు ప్రమాదం పొంచి ఉంది. ఏపీలోని అనంతపురంలోనూ మిడతల దండు ప్రవేశించినట్లు కలకలం రేగింది. మహారాష్ట్ర వైపు నుంచి ఇటు తెలంగాణ దిశగా.. మిడతలు దూసుకొస్తున్నట్లు నివేదికలు అందుతున్న వేళ కేసీఆర్ సర్కార్ అప్రమత్తమైంది. ఈ నేపథ్యంలో కేంద్ర ప్రభుత్వం కీలక చర్యలు చేపట్టింది. మిడతల దండుపై చిన్న తరహా యుద్ధమే ప్రకటించింది.

మిడతల దండయాత్ర రైతులకు పెద్ద తలనొప్పిగా మారింది. తిండి, తిప్పలు లేకుండా పంట పొలాలను కంటికి రెప్పలా కాపాడుకుంటున్నారు. ప్లేట్లు, డ్రమ్ములు తీసుకొని శబ్ధాలు చేస్తున్నారు. మిడతలను తరమికొట్టడానికి కొంత మంది డీజేలను కూడా ఏర్పాటు చేయడం గమనార్హం. రైతుల విజ్ఞప్తి మేరకు పంట పొలాల్లో మిడతల నివారణకు డ్రోన్లను వినియోగించడానికి కేంద్రం ప్రభుత్వం అంగీకరించింది. ఈ మేరకు నిబంధనలు సడలించింది. అంతేకాకుండా మిడతలను మట్టుపెట్టడానికి అత్యాధునిక స్ర్పేయర్లు, డ్రోన్లను సిద్ధం చేస్తోంది. మిడతలను అంతం చేయడానికి యూకే నుంచి అదనంగా 60 ప్రత్యేక స్ప్రేయర్లను కొనుగోలు చేసేందుకు కేంద్ర ప్రభుత్వం ఉత్తర్వులు ఇచ్చింది. రాష్ట్ర ప్రభుత్వాలకు పలు సూచనలు చేసింది. మిడతల బెడద ఎక్కువగా ఉన్న రాజస్థాన్‌, గుజరాత్‌, మధ్యప్రదేశ్‌ రాష్ట్రాల్లో ప్రత్యేక బృందాలను ఏర్పాటు చేసింది.

ఎడారి మిడతల జీవితం కాలం 90 రోజులు. ఈ కాలంలో అవి రెండుసార్లు గుడ్లు పెడతాయి. ఆరు వారాల్లో అవి పెరిగి పెద్దవి అవుతాయి. అలా పెరిగి పెద్దవైన మిడతలు నెల రోజుల్లో మళ్లీ గుడ్లు పెడతాయి. మూడు నెలల్లో ఇవి 20 రెట్లు పెరుగుతాయని నిపుణులు చెబుతున్నారు. ఆరు నెలల్లో 400 రెట్లకు, 9 నెలల్లో 8 వేల రెట్లకు ఇవి పెరిగిపోతాయట. ఇవి రాత్రి వేళల్లో ప్రయాణం చేయవు. పగటి పూట అలసట అనేది లేకుండా వందలాది కిలోమీటర్లు దాటుకుంటూ వెళతాయి. ఎక్కువగా రాత్రి పూట పంటలపై వాలుతాయి. ఉత్తర భారతదేశంలోని పలు ప్రాంతాల్లో లక్షలాది మిడతలు భవనాలను కూడా చుట్టుముడుతున్నాయి. రహదారి వెంట మిలియన్ల సంఖ్యలో మిడతలు వస్తుంటే.. ఆ దృశ్యాలు తుఫాన్ తీరం దాటినంత బీభత్సంగా ఉంటున్నాయి.

