coronavirus in china : చైనాలో మళ్లీ పెరుగుతున్న కరోనా కేసులు.. 1,100 దాటిన బాధితులు – coronavirus cases rise in china to 1,100 with 63 new infections on wednesday


చైనాలోని హుబే ప్రావిన్సులు వుహాన్ నగరంలో తొలిసారిగా వెలుగుచూసిన ప్రాణాంతక కొత్తరకం కరోనా వైరస్ ఇటీవల నియంత్రణలోకి వచ్చింది. దీంతో, వైరస్ కట్టడికి విధించిన ఆంక్షలను ఎత్తివేశారు. వుహాన్ నగరంలో 76 రోజుల తర్వాత అక్కడ ప్రజలు స్వేచ్ఛా వాయువులు పీల్చుకున్నారు. ఇదిలా ఉండగా మళ్లీ అక్కడ మహమ్మారి కోరలు చాస్తోంది. తాజాగా చైనాలో 63 కొత్త కేసులు నమోదు కావడంతో ఆందోళన వ్యక్తమవుతున్నాయి. మరో ఇద్దరు వ్యక్తులు కరోనాతో మృతి చెందినట్టు చైనా జాతీయ ఆరోగ్య కమిషన్ ప్రకటించింది. నమోదైన 63 కేసుల్లో 61 మంది విదేశాల నుంచి వచ్చినవారే.


అయితే, మళ్లీ కేసులు నమోదవుతుండడంతో అధికారులు అప్రమత్తమయ్యారు. వైరస్ మరింత విస్తరించకుండా గట్టి చర్యలు తీసుకుంటున్నారు. చైనాలో మొత్తం కరోనా వైరస్ కేసుల సంఖ్య 81,865గా నమోదయ్యింది. అలాగే, 3,335 మంది ప్రాణాలు కోల్పోయారు. జనవరి నుంచి దాదాపు మూడు నెలల పాటు వైరస్‌తో యుద్ధం చేసిన చైనా.. ప్రస్తుతం సాధారణ స్థితికి చేరుకుంది. అయితే, తమ దేశంలో స్థానికంగా వైరస్ కేసులు నమోదుకాలేదని, విదేశాల నుంచి వచ్చినవారికే కోవిడ్-19 నిర్ధారణ అయినట్టు గత మూడు వారాలుగా చైనా ప్రకటిస్తూ వస్తోంది.

కానీ, గత మూడు రోజుల నుంచి స్థానిక కేసులు కూడా నమోదుకావడంతో ఆందోళన చెందుతున్నారు. మంగళవారం 56 కోవిడ్ కేసులు నమోదు కాగా, వీరిలో 28 మంది విదేశాల నుంచి వచ్చినవారు ఉన్నట్టు వెల్లడించింది. విదేశాల నుంచి వచ్చినవారిలో ఇప్పటి వరకు మొత్తం 1,104 మందికి వైరస్ సోకిందని తెలిపారు. వీరిలో 374 మంది కోలుకుని ఇళ్లకు వెళ్లగా, మరో 729 మంది చికిత్స పొందుతున్నారు. ఇందులో 31 మంది పరిస్థితి విషమంగా ఉంది. మరో 73 మందిలో అనుమానిత లక్షణాలు ఉన్నాయని తెలియజేశారు.

వుహాన్‌లోని సముద్ర ఉత్పత్తుల మార్కెట్‌లో పనిచేసే ఓ వ్యక్తిలో కరోనా వైరస్ లక్షణాలు తొలిసారి డిసెంబరు 1నే గుర్తించారు. అతడిలో వైరస్ లక్షణాలు బయటపడిని ఐదు రోజుల తర్వాత ఆయన భార్య కూడా అనారోగ్యానికి గురయ్యింది. వీరిలో న్యుమోనియా లక్షణాలు బయటపడటంతో హాస్పిటల్‌కు తరలించి ఐసోలేషన్‌లో ఉంచారు. కొత్తరకం వైరస్ వీరికి సోకినట్టు గుర్తించిన వుహాన్ వైద్యులు.. ఇది జంతువుల నుంచి మనుషులకు వ్యాపించినట్టు నిర్ధారించారు. అయితే, ఈ విషయం డిసెంబరు రెండో వారం వరకూ బయట ప్రపంచానికి చైనా తెలియనీయలేదు. హాంకాంగ్‌, థాయ్‌లాండ్‌లో కరోనా వైరస్ కేసులు నిర్ధారణ అయినంత వరకూ ఇది ఓ అంటువ్యాధి అనేది వెల్లడించలేదు.





Source link

Leave a Reply

Your email address will not be published. Required fields are marked *