Coronavirus cases in India : దేశవ్యాప్తంగా 6వేలకు చేరువలో కోవిడ్ కేసులు.. 180 మంది మృతి – coronavirus cases rise to 5916 and 180 died in across country


దేశంలో కరోనా వైరస్ మహమ్మారి సామూహిక దశలోకి ప్రవేశించిందని, ఈ సమయంలో మరింత అప్రమత్తంగా ఉండాలని నిపుణులు హెచ్చరిస్తున్నారు. వైరస్ నియంత్రణలో భాగంగా విధించిన 21 రోజుల లాక్‌డౌన్ ఏప్రిల్ 14తో ముగియనుండగా.. దీనిని ఇప్పుడే ఎత్తివేయడానికి కేంద్రం సముఖం లేదనే సంకేతాలు వెలువడుతున్నాయి. బుధవారం విపక్ష సభ్యులతో నిర్వహించిన వీడియో కాన్ఫరెన్స్‌లో ప్రధాని నరేంద్ర మోదీ ఇదే అభిప్రాయం వ్యక్తం చేసినట్టు తెలుస్తోంది. ప్రజల ప్రాణాలే తమకు ముఖ్యమని, అందుకే కఠిన నిర్ణయాలు తీసుకున్నామని మోదీ పునరుద్ఘాటించారు. వైరస్ వేగాన్ని నియంత్రించి, ప్రజలను కాపాడటమే ప్రభుత్వం ముందున్న ప్రస్తుత లక్ష్యం. అలాగే, పలు రాష్ట్రాలు సైతం లాక్‌డౌన్ కొనసాగించాలని కోరుతున్నాయి. ఈ నేపథ్యంలో లాక్‌డౌన్ పొడిగింపునకే మోదీ మొగ్గుచూపుతున్నట్టు తెలుస్తోంది.


కాగా, ప్రస్తుతం దేశంలో కోవిడ్-19 మహమ్మారి విజృంభిస్తోంది. గడచిన 8 రోజుల నుంచి పాజిటివ్ కేసుల సంఖ్య రోజుకు సగటున 500 వరకు నమోదవుతున్నాయి. బుధవారం దేశవ్యాప్తంగా మరో 600పైగా కేసులు నమోదయ్యాయి. మహారాష్ట్రలోనూ కరోనా మహమ్మారి శరవేగంగా విస్తరిస్తోంది. ఒక్క ఆ రాష్ట్రంలోనే కేసుల సంఖ్య 1,100 దాటింది. బుధవారం మరో 115 కేసులు నమోదు కావడంతో మొత్తం 1,135 మంది వైరస్ బారినపడ్డారు. గడచిన 24 గంటల్లో మహమ్మారి కారణంగా మరో 15 మంది ప్రాణాలు కోల్పోయారు. దేశవ్యాప్తంగా ఇప్పటి వరకు 5,916 పాజిటివ్ కేసులు నిర్ధారణ కాగా.. 180 మంది ప్రాణాలు కోల్పోయారు. మరో 565 మంది కోలుకుని ఇళ్లకు వెళ్లారు.

తెలుగు రాష్ట్రాల్లోనూ కరోనా వైరస్ ఉద్ధృతంగా ఉంది. బుధవారం ఆంధ్రప్రదేశ్‌లో 34, తెలంగాణలో 49 కొత్త కేసులు నమోదయ్యాయి. దీంతో మొత్తం కరోనా కేసులు ఏపీలో 348, తెలంగాణలో 453కి చేరుకున్నాయి. ఏపీలో 9 మంది, తెలంగాణలో 43 మంది కోలుకుని ఇంటికి వెళ్లారు. అలాగే రెండు రాష్ట్రాల్లో మొత్తం 15 మంది ప్రాణాలు కోల్పోయారు. తెలంగాణలో కొత్తగా మరో 49 కరోనా వైరస్‌ కేసులు నమోదయ్యాయి. దీంతో బుధవారం నాటికి కరోనా బాధితుల సంఖ్య 453కు పెరిగింది. ఇప్పటి వరకూ రాష్ట్రంలో కరోనా వైరస్‌ బారిన పడి 11 మంది మృతిచెందగా.. 45 మంది పూర్తిగా కోలుకొని ఆసుపత్రుల నుంచి డిశ్ఛార్జి అయ్యారు. ప్రస్తుతం వేర్వేరు ఆసుపత్రుల్లో 397 మంది చికిత్స పొందుతున్నారు.