ఎడారి మిడతలు వేగంగా ప్రయాణించగలవు. అధిక సమయం గాలిలో ఎగురుతూ ఉండగలవు. కిలోమీటర్ పరిధి గల విస్తీర్ణాన్ని 80 మిలియన్ల మిడతలు ఆక్రమించగలవు. మరో షాకింగ్ అంశం ఏమిటంటే ఒక్క రోజులో 35 వేల మందికి సరిపోయే ఆహారాన్ని తినేస్తాయి. ఒక్కో మిడత దాని శరీర బరువు కంటే అధికంగా పంటను తినేస్తుంది. మిడతల దండు పొలంలో పడిందంటే.. ఇక అక్కడ ఏదీ మిగలదు. కొన్ని గంటల్లోనే అక్కడ ఒక పంట ఉన్నదనే సంగతే తెలియకుండా సర్వనాశనం చేస్తాయి. మిడతల దండును ఈ దశలోనే నియంత్రించకపోతే వేల కోట్ల విలువైన పంటలు నాశనం అవుతాయని వ్యవసాయ నిపుణులు ఆందోళన వ్యక్తం చేస్తున్నారు.

మిడతలను మట్టుబెట్టడంలో రిమోట్‌ పైలెటెడ్‌ ఎయిర్‌క్రాఫ్ట్‌లను ఉపయోగించేవిధంగా కేంద్ర నిర్ణయం తీసుకుంది. పౌర విమానయాన శాఖ ఇందుకు సంబంధించి నిబంధనలను సడలించింది. మిడతలపై రసాయనాలను స్ప్రే చేసే బాధ్యతను రెండు కంపెనీలకు అప్పగించనుంది. ఇప్పటికే ఆ కంపెనీలు రసాయనాలను సిద్ధం చేసుకొని మిడతలపై యుద్ధానికి సిద్ధమయ్యాయి. మిడతల నియంత్రణకు 200 లోకస్ట్‌ సర్కిల్‌ ఆఫీస్‌లు సర్వే చేపడుతున్నాయని కేంద్రం తెలిపింది.

మిడతల ప్రభావం అధికంగా ఉన్న రాజస్థాన్‌, పంజాబ్‌, గుజరాత్‌, మధ్యప్రదేశ్‌ రాష్ట్రాల్లో ప్రత్యేక ఆపరేషన్‌లు చేపట్టారు. రాజస్థాన్‌‌లో 21 జిల్లాలు, మధ్యప్రదేశ్‌లోని 18 జిల్లాలు, గుజరాత్‌‌లోని రెండు జిల్లాలు, పంజాబ్‌లోని ఒక జిల్లాలో ఇప్పటికే మిడతల నియంత్రణ ఆపరేషన్లు ప్రారంభించారు. 89 ఫైర్‌ బ్రిగేడ్‌‌ యంత్రాల ద్వారా రసాయనాలు పిచికారీ చేస్తున్నట్లు అధికారులు తెలిపారు. 120 సర్వే వాహనాలు, 47 ప్రత్యేక స్ప్రే వాహనాలు, 810 ట్రాక్టర్లను మిడతల నియంత్రణ కోసం వినియోగిస్తున్నారు. ఉత్తర ప్రదేశ్‌లోని 17 జిల్లాలోని రైతులను రాష్ట్ర ప్రభుత్వం అప్రమత్తం చేసింది. యూపీలోని ఝాన్సీలో మిడతల ప్రభావం తీవ్రంగా ఉంది. ఇప్పటికే వందలాది ఎకరాల్లో పంట పొలాలు మిడతలకు ఆహారంగా మారాయి.

రాజస్థాన్‌లోని బర్మార్‌, జోథ్‌పూర్‌, జైపూర్, నాగౌర్‌, బికనేర్‌, గాంగార్‌, సిర్కార్‌; మధ్యప్రదేశ్‌లోని సత్నా, గ్వాలియర్‌, రాజ్‌ఘర్‌, బైతులా, దేవాస్‌, ఆగ్రా, మాల్వాల జిల్లాల్లో ఉన్న మిడతలు ఇతర ప్రాంతాల్లో ఉన్న మిడతలతో పోల్చితే చిన్నవిగా ఉన్నట్లు అధికారులు గుర్తించారు. అవి గుడ్లు పెట్టే దశకు రానట్లు గుర్తించారు. ఈ దశలోనే వాటిని అంతం చేయాలని కేంద్ర వ్యవసాయ మంత్రిత్వ శాఖ నిర్ణయించింది.

