coriander for skin: కొత్తిమీరతో మీ అందం రెట్టింపు.. ఈ 4 టిప్స్ పాటించండి – 4 ways to use coriander for beautiful skin


కొత్తిమీరను తింటేనే కాదండోయ్.. శరీరానికి పూసుకున్నా సరే ఆరోగ్యమే. జీర్ణక్రియ సక్రమంగా జరిగేందుకు కొత్తిమీర ఎలా ఉపయోగపడుతుందో.. అందాన్ని పెంపొందించేందుకు అంతకంటే రెట్టింపు తోడ్పడుతుంది. కొత్తిమీర, దనియాల్లో ఉండే యాంటీ బ్యాక్టిరియల్‌, యాంటీ సెప్టిక్‌ గుణాలు ముఖానికి రక్షణ కల్పిస్తాయి. ముడతలను పొగొట్టడంతోపాటు చర్మం మరింత కాంతివంతంగా కనిపించేందుకు కొత్తిమీర ఉపయోగపడుతుంది. ఇందుకు ఈ కింది టిప్స్‌ను పాటించండి.

పెదవుల కోసం..: వేసవిలో పెదవులు ఆరిపోతూ ఉంటాయి. వాటిని తడి చేస్తూ ఉండటం వల్ల పొడిగా మారి పొరలు (మృతకణాలు) ఏర్పడతాయి. ఆ సమస్య లేకుండా ఉండాలంటే.. కొత్తిమీర పేస్టును పెదాలకు రాయండి. కొత్తిమీర పేస్టునులో కాస్త నిమ్మ రసం వేయండి. రెండిటినీ బాగా కలపండి. ఆ మిశ్రమాన్ని మీ పెదవులకు పూయండి. ఇలా రోజూ చేస్తుంటే.. మీ పెదాలు అందంగా మారిపోతాయి.

చర్మంపై ముడతలు పోవాలంటే..: చాలామంది చిన్నవయస్సులోనే వృద్ధాప్య ఛాయలు వచ్చేస్తాయి. చర్మం ముడతలు పడి పెద్ద వయస్సు వ్యక్తుల్లా కనిపిస్తారు. ఇలాంటి సమస్యతో బాధపడేవారు ఈ చిట్కా పాటించండి. కొత్తిమీరను బాగా పేస్ట్ చేయండి. అందులో కాస్త కలబంద గుజ్జును కలపండి. ఆ పేస్టుకు ముఖానికి రాసుకోండి. 15 నుంచి 20 నిమిషాలు తర్వాత నీళ్లతో కడిగేసుకోండి. కొత్తిమీరలో ఉండే విటమిన్-A చర్మాన్ని తేమగా ఉంచుతుంది. ఫలితంగా చర్మం ముడతలు పడకుండా తాజాగా ఉంటుంది. వారంలో కనీసం రెండు, మూడు సార్లు ఈ చిట్కా పాటిస్తే ముఖం కాంతివంతంగా మారుతుంది.

మృతకణాలు పోవాలంటే..: చర్మంపై మృతకణాలు వయస్సును పెంచేసి ముఖాన్ని నిర్జీవంగా మార్చేస్తాయి. ఈ సమస్య నుంచి గట్టెక్కాలంటే.. దనియాల పొడిని ఉపయోగించండి. కొత్తిమీరలో ఉన్న సుగుణాలే దనియాల్లో కూడా ఉంటాయి. కాబట్టి.. దనియాలను పొడిగా చేసి.. కాస్త నీటిని కలిపి పేస్టులా చేసుకోండి. వీటిలో కొన్ని ఓట్స్, గుడ్డు తెల్లసొన కలిపి ముఖానికి పూసుకోండి. తర్వాత గోరువెచ్చని నీటితో నెమ్మదిగా ముఖాన్ని కడగండి. లేదా ఏదైనా గుడ్డను వెచ్చని నీటిలో ముంచి ముఖాన్ని శుభ్రం చేసుకోండి. ఇలా రోజూ చేస్తే తప్పకుండా మంచి ఫలితం కనిపిస్తుంది.

చర్మం ఆరోగ్యంగా, కాంతివంతంగా ఉండాలంటే..: కాలుష్యం వల్ల చర్మంపై ఎన్నో మలినాలు పేరుకుపోతాయి. వాటిని తొలగించకపోతే.. క్రమేనా చర్మాన్ని నాశనం చేస్తాయి. ఇవి చర్మ క్యాన్సర్లకు కూడా దారితీసే ప్రమాదం ఉంది. మీ చర్మం నిత్యం కాంతివంతంగా.. ఆరోగ్యంగా ఉండాలంటే.. ఈ టిప్ పాటించండి. కొత్తిమీరను పేస్టులా చేసుకుని.. అందులో టమోటా గుజ్జు, ముల్తానీ మట్టి, నిమ్మరసం కలపండి. అనంతరం ఆ మిశ్రమాన్ని కళ్లకు తగలకుండా ముఖానికి రాసుకోండి. 15 నిమిషాల తర్వాత శుభ్రంగా కడిగేయండి. వారంలో రెండు, మూడు సార్లు ఇలా చేస్తే మంచి ఫలితాలు కనిపిస్తాయి.



Source link

Leave a Reply

Your email address will not be published. Required fields are marked *