another elephant death: కేరళలో అదే తీరులో మరో ఏనుగు మృతి – another elephant suspected to have been killed in similar fashion in kerala


కేరళలో గర్భంతో ఉన్న ఓ ఏనుగు పేలుడు పదార్థం తినిపించడం వల్ల మృతి చెందిన ఘటనపై దేశవ్యాప్తంగా ఆగ్రహం వ్యక్తం అవుతుండగా మరో ఏనుగు మృతి కలకలం రేపుతోంది. ఏప్రిల్‌లో కేరళలోని కొల్లామ్ జిల్లా పతానపురం అటవీ ప్రాంతంలో ఓ ఏనుగు ఇదే రీతిలో మరణించినట్లు అనుమానిస్తున్నారు. అది కూడా ఏదో పేలుడు పదార్థం తినడం వల్లే మరణించి ఉండొచ్చని అటవీ శాఖ అధికారులు భావిస్తున్నారు.

పతానపురం అటవీ ప్రాంతంలో ఏప్రిల్‌లో బలహీనంగా ఉన్న ఓ ఆడ ఏనుగును చూశామని అధికారులు తెలిపారు. దానికి వైద్యం చేయాలని ప్రయత్నించినా అది సహకరించకుండా అక్కడ నుంచి వెళ్లిపోయిందని.. మరుసటి రోజు అక్కడికి కొద్ది దూరంలో ఓ చోట పడి ఉండటం గమనించి చికిత్స అందించామని వెల్లడించారు. అయినప్పటికీ దాని ప్రాణాలు కాపాడలేకపోయామని ఆవేదన వ్యక్తం చేశారు.

పోస్టుమార్టం నివేదికలో ఏనుగు దవడ విరిగినట్లు తేలిందని అధికారులు తెలిపారు. ఆ ఏనుగు కూడా ఏదో పేలుడు పదార్థం తినడం వల్లే మరణించి ఉండొచ్చని అనుమానిస్తున్నారు. ఆ ఏనుగు మృతిపై దర్యాప్తు ప్రారంభించినట్లు పోలీసు అధికారులు తెలిపారు. మళప్పురం ఏనుగు మృతి ఘటన చర్చనీయాంశంగా మారిన నేపథ్యంలో ఈ ఘటన వెలుగులోకి వచ్చింది.

సైటెంట్ వ్యాలీ సమీపంలో నదీపాయల్లో ఆహారం వెతుక్కుంటూ వచ్చిన ఓ ఆడ ఏనుగుతో కొంత మంది అత్యంత క్రూరంగా ప్రవర్తించారు. ఆకలితో ఉన్న ఆ ఏనుగుకు ఓ పైనాపిల్‌‌ను ఆశజూపారు. ఆ పైనాపిల్‌లో పేలుడు పదార్థాలు పెట్టారు. ఆ ఏనుగు వారిచ్చిన పండును నోట్లో పెట్టుకోగానే.. ఒక్కసారిగా పేలిపోయింది. దీంతో ఏనుగు నోట్లో తీవ్ర గాయమైంది.

నోటి వెంట రక్తం ధారగా కారుతుండగా.. అంత బాధలోనూ ఆ ఏనుగు తనను మోసం చేసిన మనుషులపై దాడి చేయకుండా అక్కడ నుంచి వెళ్లిపోయింది. కానీ, ఏనుగు నోట్లో గాయం పుండులా మారింది. ఆ గాయంపై ఈగలు వాలడం మొదలుపెట్టాయి. దీంతో ఆ నొప్పికి విలవిల్లాడుతూ ఏం చేయాలో తెలియక ఆ మూగజీవం వెల్లియార్‌ నదిలోకి దిగి తొండం నీటిలో పెట్టి నిల్చుంది. దీంతో ఏనుగుకు గాయం నుంచి కాస్త ఉపశమనం లభించింది. ఈగల బాధ తప్పడంతో అక్కడే రోజుల తరబడి అలాగే ఉండిపోయింది. ఓ పక్క ఆకలి.. మరోపక్క నరాలను మెలిపెట్టే బాధ. ఆహారం తీసుకోలేని పరిస్థితి. పైగా కడుపులో పెరుగుతున్న బిడ్డ. వెరసి ఆ ఏనుగు చిక్కి శల్యమై ఆ నీటి ప్రవాహంలోనే కుప్పకూలి ప్రాణాలు విడిచింది.

Also Read:



Source link

Leave a Reply

Your email address will not be published. Required fields are marked *