రెండో వన్డేలోనూ ఐర్లాండ్ చిత్తు.. ఇంగ్లాండ్‌దే సిరీస్



టూర్‌లో ఐర్లాండ్ వరుసగా రెండో వన్డేలోనూ ఓడిపోయింది. సౌథాంప్టన్ వేదికగా శనివారం అర్ధరాత్రి ముగిసిన మ్యాచ్‌లో బౌలింగ్, బ్యాటింగ్‌లో సత్తాచాటిన ఇంగ్లాండ్ టీమ్ 4 వికెట్ల తేడాతో గెలుపొంది.. ఒక వన్డే మిగిలి ఉండగానే సిరీస్‌ని 2-0తో చేజిక్కించుకుంది. ఇక సిరీస్‌లో నామమాత్రమైన ఆఖరి వన్డే మంగళవారం సాయంత్రం 6.30 గంటలకి ప్రారంభంకానుంది. ఇటీవల వెస్టిండీస్‌ని మూడు టెస్టుల సిరీస్‌లో ఇంగ్లాండ్ 2-1 తేడాతో ఓడించిన విషయం తెలిసిందే.

మ్యాచ్‌లో టాస్ గెలిచి తొలుత బ్యాటింగ్ చేసిన ఐర్లాండ్.. ఆఖరి వరకూ బ్యాటింగ్ చేసినా 9 వికెట్ల నష్టానికి కేవలం 212 పరుగులే చేయగలిగింది. ఆ జట్టులో క్యాంఫెర్ (68: 87 బంతుల్లో 8×4) హాఫ్ సెంచరీతో సత్తాచాటగా.. సిమీ సింగ్ (25), ఆండీ బెక్‌బ్రైన్ (24), హారీ టెక్టర్ (28) కాసేపు క్రీజులో నిలిచారు. ఇంగ్లాండ్ బౌలర్లలో ఆదిల్ రషీద్ (3/34), డేవిడ్ విల్లీ (2/48) నిలకడగా రాణించారు.

అనంతరం లక్ష్య ఛేదనలో ఇంగ్లాండ్ ఓపెనర్ జేసన్ రాయ్ (0) నిరాశపరచగా.. తర్వాత వచ్చిన జేమ్స్ విన్స్ (16). టామ్ బాంటన్ (15) తేలిపోయారు. అయితే.. మరో ఓపెనర్ జానీ బెయిర్‌స్టో (82: 41 బంతుల్లో 14×4, 2×6) దూకుడగా ఆడేశాడు. అతనికి శామ్ బిల్లింగ్స్ (46 నాటౌట్: 61 బంతుల్లో 6×4) సపోర్ట్ లభించడంతో ఇంగ్లాండ్ అలవోకగా విజయాన్ని అందుకునేలా కనిపించింది. కానీ.. జట్టు స్కోరు 131 వద్ద బెయిర్ స్టో ఔటవగా.. అనంతరం వచ్చిన కెప్టెన్ ఇయాన్ మోర్గాన్ (0), మొయిన్ అలీ (0) వరుసగా డకౌటయ్యారు. దాంతో.. ఐర్లాండ్ శిబిరంలో గెలుపు ఆశలు చిగురించాయి. అయితే.. డేవిడ్ విల్లీ (47 నాటౌట్: 46 బంతుల్లో 5×4, 2×6) ఐర్లాండ్‌కి ఆ అవకాశం ఇవ్వలేదు. క్రీజులో కుదురుకున్న తర్వాత విల్లీ భారీ షాట్లు ఆడేశాడు. దాంతో.. 32.3 ఓవర్లలోనే ఇంగ్లాండ్ 216/6తో విజయాన్ని అందుకుంది. గెలిపించే ఇన్నింగ్స్ ఆడిన బెయిర్‌స్టోకి మ్యాన్ ఆఫ్ ద మ్యాచ్ అవార్డు లభించింది.



Source link

Leave a Reply

Your email address will not be published. Required fields are marked *