belgium prince: లాక్‌డౌన్ ఉల్లంఘించి పార్టీలో పాల్గొన్న బెల్జియం యువరాజు.. కరోనా పాజిటివ్ – covid-19: belgium prince joachim tests positive after lockdown party


కరోనా వైరస్ మహమ్మారి ఎవర్నీ వదిలిపెట్టడం లేదు. పేద, ధనిక అనే బేధం లేకుండా… సామాన్యుల నుంచి రాజకుటుంబాలను పట్టి పీడిస్తోంది. ఐరోపాలోని పలు రాజ ప్రముఖులు, నేతలు వైరస్ బారినపడ్డారు. స్పెయిన్‌ యువరాణి మరియా థెరిసా కరోనా వైరస్‌తో ప్రాణాలు కోల్పోయింది. బ్రిటన్ ప్రధాని బోరిస్ జాన్సన్ సైతం కరోనా బారినపడి మరణం అంచుల దాకా వెళ్లారు. తాజాగా బెల్జియం యువరాజు జొవాచిమ్‌ కోవిడ్-19 బారినపడినట్లు ఆ దేశ రాజకుటుంబం ప్రకటించింది. 28 ఏళ్ల జొవాచిమ్‌ ఇంటర్న్‌షిప్‌ కోసం మే 26న బెల్జియం నుంచి స్పెయిన్‌కి వెళ్లినట్లు పేర్కొంది.

ఈ సందర్భంగా దక్షిణ స్పెయిన్‌లోని కార్డోబాలో జరిగిన ఓ పార్టీలో 26 మంది మిత్రబృందంతో కలిసి రాజకుమారుడు పాల్గొన్నారు. ఇది జరిగిన రెండు రోజుల తర్వాత యువరాజులో కరోనా వైరస్‌ లక్షణాలు బయటపడ్డాయి. అనంతరం పరీక్షలు నిర్వహించగా.. అతడికి కరోనా వైరస్‌ సోకినట్లు నిర్ధారణ అయ్యింది. దీంతో ఆ పార్టీలో పాల్గొన్న అందరినీ క్వారంటైన్‌కు తరలించినట్లు స్పెయిన్‌ అధికారులు వెల్లడించారు.

అయితే, లాక్‌డౌన్‌ నిబంధనలు ఉల్లంఘించి ప్రిన్స్‌ తన మిత్రులతో పార్టీలో పాల్గొన్నట్లు స్పెయిన్ మీడియా పేర్కొంది. 15 మంది కంటే ఎక్కువ మంది ఒకచోట గుమికూడవద్దని నిబంధనలు స్పష్టంగా ఉన్నప్పటికీ వాటిని ఉల్లంఘించి పార్టీలో పాల్గొన్నారని తెలిపాయి. దీనిపై కేసు నమోదుచేసిన స్పెయిన్ పోలీసులు విచారణ చేపట్టారు. ఒకవేళ లాక్‌డౌన్‌ నిబంధనలను ఉల్లంఘించినట్లు రుజువైతే 10వేల యూరోలు (రూ.8లక్షలు) ఫైన్ చెల్లించాల్సి ఉంటుంది.

కాగా, కరోనా విలయతాండవం చేసిన స్పెయిన్‌లో లాక్‌డౌన్‌ నిబంధనలు కఠినంగా అమలుచేస్తున్నారు. ముఖ్యంగా 14 ఏళ్లలోపు పిల్లలను మరో 6వారాల పాటు ఇంటినుంచి బయటకు రావద్దని ప్రకటించారు. ఈ సందర్భంలో యువరాజు బాధ్యతారహిత్యంగా వ్యవహరించారని అక్కడ స్పెయిన్ ప్రతినిధి రాఫేలా వాలెంజులియా వ్యాఖ్యానించారు.

ఈ ఘటన తనను ఆశ్చర్యానికి, కోపానికి గురిచేసింది.. కరోనా కారణంగా చాలా మంది ప్రాణాలు కోల్పోయినవారికి జాతి యావత్తు సంతాపం తెలుపుతున్న సమయంలో జరగడం చాలా బాధాకరమని ఆమె అన్నారు. నిబంధనలు అమలు విషయంలో పోలీసులు కఠినంగా వ్యవహరిస్తున్నట్లు అక్కడి అధికారులు వెల్లడించారు. బెల్జియం సింహాసనం కోసం ప్రధాన పోటీదారులలో ఒకరైన జొవాచిమ్.. యువరాణి ఆస్ట్రిడ్ చిన్న కుమారుడు.



Source link

Leave a Reply

Your email address will not be published. Required fields are marked *