విమానాల్లో ఇక ఆహారం.. మాస్క్‌ లేకపోతే జీవితంలో ఫ్లైట్ ఎక్కడం మర్చిపోవాల్సిందే!



కరోనా వైరస్ మహమ్మారి కారణంగా కఠిన నిబంధనలతో విమానాల రాకపోకలకు తిరిగి అనుమతించిన కేంద్ర ప్రభుత్వం.. తాజాగా వాటిలో భోజన సౌకర్యం కల్పించడానికి సైతం అంగీకరించింది. అలాగే ముఖానికి మాస్క్‌ ధరించడానికి నిరాకరించే వారి విషయంలో కేంద్రం కఠిన నిర్ణయం తీసుకుంది. మాస్క్ ధరించని వారిని విమానయాన సంస్థలు నో ఫ్లై జాబితాలో చేర్చవచ్చని గురువారం అధికారిక ఉత్తర్వుల్లో వెల్లడించింది. అంటే మాస్కులు ధరించని వారు ఇకపై విమానాల్లో ప్రయాణించడానికి అనుమతి ఉండదని కేంద్రం తేల్చి చెప్పింది.

మే 25వ తేదీన విమాన సేవలు పునఃప్రారంభమైన తరుణంలో దేశీయ విమానాల్లో భోజన సదుపాయాలకు అనుమతివ్వలేదు. అంతర్జాతీయ విమానాల్లో మాత్రం ముందుగానే ప్యాక్‌ చేసిన కోల్డ్‌ మీల్‌, స్నాక్స్‌ ఇవ్వడానికి ఆమోదం తెలిపింది. అయితే తాజాగా జారీ చేసిన ఉత్తర్వుల్లో మాత్రం ఈ నిబంధనలకు సడలింపులు ఇచ్చింది.

కేంద్ర విమానయాన మంత్రిత్వ శాఖ కొత్త రూల్స్ ఇవే..

  • ప్రయాణ సమయం ఆధారంగా దేశీయ విమానాల్లో ముందుగా ప్యాక్‌ చేసిన స్నాక్స్, పానీయాలు, భోజనం అందించొచ్చు.
  • నిబంధనల ప్రకారం అంతర్జాతీయ విమానాల్లో వేడి భోజనం, పరిమితంగా పానీయాలు ఏర్పాటు చేయొచ్చు.
  • విమాన ప్రయాణ సమయంలో వాడే ట్రేలు, ప్లేట్లు, స్పూన్లు వంటి వాటిని ఒక్కసారి మాత్రమే వినియోగించాలి.
  • ముఖానికి మాస్క్‌ ధరించడానికి నిరాకరించిన వ్యక్తులను సంస్థలు నో ఫ్లై జాబితాలో చేర్చడానికి అనుమతి.
  • అంతర్గతంగా చర్చించుకున్న తర్వాత విమానంలో అనుచితంగా ప్రవర్తించిన వ్యక్తిని ‘నో ఫ్లై జాబితా’లో చేర్చవచ్చు. ఇతర సంస్థలు సదరు ప్రయాణికుడి విషయంలో అదే నిర్ణయం తీసుకోవచ్చు.

కరోనా కారణంగా విధించిన ఆంక్షలను రెండు నెలల తర్వాత సడలించడంతో మే 25 నుంచి దేశీయ విమానాలు తిరిగి రాకపోకలు సాగిస్తున్నాయి. కొవిడ్ ముందుతో పోల్చుకుంటే కేవలం 45 శాతం విమానాలు మాత్రమే కార్యకలాపాలు సాగిస్తున్నాయి.



Source link

Leave a Reply

Your email address will not be published. Required fields are marked *