coronavirus deaths in US : కరోనా మరణాల్లో స్పెయిన్‌ను దాటేసిన అమెరికా.. 11 మంది భారతీయులు మృతి – more than 14,700 dies due to coronavirus and 11 indians die in us, 16 more test positive


అగ్రరాజ్యం అమెరికాలో కరోనా వైరస్ మహమ్మారి విలయతాండవం చేస్తోంది. అక్కడ మహమ్మారి బారినపడి వేలాది ప్రాణాలు కోల్పోతున్నారు. ఇప్పటికే కరోనా వైరస్ బాధితుల సంఖ్య 4.35 లక్షలు దాటింది. మృతుల సంఖ్య 14,795కు చేరుకుంది. ఇక, కరోనా బారినపడి 11 మంది భారతీయులు ప్రాణాలు కోల్పోయారు. మరో 16 మందికి కోవిడ్-19 పాజిటివ్‌గా తేలింది. కోవిడ్‌తో చనిపోయిన భారతీయులంతా పురుషులేనని, వారిలో 10 మంది న్యూయార్క్, న్యూజెర్సీ ప్రాంతాలకు చెందిన వారని తెలుస్తోంది. వీరిలో నలుగురు న్యూయార్క్‌లో ట్యాక్సీ డ్రైవర్లని అధికారులు తెలిపారు.


అమెరికాలో సంభవిస్తున్న మరణాల్లో అత్యధిక శాతం న్యూయార్క్‌లోనే నమోదవుతున్నాయి. ఇక్కడ దాదాపు 6 వేల మంది మృతి చెందారు. 1.38 లక్షల మంది బాధితులుగా మారారు. న్యూజెర్సీలో 1500 మంది చనిపోగా, 48 వేల కేసులు నమోదయ్యాయి. వైరస్ బారినపడి ఫ్లోరిడాలో ఓ భారతీయుడు ప్రాణాలు కోల్పోయాడు. కరోనా వైరస్ బారిన పడిన 16 మంది భారతీయులు (వీరిలో నలుగురు మహిళలు) స్వీయ నిర్బంధంలో ఉన్నట్టు అధికారులు పేర్కొన్నారు. వీరిలో 8 మంది న్యూయార్క్‌, ముగ్గురు న్యూజెర్సీ, మిగిలిన వారు టెక్సాస్, కాలిఫోర్నియాకు చెందిన వారు ఉన్నారు.

కరోనా బాధితులు ఉత్తరాఖండ్, మహారాష్ట్ర, కర్ణాటక, ఉత్తరప్రదేశ్‌కు చెందినవారుగా అధికారులు గుర్తించారు. వీరికీ సహాయం అందజేయడానికి ఇండియన్ రాయబార కార్యాలయాల అధికారులు ముందుకొచ్చారు. స్థానిక అధికారులు, ఇండియన్-అమెరికన్ సంస్థలతో సంప్రదింపులు జరుపుతున్నారు.

మరోవైపు, అమెరికాలో కరోనా వైరస్‌ మరణమృదంగం కొనసాగుతోంది. మరణాల సంఖ్య రోజురోజుకు రికార్డు స్థాయిలో పెరుగుతోంది. దేశవ్యాప్తంగా బుధవారం ఒక్కరోజే అత్యధికంగా 1,973 మంది ప్రాణాలు కోల్పోయారు. ముందు రోజు కూడా 1,939మంది మృత్యువాతపడ్డారు. దీంతో అమెరికాలో కరోనా వైరస్ బారినపడి మరణించినవారి సంఖ్య 14,795కి చేరింది. అమెరికాలో మొత్తం కొవిడ్ బాధితుల సంఖ్య 4,35,128కి చేరింది. దీంతో ప్రపంచంలోనే కరోనా తీవ్రత అధికంగా ఉన్న దేశంగా అమెరికా నిలిచింది. ఇక్కడ కరోనా మరణాల సంఖ్య స్పెయిన్‌ను దాటేసింది. ఇటలీకి చేరువలో ఉంది.





Source link

Leave a Reply

Your email address will not be published. Required fields are marked *