ban china items: సీఏపీఎఫ్ క్యాంటీన్లు: నిషేధిత జాబితాలో భారత ఉత్పత్తులు.. ఆ ఉత్తర్వులు వెనక్కి – centre removes over 1000 products from capf canteen in swadeshi push


ప్రధాని మోదీ ఇచ్చిన ‘వోకల్ ఫర్ లోకల్’ పిలుపులో భాగంగా పారామిలిటరీ క్యాంటీన్లలో 1000కి పైగా విదేశీ ఉత్పత్తులను తొలగించిన సంగతి తెలిసిందే. కేంద్ర బలగాలకు చెందిన క్యాంటీన్లను నిర్వహించే కేంద్రీయ పోలీస్‌ కళ్యాణ్‌ భాండార్‌ (కేపీకేబీ) లేదా సీఏపీఎఫ్‌ క్యాంటీన్లలో జూన్ 1 నుంచి స్వదేశీ వస్తువులే లభ్యమవుతాయని కేంద్రం ఇప్పటికే ప్రకటించింది. అయితే.. అధికారుల తప్పిదంతో ఈ వ్యవహారం వివాదాస్పదంగా మారింది. ఈ క్యాంటీన్లలో దిగుమతి చేసుకున్న ఉత్పత్తుల విక్రయాలను నిషేధిస్తూ కేంద్ర హోం శాఖ జారీ చేసిన ఉత్తర్వులను సోమవారం ఉపసంహరించుకున్నారు. ఈ జాబితాలో పేర్కొన్న ఉత్పత్తుల్లో కొన్ని వస్తువులు భారత్‌లోనే తయారైనట్లు వెల్లడి కావడమే అందుక్కారణం.

నిషేధించిన ఉత్పత్తుల జాబితాలో నుట్రెల్లా, కిండర్ జాయ్, టిక్ టాక్, హార్లిక్స్, ఓట్స్, యురేకా ఫోర్బ్స్, టామీ హిల్‌ఫిగర్ షర్ట్స్‌, అడిడాస్ బాడీ స్ప్రేలు తదితరాలు ఉన్నాయి. మైక్రోవేవ్ ఓవెన్ల లాంటి గృహోపకరణాలను కూడా పారామిలిటరీ క్యాంటీన్ల నుంచి తొలగించారు. వీటితో పాటు స్కెచర్స్, ఫెర్రెరో, రెడ్‌బుల్, విక్టోరినాక్స్, సఫిలో (పోలరాయిడ్, కారెరా) తదితర ఏడు సంస్థల ఉత్పత్తులను కూడా నిషేధ జాబితాలో చేర్చారు. అయితే.. డాబర్, బజాజ్, ఉషాతో పాటు పలు భారతీయ సంస్థలకు చెందిన ఉత్పత్తులను కూడా ఈ జాబితా నుంచి తొలగించినట్లు హోం మంత్రిత్వ శాఖ గుర్తించింది. దీంతో ఇంతకుముందు జారీ చేసిన ఉత్తర్వులను వెనక్కి తీసుకుంది. తదుపరి ఉత్తర్వులను అతి త్వరలో జారీ చేయనున్నట్లు హోం శాఖ వెల్లడించింది.

ఈ అంశంపై హోం శాఖకు చెందిన సీనియర్‌ అధికారి స్పందించారు. ‘మా అధికారి మంత్రిత్వ శాఖను సంప్రదించకుండానే దిగుమతి ఉత్పత్తులను తీసుకున్నారు. భారత ఉత్పత్తులను కూడా నిషేధ బ్రాండ్లలో చేర్చారు. జాబితాను పరిశీలించి దాన్ని సవరించాం. సవరించిన జాబితాను త్వరలోనే అన్ని క్యాంటీన్లకు పంపిస్తాం. సదరు అధికారులపై చర్యలు తీసుకుంటాం’ అని ఆయన చెప్పారు.

ఏటా రూ.2,800 కోట్ల విలువైన ఉత్పత్తుల విక్రయం
దేశంలో 50 లక్షల మంది పారామిలిటరీ క్యాంటీన్ల ఉత్పత్తులను వాడుతున్నారు. కేంద్ర బలగాలైన సీఆర్‌పీఎఫ్‌, బీఎస్‌ఎఫ్‌, ఐటీబీపీ, సీఐఎస్‌ఎఫ్‌, ఎస్‌ఎస్‌బీ, ఎన్‌ఎస్‌జీ, అస్సాం రైఫిల్‌కు చెందిన దాదాపు 10 లక్షల కుటుంబాలు ఈ క్యాంటీన్ల వస్తువులను వినియోగిస్తున్నారు. వారి కుటుంబాలతో కలిసి దాదాపు 50 లక్షల మంది ఈ క్యాంటీన్ల వస్తువులనే వాడుతున్నారు. పారామిలిటరీ క్యాంటీన్ల ద్వారా ఏటా రూ.2,800 కోట్ల విలువ చేసే ఉత్పత్తులు అమ్ముడవుతున్నాయి.

పారామిలిటరీ క్యాంటీన్లలో విక్రయించే ఉత్పత్తులను కేంద్ర హోం శాఖ మూడు విభాగాలుగా విభజించింది. కేటగిరి-1లో పూర్తిగా భారత్‌లో తయారయ్యే వస్తువులను చేర్చారు. కేటగిరి-2లో ముడి పదార్థాలు విదేశాల నుంచి దిగుమతి చేసుకొని భారత్‌లోనే ఉత్పత్తి చేస్తున్న వస్తువులు ఉన్నాయి. ఇక కేటగిరి-3లో పూర్తిగా దిగుమతి చేసుకునే వస్తువులే ఉన్నాయి.

కేపీకేబీ క్యాంటీన్లలో జూన్‌ 1 నుంచి కేటగిరి-1, కేటగిరి-2 ఉత్పత్తులు మాత్రమే లభ్యం అవుతాయని కేంద్ర హోం శాఖ ఉత్తర్వుల్లో పేర్కొన్నారు. కేటగిరి-3లో దిగుమతి చేసుకొని విక్రయిస్తున్న దాదాపు వెయ్యికిపైగా ఉత్పత్తులు ఇకపై లభ్యంకావని స్పష్టం చేశారు.

మరోవైపు.. ప్రధాని మోదీ పిలుపు అందుకొని పలువురు సోషల్ మీడియాలో ప్రత్యేక క్యాంపెయిన్ నిర్వహిస్తున్నారు. స్వదేశీ ఉత్పత్తులను వినియోగించాలని.. విదేశీ ఉత్పత్తుల వాడకాన్ని మానుకోవాలని కోరుతున్నారు. ముఖ్యంగా చైనా ఉత్పత్తులను పూర్తిగా నిషేధించాలని చెబుతున్నారు. దీనికి విశేష స్పందన లభిస్తోంది.



Source link

Leave a Reply

Your email address will not be published. Required fields are marked *