Chandrababu Naidu: శారీరకంగా, ఆర్థికంగా దెబ్బతీశారు, వారికి పాదాభివందనం.. చంద్రబాబు ఎమోషనల్ స్పీచ్ – tdp chief chandrababu emotional speech in tdp mahanadu


తెలుగు దేశం పార్టీ కార్యకర్తల త్యాగాలు జీవితంలో మరిచిపోలేనని ఆ పార్టీ జాతీయ అధ్యక్షుడు చంద్రబాబునాయుడు అన్నారు. మంగళగిరిలోని పార్టీ కేంద్ర కార్యాలయం ఎన్టీఆర్‌ భవన్‌లో నిర్వహించిన మహానాడులో భాగంగా బుధవారం పార్టీ శ్రేణులనుద్దేశించి చంద్రబాబు జూమ్‌ వెబినార్‌ ద్వారా ప్రసంగించారు. గడిచిన ఏడాది దురదృష్టకర సంవత్సరమని వ్యాఖ్యానించారు. శారీరకంగా మానసికంగా, ఆర్థికంగా కార్యర్తలను దెబ్బతీశారని ఆవేదన వ్యక్తం చేశారు. చేయని తప్పులకు టీడీపీ కార్యకర్తలు జైలుకు వెళ్లారని గుర్తు చేశారు. పార్టీ శ్రేణులను బెదిరించి లొంగదీసుకునే కుట్రలు చేశారని ఆరోపించారు.

కుటుంబ సభ్యులు హత్యకు గురైనా పార్టీ శ్రేణులు వెనుకంజ వేయలేదని చంద్రబాబు తెలిపారు. ప్రాణాలు పోయినా పార్టీని వదిలేది లేదని చెప్పారన్నారు. ఆర్థికంగా కుంగదీసినా, హింసించినా పార్టీ వీడని కార్యకర్తలకు పాదాభివందనం చేస్తున్నానని భావోద్వేగం చెందారు. కరోనా కష్ట సమయంలో టీడీపీ కార్యకర్తలు చేస్తున్న సేవలు మరువలేమన్నారు. టీడీపీ హయాంలో వినూత్న పద్ధతుల్లో అభివృద్ధి కార్యక్రమాలు చేపట్టామని, హైదరాబాద్‌ను ప్రపంచస్థాయి నగరంగా చేశామని చెప్పుకొచ్చారు. టీడీపీ హయాంలో జరిగిన అభివృద్ధి ఇప్పుడు తెలంగాణలో మంచి ఫలితాలను ఇస్తోందన్నారు. అధికారంలో ఉన్నా, ప్రతిపక్షంలో ఉన్నా ప్రజల కోసమే పనిచేశామన్నారు.

సమాజమే దేవాలయం- ప్రజలే దేవుళ్లు అనే బాటలో నడిచామని చంద్రబాబు అన్నారు. దివంగత ఎన్టీఆర్‌ హయాంలో ఆత్మగౌరవాన్ని ప్రభోదించారని, తమ హయాంలో ఆత్మవిశ్వాసాన్ని పెంచామని పేర్కొన్నారు. 36 ఏళ్ల పార్టీ చరిత్రలో 22 ఏళ్లు అధికారంలో, 16 ఏళ్లు ప్రతిపక్షంలో ఉన్నామన్నారు. అధికారంలో ఉన్నా, ప్రతిపక్షంలో ఉన్నా ప్రజల కోసమే పనిచేశామని తెలిపారు. టీడీపీ హయాంలో చేపట్టిన పథకాలు దేశానికి మార్గదర్శకమయ్యాయని చంద్రబాబు వివరించారు.



Source link

Leave a Reply

Your email address will not be published. Required fields are marked *