bandi sanjay arrest: బండి సంజయ్ అరెస్టు: తెలంగాణ సీఎస్, డీజీపీకి నోటీసులు – national bc commission issues notices to telangana cs and dgp over bandi sanjay arrest


బీజేపీ తెలంగాణ రాష్ట్ర అధ్యక్షుడు బండి సంజయ్‌ అరెస్టుపై జాతీయ బీసీ కమిషన్‌ స్పందించింది. సంజయ్‌‌పై పోలీసుల దురుసు ప్రవర్తన వ్యవహారంపై సుమోటోగా కేసు నమోదు చేయాలని తెలంగాణ ప్రభుత్వం ప్రధాన కార్యదర్శి, డీజీపీకి జాతీయ బీసీ కమిషన్ నోటీసులు జారీ చేసింది. నవంబర్‌ 5లోగా నివేదిక ఇవ్వాలని అందులో పేర్కొంది. అంతేకాక, ఓ పార్టీ రాష్ట్ర అధ్యక్షుడు, ఎంపీ అని కూడా చూడకుండా తనపై పోలీసులు చేయి చేసుకున్నారని బండి సంజయ్‌ తీవ్రమైన అసహనం వ్యక్తం చేసిన సంగతి తెలిసిందే. దీనిపై పార్లమెంటు ప్రివిలేజ్ కమిటీకి కూడా ఫిర్యాదు చేస్తానని ఆయన గతంలో వెల్లడించారు.

సిద్దిపేట సీపీ, సీఎం కేసీఆర్‌ సంగతి తేలుస్తానని హెచ్చరించారు. తనపై దాడికి పాల్పడిన సీపీపై క్రిమినల్ కేసులు పెట్టాలని, సస్పెండ్ చేయాలని ట్విటర్‌ వేదికగా కోరారు. దుబ్బాక ఉప ఎన్నిక సందర్భంగా సోమవారం సిద్దిపేటలోని లెక్చరర్స్‌ కాలనీ బీజేపీ అభ్యర్థి రఘునందన్‌రావు మామ సురభి రాంగోపాల్‌రావు, పక్కనే ఉన్న సురభి అంజన్‌రావు ఇంట్లో సిద్దిపేట అర్బన్‌ తహసీల్దార్‌ ఆధ్వర్యంలో పోలీసులు తనిఖీలు చేశారు. ఈ సోదాల్లో అంజన్‌రావు ఇంట్లో రూ.18.67 లక్షల నగదును గుర్తించినట్లు పోలీసులు తెలిపారు. అయితే, ఈ డబ్బులు పోలీసులే తీసుకొచ్చి అక్కడ పెట్టి డబ్బులు దొరికాయని ప్రచారం చేస్తున్నారంటూ బీజేపీ కార్యకర్తలు నినాదాలు చేశారు.

ఈ క్రమంలో సిద్దిపేటలో రఘునందన్ రావు ఇంట్లో జరిగిన సోదాల గురించి తెలుసుకున్న బండి సంజయ్ సిద్దిపేటకు బయలుదేరారు. సిద్దిపేటలో సంజయ్‌ని పోలీసులు అడ్డుకున్నారు. ఈ క్రమంలో పోలీసులకు, బీజేపీ కార్యకర్తలకు మధ్య వాగ్వాదం జరిగింది. పోలీస్ కమిషనర్ తనపై చేయి చేసుకున్నారని బండి ఆరోపించారు. ఆ తర్వాత అరెస్ట్ చేసిన బండి సంజయ్‌ని సిద్దిపేట నుంచి కరీంనగర్‌కి తీసుకెళ్లారు. పోలీసులు వ్యవహరించిన తీరుపై ఆయన తన కార్యాలయంలోనే సోమవారం రాత్రి నుంచి దీక్ష చేపట్టారు. ఆరోగ్యం క్షీణిస్తుండడంతో వైద్యులు ఆయన్ను బలవంతంగా ఆస్పత్రికి తరలించి ఫ్లూయిడ్స్ ఎక్కిస్తున్నారు.



Source link

Leave a Reply

Your email address will not be published. Required fields are marked *