AG Sriram Press Meet: నిమ్మగడ్డ రమేష్ కేసులో ట్విస్ట్, ఆయనకు ఆ అధికారం లేదు.. తొలిసారి ఏజీ ప్రెస్‌మీట్! – ap advocate general subrahmanyam sriram over sec nimmagadda ramesh kumar issue


రాష్ట్ర ఎన్నికల కమిషనర్‌ (ఎస్ఈసీ)గా నిమ్మగడ్డ రమేష్ కుమార్ తిరిగి బాధ్యతలు చేపట్టడంపై ఏపీ అడ్వకేట్ జనరల్ సుబ్రహ్మణ్యం శ్రీరామ్ సంచలన వ్యాఖ్యలు చేశారు. చరిత్రలో తొలిసారిగా అడ్వొకేట్ జనరల్ హోదాలో శనివారం రాత్రి ఆయన ప్రెస్‌మీట్ పెట్టారు. శుక్రవారం మధ్యాహ్నం 3.30 గంటలకు హైకోర్టు జడ్జిమెంట్ కాపీ వచ్చిందని, దీంతో నిమ్మగడ్డ రమేష్ కుమార్ రాష్ట్ర, జిల్లా అధికారులకు ఒక సర్కులర్ జారీ చేశారని తెలిపారు. రాష్ట్ర ఎన్నికల కమిషనర్‌గా అధికారిగా తిరిగి బాధ్యతలు చేపట్టినట్లుగా నిమ్మగడ్డ రమేష్ కుమార్ తనకు తానుగా ప్రకటించుకున్నారని వ్యాఖ్యానించారు. విజయవాడ కార్యాలయం నుంచి సర్క్యూలర్ విడుదల చేసి.. హైదరాబాద్‌లోని తన ఇంటికి వాహనాలు పంపించాలన్నారని కోరారని వెల్లడించారు.

ఎస్ఈసీగా కొనసాగమని నిమ్మగడ్డ రమేష్ కుమార్‌కు హైకోర్టు నేరుగా ఎక్కడా చెప్పలేదని ఏజీ శ్రీరామ్ వెల్లడించారు. అయితే నిమ్మగడ్డ రమేష్ మాత్రం తనంతట తానే బాధ్యతలు స్వీకరించినట్లుగా సర్క్యూలర్ విడుదల చేశారని తప్పుపట్టారు. ఈ కేసుపై సుప్రీం కోర్టుకు వెళ్లేందుకు అనుమతి ఇవ్వాలని ఇప్పటికే హైకోర్టులో ఒక పిటిషన్ వేసినట్లు గుర్తు చేశారు. అప్పటి వరకు హైకోర్టు తీర్పుపై స్టే ఇవ్వాలని కూడా కోరామన్నారు. రాష్ట్ర ఎన్నికల అధికారిని నియమించే అధికారం రాష్ట్రానికి లేదంటే.. నిమ్మగడ్డ రమేష్ కుమార్ కు కూడా ఈ నిబంధనే వర్తిస్తుందన్నారు.

నిమ్మగడ్డ రమేష్ కుమార్‌ను కూడా అప్పటి సీఎం చంద్రబాబు సలహా మేరకే నియమించారని ఏజీ శ్రీరామ్ తెలిపారు. గవర్నర్ నిర్ణయంలో మంత్రి మండలి సలహా అవసరం లేదంటే.. అప్పటి సీఎం చంద్రబాబు ఇచ్చిన సలహా కూడా చెల్లదని స్పష్టం చేశారు. దీన్ని బట్టి నిమ్మగడ్డ రమేష్ కుమార్ నియామకం కూడా చెల్లదని స్పష్టం చేశారు. హైకోర్టు తీర్పులో కాలవ్యవధి స్పష్టంగా చెప్పకుంటే.. రెండు నెలల కాలవ్యవధి ఉంటుందన్నారు. హైకోర్టు తీర్పు ప్రకారం నిమ్మగడ్డ రమేష్ స్వీయ నియామకం చేసుకునే అధికారం లేదని స్పష్టం చేశారు.

ఎస్ఈసీ స్టాండింగ్ కౌన్సిల్‌గా ఉన్న ప్రభాకర్‌ను ఆదివారం లోపు రాజీనామా చేయమని నిమ్మగడ్డ రమేష్ కుమార్ ఆదేశించారని ఏజీ శ్రీరామ్ తెలిపారు. ఈ విషయాన్ని ప్రభాకర్ తనకు ఫోన్ చేసి చెప్పారని పేర్కొన్నారు. తనకు కొంత సమయం కావాలని ప్రభాకర్ నిమ్మగడ్డను కోరగా.. ఆయన మాత్రం ససేమిరా అన్నారని వివరించారు. ఈ వ్యవహారంపై స్టే ఇవ్వాలని ఇప్పటికే ప్రభుత్వం హైకోర్టును కోరిందన్నారు. ఎస్ఈసీ అంశంపై సుప్రీంకోర్టుకు వెళ్తున్నట్లు ప్రకటించారు.

హైకోర్టు తీర్పు ప్రకారం నిమ్మగడ్డ రమేష్ కుమార్ నియామకం కూడా చట్ట విరుద్ధమని ఏజీ శ్రీరామ్ వెల్లడించారు. సాధారణంగా ప్రభుత్వ న్యాయ నిపుణులు ఎప్పుడూ మీడియా ముందుకు రారని, కానీ ఇది రాజ్యాంగ అంశాలు హైకోర్టు తీర్పుతో కూడినందున మీడియా ముందుకు రావాల్సి వచ్చిందని వివరణ ఇచ్చారు.



Source link

Leave a Reply

Your email address will not be published. Required fields are marked *