china rejects trump offer: మూడో వ్యక్తి జోక్యం అవసరంలేదు.. మధ్యవర్తిత్వంపై ట్రంప్ ఆఫర్‌కి చైనా కౌంటర్ – china rejects us president donald trump’s offer to mediate in border standoff with india


చైనా, భారత్ మధ్య ఏర్పడిన సరిహద్దు సమస్య పరిష్కారానికి తాను మధ్యవర్తిత్వం వహించడానికి సిద్ధంగా ఉన్నానని అమెరికా అధ్యక్షుడు డొనాల్డ్ ట్రంప్ చేసిన ఆఫర్‌ను భారత్ ఇప్పటికే సున్నితంగా తిరస్కరించింది. తాజాగా, దీనిపై డ్రాగన్ సైతం స్పందించింది. ట్రంప్ ఆఫర్‌ను చైనా కూడా తిరస్కరించింది. దీనిపై చైనా విదేశాంగ శాఖ అధికార ప్రతినిధి జూ లింజియాన్ మాట్లాడుతూ.. సరిహద్దుల్లో ఏర్పడిన ఉద్రిక్తతలను పరిష్కరించుకోడానికి తమ రెండు దేశాలూ మూడో వ్యక్తి జోక్యాన్ని కోరుకోవడంలేదని అన్నారు. అంతేకాదు, చైనా, భారత్ మధ్య ప్రస్తుతం సరిహద్దు సంబంధిత విధానాలు, కమ్యూనికేషన్ వ్యవస్థలు ఉన్నాయని స్పష్టం చేశారు.

చర్చలు, సంప్రదింపుల ద్వారా సమస్యను పరిష్కరించుకునే సామర్థ్యం తమకుందని, ఇందులో మూడో వ్యక్తి జోక్యాన్ని తాము కోరుకోవడంలేదని లింజియాన్ ఉద్ఘాటించారు. సరిహద్దుల్లో వాస్తవాధీన రేఖ వెంబడి లడఖ్, ఉత్తర సిక్కిమ్ వద్ద పలు చోట్ల భారత్, చైనా సైన్యాలు ఘర్షణకు దిగి, ఒకరిపై ఒకరు వ్యక్తిగత దాడులకు పాల్పడిన విషయం తెలిసిందే. మే నెల మొదటి వారంలో మొదలైన ఉద్రిక్తత ఇంకా కొనసాగుతోంది.

ఇప్పటికే ఇరు దేశాలు తమ సైన్యాలను భారీగా మోహరించాయి. తొలుత చైనా సైన్యం వాస్తవాధీన రేఖను దాటి భారత భూభాగాల్లోకి చొచ్చుకురాగా.. దీనికి ఇండియన్ ఆర్మీ సైతం ధీటుగా బదులిచ్చింది. చైనా పీపుల్స్ లిబరేషన్ ఆర్మీ దళాలను అడ్డుకుని, బేషరుతుగా తమ భూభాగం నుంచి వెళ్లాలని సూచించింది. అంతేకాదు, భారత సైన్యం తమ భూభాగంలోకి ప్రవేశించిందన్న చైనా ఆరోపణలను సమర్ధంగా తిప్పికొట్టింది. గత నెల రోజులుగా సరిహద్దుల్లో తీవ్ర ఉద్రిక్తతలు కొనసాగుతున్నాయి.

భారత ఆర్మీ చీఫ్ నరవాణే సైతం తొలుత వివాదం మొదలైన లడఖ్ సరిహద్దుల్లో పర్యటించి పరిస్థితిని సమీక్షించారు. తర్వాత దేశ సరిహద్దుల్లో తాజా పరిస్థితులపై ప్రధాని నరేంద్ర మోదీ ఉన్నత స్థాయి సమీక్ష నిర్వహించారు. చైనాతో ఉద్రిక్తతలు నెలకొన్న వేళ జాతీయ భద్రతా సలహాదారు అజిత్‌ దోవల్‌, త్రివిధ దళాల ప్రధానాధికారి బిపిన్‌ రావత్‌ తదితరులతో కీలక చర్చలు జరిపారు. లడఖ్‌ సరిహద్దుల్లో చైనాతో నెలకొన్న ఉద్రిక్తతలపై వీరితో చర్చించిన అనంతరం.. విదేశాంగ శాఖ కార్యదర్శి హర్షవర్దన్‌తోనూ మోదీ మాట్లాడారు.



Source link

Leave a Reply

Your email address will not be published. Required fields are marked *