ap three capital bill: సీఆర్డీఏను రద్దుచేస్తూ నాలుగు రహస్య జీవోలు జారీచేసిన ఏపీ ప్రభుత్వం! – andhra pradesh government issues confidential gos on cmrda repeal


రాజధాని వికేంద్రీకరణ, సీఆర్డీఏ రద్దు బిల్లుకు గవర్నర్ బిశ్వభూషణ్ హరిచందన్ ఆమోదం తెలిపిన విషయం తెలిసిందే. ఈ నేపథ్యంలో రాజధాని ప్రాంత అభివృద్ధి ప్రాధికార సంస్థను (సీఆర్‌డీఏ) రద్దు చేస్తూ రాష్ట్ర ప్రభుత్వం శనివారం ఉత్తర్వులు జారీ చేసింది. సీఆర్‌డీఏకి సంబంధించి శనివారం నాలుగు జీవోలు విడుదల చేసిన పురపాలక శాఖ.. వాటిలోని విషయాన్ని రహస్యంగా ఉంచింది. ఆ నాలుగు జీవోలను ‘కాన్ఫిడెన్షియల్‌’గా పేర్కొంది.

సీఆర్‌డీఏ చట్టం రద్దు బిల్లుకు గవర్నర్‌ బిశ్వభూషణ్‌ హరిచందన్‌ శుక్రవారం ఆమోద ముద్ర వేసిన కాసేపటికే కొత్త చట్టాన్ని ప్రభుత్వం గెజిట్‌లో నోటిఫై చేసింది. దీనికి అనుగుణంగా… సీఆర్‌డీఏని రద్దు చేసి, దాని స్థానంలో అమరావతి మెట్రోపాలిటన్‌ డెవలప్‌మెంట్‌ ఏరియా (ఏఎంఆర్‌డీఏ)ని ఏర్పాటు చేస్తూ ప్రభుత్వం జీవోలు వెలువరించినట్లు విశ్వసనీయ వర్గాల సమాచారం. ఇంతకు ముందున్న ఏపీసీఆర్‌డీఏ పరిధిలోని మొత్తం ప్రాంతాన్ని, ఏఎంఆర్‌డీఏ పరిధిలోకి తెచ్చారా? లేకపోతే ఏమైనా మార్పులు చేశారా? అనేది స్పష్టత రావాల్సి ఉంది.

మరోవైపు, పాలనా వికేంద్రీకరణ, సీఆర్డీఏ రద్దు బిల్లులకు ఆమోదం తెలపడంపై అమరావతి రైతులు ఆందోళనకు దిగారు. తుళ్లూరులో రైతులు ఒకే రాష్ట్రం.. ఒకే రాజధాని’, ‘సేవ్‌ అమరావతి’ అంటూ నినాదాలు చేశారు. అమరావతి కోసం శాంతియుతంగా పోరాటం చేస్తామని.. న్యాయస్థానాల్లో పోరాటం కొనసాగిస్తామని, తమకు అక్కడ తప్పకుండా న్యాయం జరుగుతుందని అంటున్నారు. ఏకైక రాజధానిగా అమరావతిని కొనసాగించాలని డిమాండ్‌ చేశారు.

అమరావతి రైతులు మాత్రమే కాదు.. మూడు రాజధానులు వద్దంటూ ఇతర ప్రాంతాల్లో కూడా నిరసనలు కొనసాగుతున్నాయి. టీడీపీ, సీపీఎం పార్టీలు రాష్ట్రవ్యాప్తంగా నిరసనలు చేపట్టాయి. మూడు రాజధానుల బిల్లుకు వ్యతిరేకంగా కర్నూలు టీడీపీ ఆఫీసు దగ్గర ఆ పార్టీ నేతలు ఆందోళన చేశారు. అమరావతిని రాజధానిగా కొనసాగించాలని.. లేకపోతే కర్నూలును రాజధానిని చేయాలన్నారు. ఇటు పశ్చిమగోదావరి, శ్రీకాకుళం జిల్లాల్లో కూడా టీడీపీ ఆందోళనలు చేపట్టింది.. అమరావతి రైతులకు మద్దతు తెలిపింది.



Source link

Leave a Reply

Your email address will not be published. Required fields are marked *