Aranya OTT Release: ‘నెట్‌ఫ్లిక్స్’లో అరణ్య.. భారీ డీల్ కుదిరందంటూ ప్రచారం! – rana daggubati starrer aranya to be released on netflix?


హీరో రానా ద‌గ్గుబాటి నటించిన బహుబాషా చిత్రం ‘హాథీ మేరే సాథీ’. ఈ సినిమాను తెలుగులో ‘అర‌ణ్య’గా విడుదల చేస్తున్నారు. ఇప్పటికే విడుదల కావాల్సిన ఈ సినిమా లాక్‌డౌన్ కారణంగా వాయిదా పడింది. అయితే, ఈ సినిమాను డిజిటల్ స్ట్రీమింగ్ ప్లాట్‌ఫాం నెట్‌ఫ్లిక్స్‌లో విడుదల చేస్తున్నట్టు వదంతులు వస్తున్నాయి. కానీ, దీనిపై ఎలాంటి అధికారిక ప్రకటన వెలువడలేదు. వైవిధ్యమైన కాన్సెప్ట్‌తో తెరకెక్కిన ‘అరణ్య’ను డిజిటల్‌లో విడుదల చేయడానికి నెట్‌ఫ్లిక్స్ వాళ్లు భారీ మొత్తాన్ని ఆఫర్ చేశారని అంటున్నారు.

నెట్‌ఫ్లిక్స్ ప్రతినిధులు నేరుగా దర్శక నిర్మాతలను కలవకుండా సురేష్ బాబు దగ్గరకి వెళ్లారని టాక్. ‘అరణ్య’ దర్శక నిర్మాతలతో చర్చించి తమ నిర్ణయాన్ని వెల్లడిస్తామని సురేష్ చెప్పారట. దీనిలో నిజమెంతో తెలీదు కానీ.. ఇప్పుడు ఈ వార్త ఇండస్ట్రీలో హాట్ టాపిక్‌గా మారింది. ఎందుకంటే ఈ చిత్రాన్ని ఈరోస్ ఇంటర్నేషనల్ సంస్థ అత్యంత ప్రతిష్టాత్మకంగా నిర్మించింది. ప్రభు సాలోమన్ దర్శకత్వం వహించారు. ఈ సినిమా కోసం రానా చాలా బరువు తగ్గి అడవిని కాపాడే ఆదివాసీ వ్యక్తిగా కనిపించారు.

Also Read:‘ఈ కథలో పాత్రలు కల్పితం’ థీమ్ పోస్టర్.. కొణిదెల హీరోకి పర్ఫెక్ట్ లాంచింగ్ అట!

25 సంవ‌త్సరాలుగా అర‌ణ్యంలో జీవిస్తూ వ‌స్తున్న ఒక వ్యక్తి క‌థ ‘అర‌ణ్య’‌. ప‌ర్యావ‌ర‌ణం, అడ‌వుల న‌రికివేత వంటి అంశాల‌ను ఈ సినిమాలో చ‌ర్చిస్తున్నారు. విష్ణు విశాల్‌, జోయా హుస్సేన్‌, శ్రియా పిల్గావోంక‌ర్ ప్రధాన పాత్రధారులైన ఈ చిత్రానికి శంత‌ను మొయిత్రా సంగీతం స‌మ‌కూర్చగా, ఎ.ఆర్‌. అశోక్‌కుమార్ సినిమాటోగ్రాఫ‌ర్‌గా ప‌నిచేశారు. హిందీ, తెలుగుతో పాటు తమిళంలోనూ విడుదల చేస్తున్నారు. తమిళంలో ‘కాదన్’గా విడుదలవుతోంది.

వాస్తవానికి ఈ చిత్రం ఏప్రిల్ 2న విడుదల కావాల్సిఉంది. కరోనా నేపథ్యంలో సినిమాను వాయిదా వేస్తున్నట్లు ఈరోస్ ఇంటర్నేషనల్ ఇప్పటికే ప్రకటించింది. ఎగ్జిబిట‌ర్లు, డిస్ట్రిబ్యూట‌ర్లు, ప్రేక్షకుల అభిప్రాయాల‌ను గౌర‌విస్తూ సినిమాను వాయిదా వేస్తున్నట్టు స్పష్టం చేసింది. అలాంటిది, ఇప్పుడు ఈ సినిమాను నెట్‌ఫ్లిక్స్ విడుదల చేస్తుందా? అనుమానే. కాబట్టి, అధికారిక ప్రకటన వచ్చేంత వరకు ఈ వదంతుల్లో నిజమెంతో చెప్పలేం.



Source link

Leave a Reply

Your email address will not be published. Required fields are marked *