రూ. 600 కారణంగా క్రికెట్‌ని వదిలేసిన ఇర్ఫాన్ ఖాన్



బాలీవుడ్ విలక్షణ నటుడు ఈరోజు ముంబయిలో కన్నుమూశారు. గత రెండేళ్లుగా క్యాన్సర్‌తో పోరాడుతున్న ఇర్ఫాన్.. కోకిలా బెన్ హాస్పిటల్‌లో చికిత్స పొందుతూ తుది శ్వాస విడిచారు. వాస్తవానికి ఇర్ఫాన్ ఖాన్ తొలుత క్రికెటర్ అవ్వాలనుకున్నాడట. కానీ.. అప్పట్లో సీకే నాయుడు ట్రోఫీ ఆడేందుకు రూ. 600 తక్కువగా ఉండటంతో క్రికెట్ కెరీర్‌ని వదులుకుని యాక్టింగ్‌ వైపు వెళ్లినట్లు గతంలో ఓ ఛానల్‌కిచ్చిన ఇంటర్వ్యూలో ఇర్ఫాన్ వెల్లడించాడు. అప్పట్లో ఫస్ట్ క్లాస్ మ్యాచ్‌‌లకి సీకే నాయుడు ట్రోఫీ ఎంట్రీ పాయింట్‌గా ఉండేది.

‘‘నేను క్రికెటర్ కావాలనుకున్నాను. అప్పట్లో జైపూర్ టీమ్‌లో నేనే చిన్నవాడ్ని.. ఆల్‌‌రౌండర్ కావడంతో క్రికెట్‌లోనే కెరీర్‌ని వెతుక్కోవాలని ఆశించా. ఆ మేరకు సీకే నాయుడు టోర్నమెంట్‌ కోసం జట్టులోకి కూడా ఎంపికయ్యా. కానీ.. అందులో ఆడేందుకు రూ. 600 తక్కువయ్యాయి. అప్పట్లో ఆ డబ్బుని ఎవరిని అడగాలో కూడా నాకు తెలియకపోయింది. దాంతో.. క్రికెట్‌ని వదులుకున్నాను’’ అని ఇర్ఫాన్ ఖాన్ ఆ ఇంటర్వ్యూలో వెల్లడించాడు.

క్రికెట్‌ కెరీర్‌ని వదులుకుని యాక్టింగ్‌ వైపు వెళ్లిన ఇర్ఫాన్‌ ఖాన్‌కి అక్కడ కూడా ఆర్థిక ఇబ్బందులు ఎదురయ్యాయి. నేషనల్ స్కూల్ ఆఫ్ డ్రామా‌లో జాయిన్ అయ్యేందుకు రూ. 300 తక్కువయ్యాయట. అయితే.. అతని సోదరి ఆ డబ్బుల్ని సర్దుబాటు చేయడంతో అందులో చోటు లభించడం.. అతను యాక్టింగ్‌ని నేర్చుకుని బాలీవుడ్‌లో స్థిరపడటం జరిగిపోయాయి. ఆస్కార్ అవార్డు గెలిచిన స్లమ్‌డాగ్ మిలినీయర్ సినిమాలో ఇర్ఫాన్ ఖాన్ కీలక పాత్ర పోషించిన విషయం తెలిసిందే.



Source link

Leave a Reply

Your email address will not be published. Required fields are marked *