AIIMS Delhi: డాక్టర్లు, నర్సులకు కొవిడ్.. దేశాన్ని కలవరపెట్టే అంశం – doctors, nurses test positive for covid-19: cases rising in aiims delhi, nims hyderabad


రోనా మహమ్మారితో ముందుండి పోరాడుతున్న వైద్య సిబ్బంది ఆ వైరస్ బారిన పడుతుండటం ఆందోళన కలిగిస్తోంది. ఢిల్లీలోని ప్రఖ్యాత ఎయిమ్స్ ఆస్పత్రిలో ఏకంగా 480 మంది వైద్య సిబ్బందికి కరోనా వైరస్ సోకింది. ఈ వైరస్ బారిన పడి ఎయిమ్స్‌లో ఇప్పటికే ముగ్గురు మరణించారు. వీరిలో ఒకరు ఎయిమ్స్‌ శానిటేషన్ విభాగంలో ఉన్నతాధికారి కాగా.. మరొకరు ఆస్పత్రి మెస్‌లో పనిచేసే ఉద్యోగి.

ఎయిమ్స్‌లో ఈ ఉదంతం డేంజర్ బెల్స్ మోగిస్తోంది. పలువురు సిబ్బంది పనిచేయడానికి భయపడుతున్నారు. నర్సులు ఆందోళన వ్యక్తం చేస్తున్నారు. కరోనా బారిన పడిన సిబ్బందిలో 38 మంది నర్సులు కూడా ఉండటం వీరి ఆందోళనకు కారణం. తమకు అందిస్తున్న పీపీఈ కిట్లు నాణ్యతా ప్రమాణాలకు అనుగుణంగా లేవని ఆరోపిస్తున్నారు.

ఇటు హైదరాబాద్‌లోని నిమ్స్‌లోనూ కరోనా అలజడి రేపుతోంది. నిమ్స్‌లో నలుగురు వైద్యులు ముగ్గురు సిబ్బందికి కరోనా పాజిటివ్‌గా నిర్ధారణ అయింది. దీంతో వివిధ విభాగాల్లో రోగులను ఇతర ఆస్పత్రులకు పంపిస్తున్నారు. పలువురు సిబ్బందిని క్వారంటైన్‌కు తరలించారు. అటు ఉస్మానియా ఆస్పత్రిలో 10 మంది మెడికోలకు కరోనా వైరస్ సోకింది. మొత్తం 280 మంది వైద్య విద్యార్థులను క్వారంటైన్‌కు తరలించి పరీక్షలు నిర్వహిస్తున్నారు.

వైద్యులకు కరోనా సోకుతుండటం పట్ల ఆందోళన వ్యక్తమవుతోంది. పీపీఈ కిట్లు అందిస్తున్నా, అన్ని రకాల జాగ్రత్తలు తీసుకుంటున్నా వీరు వైరస్ బారిన ఎలా పడుతున్నారనేది చర్చనీయాంశంగా మారింది. ఇలాంటి ఘటనలో పెరిగితే.. వైద్యుల్లో అభద్రతా భావం పెరిగే ప్రమాదం ఉంది. అదే జరిగితే.. కరోనా రోగులకు చికిత్స అందించడం ఇబ్బందికరంగా మారుతుంది. కేసులు అంతకంతకూ పెరుగుతున్న వేళ ఇది ఆందోళనకు గురిచేసే అంశమే.

పీపీఈ కిట్లు ఇచ్చినా వైద్యులకు ఎలా సోకుతోంది: హైకోర్టు
పీపీఈ కిట్లు ఇచ్చినప్పటికీ వైద్యులకు కరోనా ఎలా సోకిందని తెలంగాణ ప్రభుత్వా్న్ని హైకోర్టు ప్రశ్నించింది. రాష్ట్రంలో కరోనా వ్యాప్తి, పరీక్షల నిర్వహణ అంశంపై రిటైర్డ్ డీఎంహెచ్‌ఓ రాజేందర్, రిటైర్డ్ ప్రొఫెసర్ పీఎల్ విశ్వేశ్వరరావు తదితరులు దాఖలు చేసిన 7 ప్రజా ప్రయోజన వ్యాజ్యాలపై హైకోర్టు గురువారం (జూన్ 4) విచారణ చేపట్టింది.

డిల్లీ ఎయిమ్స్‌‌లో వైరస్ బారిన పడిన 480 మంది సిబ్బందిలో 19 మంది డాక్టర్లు, 38 మంది నర్సులు, 74 మంది సెక్యూరిటీ గార్డులు, 75 మంది ఆస్పత్రి అటెండర్లు, 54 మంది శానిటేషన్‌ సిబ్బంది, 14 మంది ల్యాబ్ టెక్నీషియన్లు ఉన్నారు. మిగిలిన వారు ఇతర విభాగాల్లో పనిచేసే ఉద్యోగులని ఎయిమ్స్‌ వర్గాలు తెలిపాయి.

కరోనా నియంత్రణలో భాగంగా మార్చి నుంచి ఎయిమ్స్‌.. ఔట్ పేషంట్ రోగులకు అందించే వైద్య సేవలను నిలిపేసి పూర్తి స్థాయిలో కొవిడ్ సేవలు అందిస్తోంది. ఆస్పత్రిలోని ట్రామా కేంద్రాన్ని పూర్తి స్థాయి కరోనా వార్డుగా మార్చి రోగులకు సేవలు అందిస్తున్నారు.

దేశంలో కరోనా కేసులు అధికంగా నమోదవుతున్న రాష్ట్రాల్లో ఢిల్లీ మూడో స్థానంలో ఉంది. గురువారం నాటికి ఢిల్లీలో 23,645 కరోనా కేసులు నమోదయ్యాయి. 606 మంది మృతి చెందారు. 9542 మంది వైరస్‌ నుంచి కోలుకొని డిశ్చార్జ్ కాగా.. 13,497 మంది చికిత్స పొందుతున్నట్లు ఢిల్లీ ప్రభుత్వం తెలిపింది.

Must Read:తాళి తాకట్టు పెట్టి కొవిడ్-19 యోధుడి అంత్యక్రియలు

Also Read:రష్యాలో రక్తాన్ని పీల్చే పురుగులు.. కొత్త ముప్పు



Source link

Leave a Reply

Your email address will not be published. Required fields are marked *