coronavirus world updates : కరోనా వైరస్: 20 లక్షలకు చేరిన బాధితులు.. లక్షా 26 వేల మంది బలి – globally nearly 20 lakhs are infected and over 126,600 have died due to coronavirus


కంటికి కనిపించని మహమ్మారి కరోనాతో ప్రపంచ దేశాలు పోరాడుతున్నాయి. చైనాలో మొదలైన కరోనా వైరస్.. ప్రస్తుతం ప్రపంచ మొత్తాన్ని తన గుప్పిట్లోకి తెచ్చుకుని విలయతాండవం చేస్తోంది. రోజు రోజుకూ మహమ్మారి అడ్డూ అదుపూ లేకుండా విజృంభిస్తోంది. ప్రపంచవ్యాప్తంగా ఈ వైరస్‌ సోకిన వారి సంఖ్య తాజాగా 20 లక్షలకు చేరింది. మృతుల సంఖ్య 1.26 లక్షలు దాటింది. స్పెయిన్, ఇటలీ, ఫ్రాన్స్, అమెరికాలో వైరస్‌ వ్యాప్తి కొంత తెరిపినిచ్చింది. ఇదే సమయంలో రష్యాలో దీని వేగం పుంజుకుంది.


అమెరికాలో మొత్తం కేసుల సంఖ్య 6.13 లక్షలకు చేరుకోగా..గడచిన 24 గంటల్లో 24,895 మంది కొత్తగా వైరస్‌ బారిన పడ్డారు. అయితే, కరోనాపై పోరులో తాము పురోగతి సాధిస్తున్నామని అమెరికా అధ్యక్షుడు డొనాల్డ్‌ ట్రంప్‌ పేర్కొన్నారు. వైరస్‌ వ్యాప్తిని కట్టడి చేయడానికి తాము చేపడుతున్న చర్యలు సత్ఫలితాలనిస్తున్నాయని చెప్పారు. న్యూయార్క్‌, న్యూజెర్సీ, మిషిగన్‌, లూసియానాల్లో కొత్త కేసుల సంఖ్య క్రమంగా తగ్గుతున్న సంగతిని గుర్తుచేశారు. కరోనాకు సంబంధించి అత్యంత గడ్డు పరిస్థితులు ఇప్పటికే ముగిసిపోయాయని న్యూయార్క్‌ గవర్నర్‌ ఆండ్రూ క్యూమో వ్యాఖ్యానించారు. అమెరికాలో ఇప్పటి వరకూ 26,047 మంది ప్రాణాలు కోల్పోయారు.

మృతుల సంఖ్య ఇటలీలో 21వేలు, స్పెయిన్‌లో 18 వేలు దాటింది. ఇటలీలో మంగళవారం దాదాపు 600 మంది, స్పెయిన్‌లో 567 మంది చనిపోయారు. అయితే, కొత్త కేసులు తగ్గడం మాత్రం సానుకూలాంశం. ఫ్రాన్స్‌లోనూ కోవిడ్ మరణాలు 16వేలకు చేరువలో ఉంది. బ్రిటన్‌లోనూ మహమ్మారి దెబ్బకు 12వేలకుపైగా మరణాలు చోటుచేసుకున్నాయి. ఇరాన్‌లో మాత్రం వైరస్ మరణాలు గత నెల రోజులతో పోల్చితే మంగళవారం తగ్గాయి. ఇరాన్‌లో కొవిడ్‌ తీవ్రతకు మంగళవారం 98 మంది మృత్యువాతపడ్డారు. గత నెల రోజుల్లో ఆ దేశంలో మృతుల సంఖ్య 100 కంటే తక్కువగా నమోదు కావడం ఇదే తొలిసారి.ఇప్పటి వరకూ అక్కడ 4,683 మంది ప్రాణాలు కోల్పోయారు.

రష్యాలో మంగళవారం 2,500కుపైగా కేసులు నమోదయ్యాయి. దీంతో ఆ దేశంలో కరోనా కేసుల సంఖ్య 21వేలకు చేరకుంది. మొత్తం 170 మంది చనిపోయారు. ఇక, బ్రిటన్‌లోని వృద్ధాశ్రమాలు, ఇతర సంరక్షణ కేంద్రాల్లో గత రెండు వారాల్లోనే 237 మంది కరోనా సోకి మరణించడం ఆందోళన కలిగిస్తోంది.

అటు జర్మనీలో కేసుల సంఖ్య ఎక్కువగా ఉన్నా.. మరణాలు మాత్రం తక్కువే నమోదవుతున్నాయి. ప్రాణనష్టం తక్కువగా ఉండటానికి జర్మనీ ప్రభుత్వం తీసుకున్న ముందస్తు చర్యలే కారణం. జర్మనీలో ఇప్పటి వరకూ 3,495 మంది చనిపోయారు. స్వీడన్‌లో కరోనా బాధితుల సంఖ్య 11,445కు, మృతుల సంఖ్య 1,033కు పెరిగింది. మరోవైపు, రష్యాతో ఉన్న ఉత్తర సరిహద్దు ప్రాంతంలో వైరస్‌ విజృంభిస్తుండటం చైనాను కలవరపెడుతోంది. హెయిలాంగ్‌జాంగ్‌ ప్రావిన్స్‌, పొరుగునున్న ఇన్నర్‌ మంగోలియాకు మధ్య సరిహద్దుల్లో పెద్దగా నిఘా ఉండదు. అక్కడ రాకపోకలు విస్తృతంగా సాగుతుంటాయి. ఆ ప్రాంతంలో వైరస్‌ కేసులు పెరుగుతున్నాయి.

అమెరికాలో అత్యధికగా కరోనా కేసులు 613,886, స్పెయిన్‌లో 174,060, ఇటలీలో 162,488, ఫ్రాన్స్ 143,303, జర్మనీ 132,210, బ్రిటన్ 93,873, చైనా 82,295, ఇరాన్ 74,877, టర్కీ 65,111, బెల్జియం 31,119, నెదర్లాండ్ 27,419, కెనడా 27,063, స్విట్జర్లాండ్ 25,939, బ్రెజిల్ 25,262, పోర్చుగల్ 17,448 మంది వైరస్ బారినపడ్డారు. బెల్జియం 4,157, నెదర్లాండ్‌లో 2,945, బ్రెజిల్ 1,532, స్విట్జర్లాండ్ 1,174, టర్కీ 1,403, పోర్చుగల్ 567 మంది మృత్యువాతపడ్డారు. ఇప్పటి వరకూ ప్రపంచవ్యాప్తంగా 478,659 మంది కోలుకున్నారు. మరో 51,608 మంది పరిస్థితి విషమంగా ఉంది.





Source link

Leave a Reply

Your email address will not be published. Required fields are marked *