Coronavirus in USA : అమెరికాలో కరోనా కల్లోలం: 5వేలు దాటిన మృతులు.. 2.15 లక్షల మందికి వైరస్ – coronavirus cases rise to 2.15 lakhs and deaths pass 5,000 in us


కరోనా వైరస్‌ మహమ్మారి దెబ్బకు అగ్రరాజ్యం అమెరికా చిగురుటాకులా వణుకుతోంది. రోజు రోజుకు కొత్త కేసులతోపాటు మృతుల సంఖ్య భారీగా పెరుగుతోంది. రోజుకు సగటున 20వేల మందికిపైగా ఈ మహమ్మారి బారినపడుతున్నారు. బుధవారం ఒక్కరోజే అత్యధికంగా 884మంది కరోనా కాటుకు బలయ్యారు. దీంతో కరోనా వైరస్‌తో మరణించిన వారిసంఖ్య 5,093కు చేరింది. దేశంలో ఇప్పటి వరకూ 2.15 లక్షల మందికి వైరస్ సోకినట్టు అధ్యక్షుడు డొనాల్డ్‌ ట్రంప్‌ వెల్లడించారు. ప్రపంచంలోనే అత్యధిక కరోనా కేసులు అమెరికాలో నమోదయ్యాయి.


అమెరికాలో రోజురోజుకు పెరుగుతున్న కరోనా వైరస్ కేసులు, మరణాలు తనను తీవ్రంగా కలచివేస్తోందని ట్రంప్‌ ఆందోళన వ్యక్తం చేశారు. గతంలో ఎన్నడూ అమెరికన్లు ఇలాంటి పరిస్థితిని చూడలేదని, ఇదేపరిస్థితి మరో రెండు వారాలు కొనసాగే అవకాశం ఉందని ఆయన వ్యాఖ్యానించారు. అయితే ఈ భయంకరమైన వైరస్‌పై పోరు కొనసాగుతుందని ట్రంప్‌ స్పష్టం చేశారు. వైరస్‌‌ను నియంత్రణ చర్యల్లో భాగంగా లాక్‌డౌన్‌ విధించినా మరణాల సంఖ్య భారీగానే ఉంటుందని కరోనాపై ఏర్పాటుచేసిన ప్రత్యేక టాస్క్‌ఫోర్స్‌ అంచనా వేసింది. దీన్ని ఇప్పటికిప్పుడు నివారించేందుకు తమవద్ద ఎటువంటి ఔషధం అందుబాటులో లేదని తెలిపింది. దీనికి ఏకైక నివారణ వ్యాక్సిన్‌ అని, ప్రస్తుతం వీటి తయారీ ప్రాథమిక దశలోనే ఉందని స్పష్టం చేసింది. దీనికోసం మరో ఏడాది వరకు ఆగాల్సిందేనని అధికారులు అభిప్రాయపడ్డారు.

మరోవైపు, పూర్తిస్థాయిలో లాక్‌డౌన్‌ ప్రకటించడానికి అమెరికా అధ్యక్షుడు డొనాల్డ్‌ ట్రంప్‌ మరోసారి నిరాకరించారు. వైరస్‌ తీవ్రత ఎక్కువగా ఉన్న ఆయా రాష్ట్రాలు లాక్‌డౌన్‌పై నిర్ణయం తీసుకుంటున్నాయని అగ్రరాజ్యాధినేత స్పష్టం చేశారు. అయినప్పటికీ దేశవ్యాప్తంగా 30కోట్ల మంది ఇళ్లకే పరిమితమయ్యారు. ప్రభుత్వం తీసుకున్న చర్యలు, ముందస్తు ఆంక్షలు ఏప్రిల్‌ 30వరకు కొనసాగనున్నాయి. 30రోజులపాటు సామాజిక దూరాన్ని పాటించడం ద్వారా కరోనా వైరస్‌ తీవ్రత తగ్గించవచ్చని అధ్యక్షుడు ట్రంప్‌ సూచించారు.

వారం రోజుల్లోనే 1,80,000పైగా కేసులు బయటపడ్డాయి. ప్రజలు మరింత అప్రమత్తంగా ఉండకపోతే కరోనా వైరస్‌తో దాదాపు 200,000 మంది బలవుతారని, మరణించిన తమ ప్రియమైనవారికి కుటుంబసభ్యులు ఆసుపత్రి కిటికీల నుంచి వీడ్కోలు పలికే పరిస్థితి వస్తుందని యుఎస్ నేషనల్ ఇన్‌స్టిట్యూట్ ఆఫ్ అలర్జీ అండ్ ఇన్‌ఫక్టియస్ డిసీజెస్ డైరక్టర్ డాక్టర్ ఆంథోనీ ఫ్యూసీ హెచ్చరించారు. మిలియన్ల కొద్దీ అమెరికన్లు వైరస్‌ బారినపడే ప్రమాదం ఉందని తెలిపారు. ఫెడరల్ గైడ్‌లైన్స్‌ను పొడిగించడంతో తాము గొప్ప పనిచేస్తున్నామనే అవివేకంతో వ్యవహరించవద్దని అప్రమత్తం చేశారు.





Source link

Leave a Reply

Your email address will not be published. Required fields are marked *