గురువారం (మే 28) నాటికి మిడతల దండు ఛత్తీస్‌గఢ్‌ రాష్ట్రంలో ప్రవేశించినట్లు అధికారులు తెలిపారు. మహారాష్ట్రలోని నాగ్‌పుర్‌ జిల్లాలో 17 కి.మీ. పొడవైన ఒక మిడతల దండు సంచరిస్తోందని అక్కడి అధికారులు తెలిపారు. పంజాబ్‌లోనూ మిడతల ఉద్ధృతి పెరుగుతోంది. వీటి నివారణ కోసం పంజాబ్ ప్రభుత్వం కోటి రూపాయల ప్రత్యేక నిధిని కేటాయించిందంటే పరిస్థితి తీవ్రతను అర్థం చేసుకోవచ్చు. రాజస్థాన్‌లో ఈ ఎడారి పురుగుల కారణంగా దెబ్బతిన్న పంటలకు గాను కేంద్రం రూ.68.65 కోట్ల ఆర్థిక సాయం ప్రకటించింది.

భారత్‌లోకి మిడతల దండు రావడం ఇదే తొలిసారి కాదు. కొన్నేళ్లుగా వీటి దండయాత్ర కొనసాగుతోంది. అయితే.. ఈసారి తీవ్రంగా ఉంది. మూడు దశాబ్దాలలో ఎన్నడూలేని పరిస్థితిని భారత్‌ ప్రస్తుతం ఎదుర్కొంటోంది. ప్రస్తుతం భారత్‌లో ప్రవేశించిన మిడతలు తూర్పు ఆఫ్రికా, సూడాన్‌ పుట్టి సౌదీ అరేబియా, ఇరాన్‌, పాకిస్థాన్‌ మీదుగా వచ్చినట్లు గుర్తించారు. ఇవి మొదట రాజస్థాన్‌లో ప్రవేశించాయి. ఆ తర్వాత క్రమంగా పలు రాష్ట్రాలకు విస్తరించాయి. రాజస్థాన్‌లో మొత్తం 33 జిల్లాలు ఉండగా, 16 జిల్లాల్లో మిడతల ప్రభావం ఉంది.

మిడతల దండు వల్ల ఆహార సంక్షోభం తలెత్తే ప్రమాదం ఉందని యునైటెడ్‌ నేషన్స్‌కు చెందిన ‘ఫుడ్‌ అండ్‌ అగ్రికల్చర్‌ ఆర్గనైజేషన్‌’ హెచ్చరించింది. ప్రపంచంలోని ఇతర వలస కీటకాలతో పోలిస్తే.. మిడతల దండు అత్యంత ప్రమాదకరమైనదని పేర్కొంది. గ్లోబల్‌ వార్మింగ్‌ (భూతాపం) కారణంగా మిడతల దండు, వాటి దాడులు మరింత పెరిగే అవకాశం ఉందని నిపుణులు హెచ్చరిస్తున్నారు. వర్షాలు సమృద్ధిగా పడకపోవడం వల్ల భూతాపం పెరిగి, మిడతలు మరింత విజృంభించే ప్రమాదం ఉందని ఆందోళన వ్యక్తం చేశారు.

(Also Read:

లాక్‌డౌన్ 5.0 తప్పదా? పొడిగిస్తే ఎలా ఉండబోతుంది?

Must Read:

వలస కూలీల కన్నీటి వెతలు.. సుప్రీంకోర్టు కీలక ఆదేశాలు

)





Source link

Leave a Reply

Your email address will not be published. Required fields are marked *