ap complaint on telangana projects: కాళేశ్వరం, గోదావరి ప్రాజెక్టులపై ఏపీ ఫిర్యాదు.. జల జగడం తారాస్థాయికి – telangana projects illegal, ap govt writes godavari river board


కృష్ణా నది జలాలపై ఏపీ, తెలంగాణ ప్రభుత్వాల మధ్య వివాదం నడుస్తుండగా గోదావరి నదీ జలాల అంశం తెరపైకి వచ్చింది. గోదావరి నదిపై తెలంగాణ ప్రభుత్వం అనుమతులు లేకుండా పలు ప్రాజెక్టుల నిర్మాణం చేపట్టిందని ఏపీ ప్రభుత్వం ఆరోపించింది. ఈ మేరకు గోదావరి రివర్ బోర్డుకు సోమవారం (మే 18) లేఖ రాసింది. అనుమతులు లేకుండా తెలంగాణ రాష్ట్రం అనేక ప్రాజెక్టుల నిర్మాణం చేపట్టిందని ఏపీ సర్కార్ లేఖలో ఆరోపించింది. ఆ ప్రాజెక్టులకు డీపీఆర్‌లు, అపెక్స్ కమిటీ అనుమతులు లేవని పేర్కొంది. కాళేశ్వరం, సీతారామ సహా పలు ప్రాజెక్టులపై ఏపీ ఫిర్యాదు చేసింది. తాజా ఉదంతంతో ఏపీ, తెలంగాణ మధ్య జల జగడం తారాస్థాయికి చేరినట్లే కనిపిస్తోంది.

గోదావరి వాటర్ డిస్ప్యూట్ ట్రిబ్యునల్ ప్రకారం.. ఎగువ రాష్ట్రాలు ప్రాజెక్టుల నిర్మాణం చేసినప్పుడు కింది రాష్ట్రాలపై ప్రభావాలను పరిగణనలోకి తీసుకోవాల్సి ఉండగా.. తెలంగాణ ప్రభుత్వం ఆ నిబంధనలను పట్టించుకోలేదని ఏపీ ప్రభుత్వం ఆరోపించింది. తెలంగాణ ప్రాజెక్టులకు ఎలాంటి నీటి కేటాయింపులు లేవని.. ఆ ప్రాజెక్టులను అడ్డుకోవాలని కోరింది.

Also Read:ఏపీలో బస్సులకు రైట్ రైట్ చెప్పిన జగన్ సర్కార్

తెలంగాణలో ఐదు ప్రాజెక్టులను అక్రమంగా నిర్మిస్తున్నారని ఏపీ ఫిర్యాదు చేసింది. పాలమూరు – రంగారెడ్డి, కల్వకుర్తి, దిండి, ఎస్‌ఎల్‌బీసీ, సీతారామ ప్రాజెక్టులకు ఎలాంటి అనుమతులు లేవని ఆరోపించింది. కేటాయించిన వాటా కంటే 190 టీఎంసీలకు పైగా నీటిని తీసుకెళ్లే ప్రయత్నాల్లో తెలంగాణ ఉందని.. తాము మాత్రం తమకు కేటాయించిన నీటినే వాడుకుంటున్నామని వివరించింది. తెలంగాణ ప్రభుత్వం మొత్తం 450.31 టీఎంసీల నీటి వినియోగానికి ప్రాజెక్టులు నిర్మాణం చేపట్టిందని ఆరోపించింది.

పోతిరెడ్డిపాడు ఎత్తు పెంచుతూ ఏపీ ప్రభుత్వం తీసుకొచ్చిన జీవో 203పై కృష్ణా బోర్డుకు తెలంగాణ ప్రభుత్వం ఫిర్యాదు చేయడంతో తెలుగు రాష్ట్రాల మధ్య జల జగడం మొదలైన విషయం తెలిసిందే. ఈ అంశంపై కృష్ణా బోర్డు ఏపీని వివరణ కోరింది. ఈ అంశం కేంద్ర జలశక్తి మంత్రి దృష్టికి కూడా వెళ్లింది. ఈ నేపథ్యంలో ఏపీ అధికారులు సోమవారం కృష్ణా రివర్ బోర్డు ఛైర్మన్ చంద్రశేఖర్ అయ్యర్‌ను కలిసి వివరణ ఇచ్చారు.

పోతిరెడ్డిపాడు విస్తరణ, రాయలసీమ ఎత్తిపోతల పథకం అక్రమమని తెలంగాణ వాదిస్తోంది. కనీసం తమకు మాట మాత్రం చెప్పకుండా ఏకపక్షంగా ఈ నిర్ణయం తీసుకున్నారని మండిపడుతోంది. పోతిరెడ్డిపాడు సామర్థ్యం పెంచితే తెలంగాణకు నీళ్లు రావని ఆరోపిస్తోంది. హైదరాబాద్ సహా మహబూబ్ నగర్, నల్గొండ, రంగారెడ్డి జిల్లాలకు నష్టం జరుగుతుందని వాదిస్తోంది. ఏపీ ఆరోపణలను తిప్పికొడుతోంది. మా వాటా నీటినే మేం వాడుకుంటున్నామని తెలంగాణ వాదిస్తోంది.

ఎవరైనా మానవత్వంతో ఆలోచించాలని ఏపీ ప్రభుత్వం పేర్కొంటోంది. సీమ, నెల్లూరు జిల్లాల తాగునీటి అవసరాల కోసమే రాయలసీమ ఎత్తిపోతల పథకం చేపట్టినట్లు వివరణ ఇచ్చింది. తెలంగాణకు 150.53 టీఎంసీల నీటి తరలింపు కొనసాగుతుందని వివరణ ఇచ్చింది. కృష్ణా జలాల్లో తమకు 512 టీఎంసీల వాటా ఉందని వాదిస్తోంది. తమకు రావాల్సిన వాటా నుంచే నీటిని తరలిస్తామని వివరించింది. మరోవైపు మా వాటా 575 టీఎంసీలకు పెంచాలని తెలంగాణ కోరుతోంది. మొత్తం మీద కృష్ణా జలాలపై చర్చ జరుగుతుండగానే ఏపీ ప్రభుత్వం గోదావరి బోర్డుకు లేఖ రాయడంతో తెలుగు రాష్ట్రాల్లో రాజకీయం వేడెక్కింది.

Also Read:కరోనా నుంచి కోలుకొని ఇంటికొస్తే కాటేసిన పాము



Source link

Leave a Reply

Your email address will not be published. Required fields are marked *