cm jagan on vizag crane accident: విశాఖ క్రేన్ దుర్ఘటనలో 11కు పెరిగిన మృతులు.. అధికారులకు సీఎం జగన్ కీలక ఆదేశాలు – visakhapatnam hindustan shipyard crane collapse and several died, ap cm ys jagan enquires incident


విశాఖపట్నంలోని హిందూస్థాన్‌ షిప్‌యార్డులో జరిగిన ఘోర ప్రమాద ఘటనపై ఆంధ్రప్రదేశ్‌ ముఖ్యమంత్రి వైఎస్‌ జగన్మోహన్‌ రెడ్డి ఆరా తీశారు. ప్రమాదానికి సంబంధించిన వివరాలను అధికారులను అడిగి తెలుసుకున్నారు. ఈ ఘటనపై తక్షణమే చర్యలు తీసుకోవాలని విశాఖపట్నం జిల్లా కలెక్టర్‌, నగర పోలీస్‌ కమిషనర్‌ను సీఎం జగన్‌ ఆదేశించారు. గాయపడిన వారికి మెరుగైన వైద్య సదుపాయం అందించాలని ఆదేశాలు జారీచేశారు. ప్రమాదానికి గల కారణాలపై యాజమాన్యంతో చర్చించి వివరాలను సేకరించాలని సూచించారు. మరోవైపు వ్యవసాయశాఖ మంత్రి కురసాల కన్నబాబు కాకినాడ నుంచి విశాఖకు బయల్దేరారు.

కాగా, హిందూస్థాన్ షిప్‌యార్డులో భారీ క్రేన్‌ సామర్థ్యం పరీక్షిస్తుండగా ఒక్కసారిగా కుప్పకూలింది. ఈ ఘటనలో ఇప్పటి వరకు 11 మంది మృతి చెందారు. హుద్‌హుద్‌ తుపాను సమయంలో పూర్తిగా ధ్వంసమైన పాత భారీ క్రేన్‌ స్థానంలో ఇటీవలే రూ. 12 కోట్లతో కొత్త క్రేన్‌ను షిప్‌యార్డు యాజమాన్యం కొనుగోలు చేసింది. నిర్వహణ బాధ్యతలను ఔట్‌సోర్సింగ్‌కు అప్పగించింది. కాగా, మృతుల్లో ప్రసాద్‌, జగన్‌ శాశ్వత ఉద్యోగులు కాగా.. మిగిలిన వారు పొరుగుసేవల కార్మికులు. ప్రమాద సమయంలో క్రేన్‌ కేబిన్‌లో 15 మంది ఉన్నట్లు అక్కడి సిబ్బంది పేర్కొన్నారు. ఘటనాస్థలం వద్ద కార్మికుల బంధువుల రోదనలు మిన్నంటాయి. మృతుల వివరాలు తెలియక హెచ్ఎస్ఎల్‌ ప్రధాన ద్వారం వద్ద బంధువులు ఆవేదన పడుతున్నారు.

వారంతా క్షేమంగా ఉండాలి: చంద్రబాబు
విశాఖ హిందూస్థాన్‌ షిప్‌ యార్డులో జరిగిన ప్రమాదం బాధాకరమని తెలుగు దేశం పార్టీ అధినేత చంద్రబాబునాయుడు ఆవేదన వ్యక్తం చేశారు. ప్రమాద సమయంలో 30 మంది వరకు ఉన్నారంటున్నారని పేర్కొన్నారు. వారంతా క్షేమంగా ఉండాలని భగవంతుణ్ని ప్రార్థిస్తున్నట్లు తెలిపారు.

ప్రమాదంపై లోకేష్ దిగ్భ్రాంతి
విశాఖ హిందూస్థాన్‌ షిప్‌ యార్డు ప్రమాదంపై టీడీపీ జాతీయ ప్రధాన కార్యదర్శి, ఎమ్మెల్సీ నారా లోకేష్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. క్షతగాత్రులకు మెరుగైన వైద్యం అందించాలని విజ్ఞప్తి చేశారు. మృతుల కుటుంబాలను ప్రభుత్వం ఆదుకోవాలని కోరారు.



Source link

Leave a Reply

Your email address will not be published. Required fields are marked *