ఆంధ్రప్రదేశ్‌లో మంగళవారం రాత్రి 10 గంటల నుంచి బుధవారం రాత్రి 7 గంటల వరకు ఎనిమిది జిల్లాల్లో కొత్త కేసులు నమోదయ్యాయి. గుంటూరు 8, అనంతపురం 7, కృష్ణా 6, నెల్లూరు 5, ప్రకాశం 3, చిత్తూరు 3, కర్నూలు 1, పశ్చిమగోదావరి 1 చొప్పున కొత్త కేసులు నిర్ధారణ అయ్యాయి. దీంతో రాష్ట్రంలోని మొత్తం కరోనా పాజిటివ్‌ కేసుల్లో దాదాపు సగం కర్నూలు, గుంటూరు, నెల్లూరు జిల్లాల్లోనే ఉన్నాయి. నెల్లూరు జిల్లాలో బుధవారం ముగ్గురు చిన్నారులకు పాజిటివ్‌గా నిర్ధారణ అయింది. తడకు చెందిన ఓ వ్యక్తి ఇప్పటికే ఐసోలేషన్‌లో చికిత్స పొందుతుండగా, ఆయన పిల్లలిద్దరికి కరోనా సోకింది. వాకాడులో మరో పదేళ్ల పాపకూ వ్యాధి సంక్రమించింది.

ఇప్పటి వరకూ దేశవ్యాప్తంగా 180 మృతిచెందగా… అత్యధికంగా మహారాష్ట్రలో 72 మంది ప్రాణాలు కోల్పోయారు. తర్వాత స్థానాల్లో మధ్యప్రదేశ్ 24, గుజరాత్ 16, తెలంగాణ 11, ఢిల్లీ 9, పంజాబ్ 8, తమిళనాడు 8, కర్ణాటక 5, ఆంధ్రప్రదేశ్ 4, యూపీ, జమ్మూ కశ్మీర్; పశ్చిమ్ బెంగాల్‌లో మగ్గురేసి, రాజస్థాన్, కేరళ, హర్యానా, హిమాచల్‌ప్రదేశ్‌లో ఇద్దరు చొప్పున, మిగతా చోట్ల ఒక్కొక్కరు మృతిచెందారు.

మహారాష్ట్రలో 1135, తమిళనాడు 738, ఢిల్లీ 669, తెలంగాణ 454, రాజస్థాన్ 383, కేరళ 345, ఉత్తరప్రదేశ్ 361, ఆంధ్రప్రదేశ్ 348, మధ్యప్రదేశ్ 341, గుజరాత్ 186, కర్ణాటక 181, హర్యానా 167, జమ్మూ కశ్మీర్ 158, పంజాబ్ 106 పశ్చిమ్ బెంగాల్ 99, ఒడిశా 42, బీహార్ 39, ఉత్తరాఖండ్ 35, అసోం 28, హిమాచల్‌ప్రదేశ్ 27, చండీగఢ్ 18, లడఖ్ 14, అండమాన్, చత్తీస్‌గఢ్‌లో 11 మందికి కరోనా వైరస్ నిర్ధారణ అయ్యింది. మిగతా రాష్ట్రాల్లో 10లోపు కేసులు నమోదయ్యాయి.

ఇక, తొలి పరీక్షలో నెగిటివ్‌ వచ్చినంత మాత్రాన వారిలో పూర్తిస్థాయిలో వైరస్‌ లేదని చెప్పలేమని, 4 నుంచి 14 రోజుల్లో వైరస్‌ ఛాయలను పరీక్షల్లో గుర్తించడం సాధ్యమవుతుందని వైద్యనిపుణులు చెబుతున్నారు. అందుకే నెగిటివ్‌ అని నిర్ధారించినా కూడా.. కరోనా బాధితులతో సన్నిహితంగా ఉన్న వారందరినీ ఇళ్లలోనే స్వీయ నిర్బంధ పరిశీలనలో ఉండాలని వైద్యులు సూచిస్తున్నారు.





Source link

Leave a Reply

Your email address will not be published. Required fields are marked *