Chandrababu Naidu : కేజ్రీవాల్ రూ. 5 వేలిస్తే, ఏపీలో వైసీపీ అభ్యర్థులతో ప్రచారం: చంద్రబాబు – tdp chief chandrababu naidu criticise ysrcp government amid of coronavirus crisis


కరోనా వైరస్ (కోవిడ్ 19)కు సంబంధించి ఆంధ్రప్రదేశ్‌లో పరిస్థితి భయంకరంగా ఉందని టీడీపీ అధినేత, ప్రతిపక్ష నాయకుడు చంద్రబాబునాయుడు విమర్శించారు. రాష్ట్రంలో ప్రజలు తీవ్ర ఇబ్బందులు ఎదుర్కొటున్నారని, పని చేస్తే గానీ పూటగడవని ఎంతో మంది పేదల పరిస్థితి దారుణంగా ఉందన్నారు. ఈ మేరకు సోమవారం చంద్రబాబు మీడియాతో మాట్లాడుతూ.. ప్రజలను ఏవిధంగా ఆదుకోవాలో ప్రభుత్వం ఆలోచించాలని సూచించారు. కేంద్ర ప్రభుత్వ సాయానికి అదనంగా కొన్ని రాష్ట్రాలు ఆర్థిక ప్యాకేజీ ఇచ్చాయని, ఢిల్లీలో అర్వింద్ కేజ్రీవాల్ నేతృత్వంలోని ఆమ్ ఆద్మీ పార్టీ ప్రభుత్వం రూ. 5 వేలు ఇస్తోందని చెప్పారు. అలాగే, ఏపీలో కూడా పేదలకు తొలి విడతగా కనీసం రూ. 5 వేలు చొప్పున ఇచ్చి ఆదుకోవాలని డిమాండ్ చేశారు.


అలాగే రాష్ట్రంలో రూ.1,000 చొప్పున ఇస్తున్న నగదును సైతం స్థానిక సంస్థల ఎన్నికల్లో పోటీ చేయబోయే వైసీపీ అభ్యర్థులు పంచడమేంటని చంద్రబాబు ప్రశ్నించారు. రేషన్‌, పింఛన్లలో అనేక మందికి కోత విధించడం వల్ల తీవ్ర ఇబ్బందులు పడుతున్నారన్నారు. రాష్ట్రంలో రైతులు కుదేలయ్యే పరిస్థితి తీసుకురావొద్దని, వెంటనే అరటి, మామిడి, బత్తాయి, టమాటా రైతులను ఆదుకోవాలని డిమాండ్ చేశారు.

కరోనాతో ప్రపంచం మొత్తం విలవిలలాడుతోందని, అమెరికా, స్పెయిన్‌, ఇటలీలో కరోనా విజృంభిస్తోందని చంద్రబాబు అన్నారు. భారత్‌లో సైతం వారం రోజుల్లో 222 శాతం కరోనా కేసులు పెరిగాయన్నారు. ఏపీలో వారంలో 1,021 శాతం కరోనా కేసులు పెరిగాయని.. ఇది చాలా ప్రమాదమన్నారు. దేశంలో కరోనా పరీక్షలు చాలా తక్కువగా జరుగుతున్నాయని, ఏపీలో కరోనా పరీక్షల పరిస్థితి ఇంకా దారుణంగా ఉందన్నారు. ఏపీలో కేవలం 6 ల్యాబ్‌లే ఉన్నాయని, టెస్టింగ్‌లు చాలా తక్కువగా ఉన్నాయని పేర్కొన్నారు. ఏపీలో రోజుకు ఎంతమందికి టెస్టులు చేస్తున్నారో ప్రభుత్వం చెప్పడంలేదన్నారు. వాస్తవాలు బయటకు చెప్పకపోవడం చాలా ప్రమాదకరమన్నారు.





Source link

Leave a Reply

Your email address will not be published. Required fields are marked *