China India border: నోటితో మాట్లాడి, నొసటితో వెక్కిరిస్తోన్న చైనా.. సరిహద్దుల్లో భారీ సైనిక విన్యాసాలు! – china people’s army carries out large-scale drill to check preparedness at border with india


మరోసారి చైనా తన వక్ర బుద్దిని ప్రదర్శించింది. నోటితో మాట్లాడి, నొసటితో వెక్కిరించిన చందంగా.. సరిహద్దుల్లో వివాదం పరిష్కారానికి ఓవైపు చర్చలు జరుపుతూనే.. మరోవైపు వేలాది సైనికులతో కవాతులు నిర్వహించింది. తూర్పు లడఖ్‌లో ఉద్రిక్తతలపై ఇరు దేశాలకు చెందిన లెఫ్టినెంట్ జనరల్ స్థాయి అధికారుల మధ్య చర్చలు జరిగిన మరుసటి రోజే చైనా ఈ చర్యలకు పాల్పడటం గమనార్హం. సెంట్రల్‌ చైనీస్‌ ప్రావిన్సు నుంచి సరిహద్దుకు తమ బలగాల్ని, యుద్ధ వాహనాల్ని తరలింపుపై తమ సన్నద్ధతను పరీక్షించుకోవడానికే డ్రాగన్ ఈ చర్యలకు దిగినట్లు తెలుస్తోంది.

భారత్‌తో నెలకొన్న సరిహద్దు వివాదం నేపథ్యంలో ‘పీపుల్స్‌ లిబరేషన్‌ ఆర్మీ’(పీఎల్‌ఏ) ఈ విన్యాసాలు నిర్వహించినట్లు చైనా అధికార పత్రిక ‘గ్లోబల్‌ టైమ్స్‌’ ఓ కథనం వెల్లడించింది. గతవారం కూడా ఈ తరహా కథనాన్ని గ్లోబల్ టైమ్స్ ప్రచురించింది. టిబెట్‌ మిలిటరీ కమాండ్‌కు చెందిన సైనికులు సముద్ర మట్టానికి 4,700 మీటర్ల ఎత్తైన ప్రాంతంలో విన్యాసాలు నిర్వహించినట్లు పేర్కొంది. అయితే, సైనిక విన్యాసాలు నిర్వహించిన ప్రదేశం గురించి మాత్రం స్పష్టంగా పేర్కొనలేదు.

పౌర, లాజిస్టిక్ ట్రాన్స్‌పోర్ట్ విమానాలు, రైల్వేల ద్వారా వేలాదిగా పారా మిలటరీ దళాలను మధ్య చైనాలోని హుబే నుంచి వాయువ్య చైనాలోని టిబెట్ పీఠభూమిలోని ఓ ప్రదేశానికి తరలించినట్టు చైనా సెంట్రల్ టెలివిజన్ శనివారం ఓ కథనం ప్రచారం చేసింది. ఆయుధాలతో కూడిన వాహనాలు, భారీ సామాగ్రితో సహా వందలాది సైనికులు కూడా ఈ విన్యాసాల్లో పాల్గొన్నాయని, ఇది కేవలం కొన్ని గంటల్లో విజయవంతంగా ముగిసిందని తెలిపింది.

సైనిక స్థాయిలోనే కాకుండా రవాణా మార్గాల్లో కూడా గణనీయమైన పురోగతిని సాధించామని, బలగాలను రవాణా చేసే మార్గాలను విస్తరించి, పూర్తిస్థాయిలో వినియోగించుకునే స్థాయికి చేరినట్టు వైమానిక దళం శిక్షణ విభాగానికి చెందిన మేజర్ కొలోనెల్ మావో లీ వ్యాఖ్యానించారు. ఇదిలా ఉండగా.. ఓవైపు సమస్య పరిష్కారం దిశగా శాంతియుత చర్చలు జరిపేందుకు అంగీకరిస్తూనే.. మరోవైపు ఈ తరహా సైనిక కార్యకలాపాలు కొనసాగిస్తుండటం చైనా ద్వంద్వ నీతిని బహిర్గతం చేస్తోందని నిపుణులు అభిప్రాయపడుతున్నారు.



Source link

Leave a Reply

Your email address will not be published. Required fields are marked *