China coronavirus: లక్షణాలు లేకుండానే చైనాలో విజృంభిస్తోన్న కరోనా.. వుహాన్‌లో అలాంటి కేసులే ఎక్కువ – china reports 33 new coronavirus cases; spike in asymptomatic infections in wuhan


కొత్తరకం ప్రాణాంతక కరోనా వైరస్‌ తొలిసారి వెలుగుచూసిన చైనాలో మరోసారి పాజిటివ్‌ కేసులు పెరుగుతున్నాయి. గడచిన 24 గంటల్లో మరో 33 పాజిటివ్‌ కేసులు నిర్ధారణ అయినట్టు చైనా జాతీయ ఆరోగ్య కమిషన్ వెల్లడించింది. మొత్తం కేసుల్లో 31 మందిలో ఎలాంటి లక్షణాలు లేకుండానే వైరస్ నిర్దారణ అయినట్టు అధికారులు పేర్కొన్నారు. ఈ కేసుల్లో సింహభాగం వైరస్ పుట్టిన వుహాన్ నగరంలోనే నమోదు కావడం గమనార్హం. కరోనా మహమ్మారి రెండోసారి విజృంభించే అవకాశం ఉందన్న నిపుణుల సూచనలతో వుహాన్ నగరంలోని 1.10 కోటి మందికి కరోనా నిర్ధారణ పరీక్షలు నిర్వహిస్తున్నారు. ఇందులో భాగంగానే తాజా పాజిటివ్‌ కేసులు బయటపడుతున్నాయి. అక్కడ గురువారం కొత్తగా 28 పాజిటివ్ కేసులు నమోదయ్యాయి.

ప్రస్తుతం నిర్ధారణ అయిన కేసుల్లో ఎక్కువ మందికి కరోనా వైరస్ లక్షణాలు కనిపించడం లేదు. వుహాన్‌‌తోపాటు గాంగ్‌డాంగ్‌, షాంఘై ప్రావిన్సుల్లో కూడా తాజాగా పాజిటివ్‌ కేసులు బయటపడుతున్నట్లు చైనా నేషనల్‌ హెల్త్‌ కమిషన్‌ (ఎన్‌హెచ్‌సీ) తెలిపింది. అయితే వీరంతా విదేశాల నుంచి వచ్చిన వ్యక్తులుగా గుర్తించారు. స్థానికుల్లోనూ కొందరికి వైరస్ వ్యాపించినట్లు అధికారులు పేర్కొన్నారు. మొత్తంమీద బయటకు లక్షణాలు కనిపించని కేసులే ఎక్కువగా బయటపడుతున్నాయని వెల్లడించారు. అత్యధికంగా వుహాన్‌లో లక్షణాలు లేకుండానే వైరస్‌ వ్యాప్తి చెందుతుందని ఎన్‌హెచ్‌సీ పేర్కొంది.

వైరస్ వ్యాప్తి అదుపులోకి వచ్చినట్టే వచ్చి మళ్లీ అలజడి సృష్టిస్తోంది. కొత్తగా కేసులు నమోదవుతుండటంతో మరోసారి లాక్‌డౌన్ ప్రకటిస్తూ చైనా ప్రభుత్వం నిర్ణయం తీసుకుంది. జిలిన్‌ ప్రావిన్స్‌లో కొత్తగా కరోనా కేసులు బయట పడటంతో అప్రమత్తమైన చైనా అక్కడ లాక్‌డౌన్ విధిస్తూ నిర్ణయం తీసుకుంది. దీంతో ఈ ప్రావిన్స్‌లోని సుమారు 108 మిలియన్ల మంది మంగళవారం (మే 19) నుంచి నిర్బంధంలోకి వెళ్లిపోయారు. ఈశాన్య చైనాలో భాగమైన జిలిన్‌ ప్రాంతంలో పాఠశాలలు, ప్రభుత్వ, ప్రైవేట్ కార్యాలయాలన్నీ మూతపడ్డాయి. బస్సులు, రైళ్ల రాకపోకలను నిలిపివేసినట్టు చైనా అధికారులు తెలిపారు.

కరోనా వైరస్ తొలిసారి వెలుగుచూసిన వుహాన్‌లో 50,340 మందికి వైరస్ సోకగా.. 3,869 మంది ప్రాణాలు కోల్పోయారు. చైనాలో మొత్తం 82,967 మందికి వైరస్ నిర్దారణ కాగా.. 4,650 మంది చనిపోయారు.



Source link

Leave a Reply

Your email address will not be published. Required fields are marked *