Babar Azam: పాకిస్థాన్ కెప్టెన్ బాబర్ అజామ్‌కి మాజీ కెప్టెన్ హఫీజ్ సపోర్ట్ – i’m sure babar azam will serve pakistan for a long time: mohammad hafeez


పాకిస్థాన్ వన్డే/ టీ20 కెప్టెన్‌గా బాధ్యతలు చేపట్టినప్పటి నుంచి బాబర్ అజామ్‌పై విమర్శలు వస్తున్నాయి. ఇటీవల వన్డే టీమ్ కెప్టెన్‌గా అతని పేరుని పాకిస్థాన్ క్రికెట్ బోర్డు (పీసీబీ) ప్రకటించగా.. అనంతరం జరిగిన మీడియా సమావేశంలో బాబర్ పాక్ టీమ్ భవిష్యత్ ప్రణాళికల గురించి ఏమాత్రం చెప్పలేకపోయాడు. దాంతో.. అతనికి ముందు చూపు లేదని కొందరు విమర్శించగా.. ఇంగ్లీష్‌లో మాట్లాడటానికి తెగ ఇబ్బందిపడిపోతున్నాడని మరికొందరు ఎద్దేవా చేశారు. అయితే.. అప్పుడే బాబర్ అజామ్ కెప్టెన్సీపై ఓ అంచనాకి రావడం సమంజసం కాదని పాకిస్థాన్ మాజీ కెప్టెన్ మహ్మద్ హఫీజ్ అభిప్రాయపడ్డాడు.

‘‘బాబర్ అజామ్ అద్భుతమైన బ్యాట్స్‌మెన్. అతని ఐదేళ్ల కెరీర్‌లో ఇప్పటికే ఎన్నో విలువైన ఇన్నింగ్స్‌లు ఆడాడు. కానీ.. బాబర్‌కి ఉన్న టాలెంట్‌కి ఇంకా మెరుగైన స్కోర్లు చేయచ్చు. అతను నాకు సోదరుడు లాంటి వాడు. ఆ చనువు కొద్దీ చెప్తుంటాను.. నేను చూడాలనుకున్న స్థాయిలో నువ్వు ఇంకా ఆడట్లేదని. ఇక అతని కెప్టెన్సీలో నేను ఆడింది కూడా చాలా తక్కువ. కాబట్టి.. ఇప్పుడే అతని కెప్టెన్నీ సామర్థ్యంపై ఓ అంచనాకి రావడం తొందరపాటే అవుతుంది. అయితే.. ఒక్కటి మాత్రం చెప్పగలను.. అతను సుదీర్ఘకాలం పాక్‌ టీమ్‌ని కెప్టెన్‌గా నడిపించగలడు. అలానే విజయవంతమైన కెప్టెన్ల జాబితాలోనూ అతని పేరు ఉంటుంది’’ అని హఫీజ్ జోస్యం చెప్పాడు.

2019 వన్డే ప్రపంచకప్‌లో పాకిస్థాన్ జట్టు ఘోరంగా విఫలమవగా.. అప్పటి కెప్టెన్ సర్ఫరాజ్ అహ్మద్‌ తీరుపై పెద్ద ఎత్తున విమర్శలు వచ్చాయి. ఆ టోర్నీ తర్వాత పాక్ గడ్డపైకి వెళ్లిన శ్రీలంక ద్వితీయ శ్రేణి జట్టు.. పాక్‌ని 3-0తో టీ20 సిరీస్‌లో క్లీన్‌స్వీప్ చేసేసింది. దాంతో.. కెప్టెన్సీ బాధ్యతల నుంచి సర్ఫరాజ్‌ని తప్పించిన పీసీబీ.. టీ20 బాధ్యతలు అజామ్‌కి, టెస్టు పగ్గాలు అజహర్ అలీ చేతికిచ్చింది. అయితే.. వన్డే కెప్టెన్సీ బాధ్యతలు మాత్రం గత నెల వరకూ ఎవరికీ ఇవ్వని పీసీబీ.. ఇటీవల బాబర్‌కే చేతికే ఇచ్చింది.



Source link

Leave a Reply

Your email address will not be published. Required fields are marked *