Antonio Guterres: కరోనాపై పోరులో మతపెద్దల పాత్రే కీలకం.. ఐరాస కీలక వ్యాఖ్యలు – un chief antonio guterres says religious leaders can play pivotal role to combat covid-19 pandemic


ప్రపంచాన్ని చిన్నాభిన్నం చేస్తున్న కరోనా మహమ్మారిపై పోరులో మత పెద్దలు కీలక పాత్ర పోషించవచ్చని ఐక్యరాజ్యసమితి సెక్రటరీ జనరల్‌ ఆంటోనియో గుటెర్రస్‌ అభిప్రాయపడ్డారు. మహమ్మారి ప్రభావానికి గురైన బాధితులు తిరిగి కోలుకోవడంలో మత పెద్దల పాత్ర ఎంతో కీలకమని ఆయన వ్యాఖ్యానించారు. కరోనాను జయించి, సుస్థిర, సమానత్వ ప్రపంచాన్ని నిర్మించడంలో వివిధ వర్గాలు కలిసి రావాల్సిన ఆవశ్యకత ఉందని గుటెర్రస్‌ ఉద్ఘాటించారు. ఈ సమయంలో వైరస్‌పై విస్తృత అవగాహన కలిగించడమే కాకుండా దీని నుంచి త్వరగా కోలుకునే మార్గాలను ప్రజలకు వివరించడంలో మత పెద్దలు కీలకమని గుటెర్రస్‌ ట్విటర్‌లో పేర్కొన్నారు.

‘గతంలో ఎన్నడూలేని విధంగా ప్రపంచం తీవ్ర సంక్షోభాన్ని ఎదుర్కొంటోంది. కేవలం ఇది ఆరోగ్య అత్యయిక స్థితి మాత్రమే కాదు, జీవనోపాధి దెబ్బతీస్తూ మానవ జీవితాన్నే తారుమారు చేసే తీవ్రసంక్షోభం’ అని ఐరాస సెక్రెటరీ జనరల్ ట్వీట్ చేశారు. గతంలో ఇలాంటి ఆరోగ్య సంక్షోభ సమయంలో మత పెద్దలు ప్రజలకు అండగా నిలబడిన తీరు ప్రపంచానికి తెలుసన్నారు. కోవిడ్‌-19 మహమ్మారిని తీవ్రతను దృష్టిలో పెట్టుకొని తన విజ్ఞప్తి మేరకు మద్దతు తెలిపిన మత పెద్దలకు ఆయన ధన్యవాదాలు తెలిపారు.

అలాగే, కరోనా విజృంభిస్తోన్న సమయంలో విదేశీయుల పట్ల ద్వేషం, ఏహ్యబావం, జాత్యాహంకారం వంటి సంఘటనలు, అసహన చర్యలను తీవ్రంగా ఖండించాలని మత పెద్దలకు పిలుపునిచ్చారు. ఈ తరుణంలో అసత్య వార్తలను, ప్రచారాలను తమ పరిధిలోని నెట్‌వర్క్‌ ద్వారా తిప్పికొట్టి, సామరస్యం వెల్లివిరిసేలా మతపెద్దలు చర్యలు తీసుకోవాలని ఐక్యరాజ్యసమితి సెక్రటరీ జనరల్‌ సూచించారు.

చాలా చోట్ల ఘర్షణలు చెలరేగడం చూస్తూనే ఉన్నాం.. ద్వేషపూరిత ప్రసంగాలతో పాటు బలహీన వర్గాలను లక్ష్యంగా చేసుకుంటున్నారు. ఇదే సమయంతో ఉగ్రవాదులు, అతివాద గ్రూప్‌లు దేశీయ నాయకత్వంపై నమ్మకాన్ని పోగొట్టేలా తమ స్వప్రయోజనాల కోసం ప్రజలను బలిపశువులుగా చేస్తున్నారని అన్నారు. ఇలాంటి వాటిని మతపెద్దలు తిప్పికొట్టాలన్నారు.

మే 12న ఐరాస అత్యున్నత సమావేశంలోనూ ప్రధాన కార్యదర్శి ఇలాంటి వ్యాఖ్యలే చేశారు. కోవిడ్-19 వల్ల ఎదురయ్యే సవాళ్లు.. అధిగమించడంలో మతపెద్దల పాత్ర’ అనే అంశంపై గుటెర్రస్ మాట్లాడారు. ప్రపంచం ఎన్నడూ లేని విధంగా సంక్షోభాన్ని ఎదుర్కొంటోందని… మహమ్మారి కేవలం ప్రపంచ ఆరోగ్య అత్యవసర పరిస్థితి మాత్రమే కాదు.. ఇది మానవ సంక్షోభం, ఇది జీవితాలను హరిస్తోంది.. జీవనోపాధిని నాశనం చేస్తుంది.. ప్రపంచవ్యాప్తంగా అపనమ్మకాన్ని పెంచుతోంది’ అని అన్నారు.

కరోనా వైరస్ మహమ్మారికి పరిష్కార మార్గాలను కనుగొనటానికి పరిశోధనలు చేస్తున్న వారితో కలిసి పనిచేస్తూ, వీటి కొనసాగింపుకు మద్దతు ఇవ్వాలని ఆంటోనియో గుటెర్రస్ కోరారు.



Source link

Leave a Reply

Your email address will not be published. Required fields are marked *