Avanthi Srinivas: నిరూపిస్తే రాజీనామా చేస్తా.. మంత్రి అవంతి సంచలన ప్రకటన – minister avanthi srinivas sensational comments on allegations of vizag land scam


ముఖ్యమంత్రి వైఎస్‌ జగన్మోహన్‌రెడ్డి తన ఏడాది పాలనతోనే చరిత్ర సృష్టించారని రాష్ట్ర పర్యాటక శాఖ మంత్రి అవంతి శ్రీనివాస్‌ అన్నారు. అన్ని ప్రాంతాలను అభివృద్ధి చేయాలనే సంకల్పంతో సీఎం జగన్ పని చేస్తున్నారని, విశాఖపట్నంలో భూకబ్జాలు జరుగుతున్నాయని నిరూపిస్తే రాజీనామా చేస్తానని సవాల్ విసిరారు. అలాగే పాదయాత్రలో ఇచ్చిన హామీల్లో 90 శాతం తొలి ఏడాదిలోనే నెరవేర్చిన ఘనత సీఎం జగన్‌కే దక్కుతుందన్నారు. వైఎస్సార్‌సీపీ ప్రభుత్వం ఏడాది పాలన పూర్తి చేసుకున్న సందర్భంగా శనివారం విశాఖ వైఎస్సార్‌సీపీ కార్యాలయంలో భారత రాజ్యాంగ నిర్మాత డాక్టర్ బీఆర్ అంబేడ్కర్, దివంగత మహానేత వైఎస్సార్ విగ్రహాలకు మంత్రి అవంతి‌ పూలమాలలు వేసి నివాళర్పించారు. అనంతరం కేక్‌ కట్‌ చేశారు. ఈ కార్యక్రమంలో ఎంపీ ఎంవీవీ సత్యనారాయణ, గాజువాక ఎమ్మెల్యే తిప్పల నాగిరెడ్డి, సిటీ అధ్యక్షుడు వంశీ కృష్ణ శ్రీనివాస్, నార్త్ ఇన్ ఛార్జి కెకె రాజు, మాజీ ఎమ్మెల్యేలు రెహమాన్, కుంభా రవిబాబు, మహిళా విభాగం అధ్యక్షురాలు గరికిన గౌరి, కొయ్యా ప్రసాద రెడ్డి, శ్రీధర్రెడ్డి, కోలా గురువులు పాల్గొన్నారు.

ఈ సందర్భంగా మంత్రి అవంతి శ్రీనివాస్‌ మాట్లాడుతూ.. ఏడాది పాలనతోనే సీఎం జగన్‌ ప్రజల్లో చెరగని ముద్ర వేసుకున్నారన్నారు. కరోనా లాంటి కష్టకాలంలో కూడా దేశంలో ఎక్కడాలేని విధంగా సంక్షేమ‌ పథకాలు ఆంధ్రప్రదేశ్‌లోనే అమలయ్యాయని వివరించారు. సీఎం జగన్‌ చేస్తోన్న సుపరిపాలన చూసి ప్రతిపక్ష నేత చంద్రబాబునాయుడు, ఆయన కుమారుడు లోకేష్‌ ఓర్వలేకపోతున్నారని మండిపడ్డారు. కుట్రలు, కుతంత్రాలతో రాష్ట్రాభివృద్ధికి అడ్డుపడుతున్నారని నిప్పులు చెరిగారు. ఎన్నికుట్రలు చేసినా సీఎం జగన్‌ సంకల్పాన్ని టీడీపీ అడ్డుకోలేదన్నారు.

అలాగే పాడేరులో మెడికల్ కళాశాల ఏర్పాటుకు సీఎం జగన్‌ ‌నిధులు కూడా కేటాయించారని మంత్రి అవంతి వెల్లడించారు. అన్ని ప్రాంతాలు సమానంగా అభివృద్ధి చెందేలా మూడు రాజధానుల ప్రకటన చేశారని చెప్పారు. దేశంలోనే ఎక్కడా లేని విధంగా 80 శాతానికి పైగా సీట్లు, 50 శాతం ఓట్లు వైఎస్సార్ సీపీ సాధించిందని గుర్తు చేశారు. విశాఖలో భూకబ్జాలు జరుగుతున్నాయంటూ టీడీపీ నేతలు చేస్తున్న ఆరోపణలను అవంతి శ్రీనివాస్‌ తీవ్రంగా ఖండించారు. ఏడాది పాలనలో విశాఖలో భూకబ్జా జరిగిందని నిరూపిస్తే తాను మంత్రి పదవికి రాజీనామా చేస్తానని సవాల్‌ విసిరారు. పార్టీ కార్యకర్తలకు అండగా ఉంటానని.. కష్టపడి పనిచేసిన కార్యకర్తలకు త్వరలోనే పదవులు ఇస్తామని ఆయన భరోసా ఇచ్చారు.



Source link

Leave a Reply

Your email address will not be published. Required fields are marked *