chinese evacuation: చైనా కీలక నిర్ణయం.. భారత్ నుంచి చైనీయులు వెనక్కి – china decides to evacuate citizens from india amid rise in covid-19 cases


లాక్‌డౌన్‌తో భారత్‌లో చిక్కుకున్న తమ పౌరులందరినీ వెనక్కి రప్పించడానికి చైనా ప్రభుత్వం నిర్ణయించింది. భారత్‌లోని వివిధ ప్రాంతాల్లో ఉన్న చైనా విద్యార్థులు, వ్యాపారవేత్తలు, పర్యాటకులు, ఇతరులను తక్షణమే తమ దేశానికి తీసుకెళ్లడానికి ఏర్పాట్లు చేసింది. ఈ మేరకు చైనా ప్రభుత్వ అధికారిక వెబ్‌సైట్‌లో సోమవారం (మే 25) ఓ ప్రకటన విడుదల చేశారు. భారత్‌లో కరోనా కేసులు లక్షా నలభై వేలకు చేరువ కావడం, కరోనా కేసులు అధికంగా నమోదైన టాప్‌టెన్ దేశాల జాబితాలో ఇండియా చేరిన నేపథ్యంలో చైనా నిర్ణయం చర్చనీయాంశంగా మారింది.

అటు లిపులేఖ్ వద్ద చైనా, భారత్ సరిహద్దు ప్రాంతంలో ఉద్రిక్తతలు కొనసాగుతున్న వేళ చైనా ఈ నిర్ణయం తీసుకోవడం గమనార్హం. స్వదేశానికి రావాలనుకుంటున్న వారందరూ వెబ్‌సైట్ ద్వారా వివరాలు నమోదు చేసుకోవాలని చైనా ప్రభుత్వ సూచించింది. వెబ్‌సైట్‌లో ఇచ్చిన లింకుల ఆధారంగా విమాన టికెట్లు బుక్ చేసుకోవాలని తెలిపింది.

స్వదేశానికి వచ్చిన తర్వాత తప్పనిసరిగా 14 రోజుల పాటు హోమ్ క్వారంటైన్‌లో ఉండాల్సిందేనని చైనా ప్రభుత్వం స్పష్టం చేసింది. విమాన ప్రయాణంలోనూ భౌతిక దూరం తదితర నిబంధనలు పాటించాలని సూచించింది. ప్రయాణానికి, క్వారంటైన్‌కు అయ్యే ఛార్జీలను అభ్యర్థులే భరించాలని స్పష్టం చేసింది. భారత్‌తో పాటు ఇతర దేశాల్లోనూ చిక్కుకున్న చైనా పౌరులను వెనక్కి రప్పించడానికి అక్కడి ప్రభుత్వం ప్రయత్నాలు ప్రారంభించినట్లు తెలుస్తోంది.

చైనాలోని వుహాన్‌లో గత ఏడాది డిసెంబర్‌లో పుట్టిన కరోనా వైరస్ ప్రపంచ వ్యాప్తంగా 190 దేశాలకు విస్తరించింది. పలు దేశాల్లో పరిస్థితి ఆందోళనకరంగా ఉంది. ప్రపంచవ్యాప్తంగా 54 లక్షల మందికి పైగా ఈ మహమ్మారి బారినపడ్డారు. 3.4 లక్షల మంది మరణించారు. వుహాన్ నుంచి భారత్ గత ఫిబ్రవరిలో 700 మందిని స్వదేశానికి తీసుకొచ్చిన సంగతి తెలిసిందే.

Also Read:జూన్‌‌లో భారత్‌లో కరోనా వ్యాప్తి తారా స్థాయికి..!

Must Read:నిప్పుల కొలిమిలా తెలంగాణ.. పిట్టల్లా రాలుతున్న జనం, ఈ జాగ్రత్తలు తప్పనిసరి



Source link

Leave a Reply

Your email address will not be published. Required fields are marked *