cyclone amphan effect: అంఫన్ తుఫాన్ బీభత్సం.. 5500 ఇళ్లు నేలమట్టం, పలువురి మృతి – cyclone amphan: heavy rain, high speed winds lash bengal, odisha


కోల్‌కతా సమీపంలో తీరం దాటిన సూపర్ సైక్లోన్ అంఫన్ పశ్చిమ బెంగాల్, ఒడిశా రాష్ట్రాల్లో బీభత్సం చేస్తోంది. తుఫాన్ తీరం దాటిన సమయంలో గంటకు 160 కి.మీల వేగంతో భీకర గాలులు వీశాయి. దీంతో బెంగాల్‌లో 5500 ఇళ్లు నేలమట్టమయ్యాయి. భారీ వృక్షాలు వేర్లతో సహా లేచి రోడ్లకు అడ్డంగా పడ్డాయి. అంఫన్ తుఫాన్ కారణంగా పశ్చిమ బెంగాల్‌లో ఇద్దరు మరణించారు. బంగ్లాదేశ్‌లోనూ పలువురు మరణించినట్లు తెలుస్తోంది. బెంగాల్‌లో 5 లక్షల మందిని, ఒడిశాలో 1.5 లక్షల మందిని సురక్షిత ప్రాంతాలకు తరలించడంతో ప్రాణ నష్టం తప్పింది. తుఫాన్ ప్రభావిత ప్రాంతాల్లో ప్రస్తుతం భారీ వర్షాలు కురుస్తున్నాయి. తీర ప్రాంతం అల్లకల్లోలంగా మారింది.

అంఫన్ తుఫాన్ తీరం దాటే ప్రక్రియ నాలుగు గంటల పాటు కొనసాగింది. బుధవారం (మే 20) రాత్రి 7 గంటల కల్లా పూర్తిగా తీరం దాటిందని వాతావరణ శాఖ అధికారులు తెలిపారు. మధ్యాహ్నం 2.30 గంటల నుంచి తీరం దాటే ప్రక్రియ ప్రారంభమైంది. బెంగాల్‌ – బంగ్లాదేశ్‌ మధ్య సుందర్బన్‌ సమీపంలో ఈ అతి తీవ్ర తుఫాన్ తీరం దాటినట్టు వాతావరణ శాఖ ప్రకటించింది. తుఫాన్ తీరం దాటిన తర్వాత గంటకు 110 కి.మీ. నుంచి 120 కి.మీ. వేగంతో గాలులు వీచినట్లు అధికారులు తెలిపారు.

samayam telugu

భారత్‌లో రెండో సూపర్ సైక్లోన్‌గా అంఫన్‌ను పేర్కొంటున్నారు. 1999 తర్వాత ఈ స్థాయి తీవ్రత తుఫాన్ సంభవించడం ఇదే తొలిసారి. పశ్చిమ బెంగాల్‌పై అంఫన్ తుఫాన్ ప్రభావం తీవ్రంగా ఉంది. ప్రచండ గాలుల ధాటికి పెద్ద పెద్ద చెట్లు, విద్యుత్‌, టెలిఫోన్‌ స్తంభాలు నేలకూలాయి. వృక్షాలు కార్లపై పడటంతో పలు వాహనాలు ధ్వంసమయ్యాయి. పలు ప్రాంతాల్లో రోడ్లు బీటలు వారాయి. హుగ్లీ, హావ్‌డా, ఉత్తర పరగణాస్, దక్షిణ 24 పరగణాస్‌, తూర్పు మిడ్నాపూర్‌ జిల్లాలపై తుఫాన్ ప్రభావం ఎక్కువగా ఉంది.

అంఫన్ తుఫాన్ నేపథ్యంలో పశ్చిమ బెంగాల్, ఒడిషా రాష్ట్రాల్లో హై అలర్ట్‌ కొనసాగుతోంది. తుపాను సహాయక చర్యల కోసం 41 ఎన్‌డీఆర్‌ఎఫ్ బృందాలను రంగంలోకి దించారు. 6.5 లక్షల మందిని సురక్షిత ప్రాంతాలకు తరలించారు. లాక్‌డౌన్ అనంతరం తెరిచిన మార్కెట్లను మూసేశారు. ప్రత్యేక రైళ్లను రద్దు చేశారు. ఒడిశాలో పూరీ జిల్లాలోని హరిదాస్‌పూర్‌, కకట్‌పూర్‌లలో భారీ వర్షాలకు రోడ్లపై కూలిన చెట్లను ఎన్డీఆర్‌ఎఫ్‌ సిబ్బంది తొలగించారు.

అంఫన్ తుఫాన్ తీరం దాటిన తర్వాత ఉత్తర ఈశాన్యం దిశగా కోల్‌కతా వైపు పయనించినట్టు అధికారులు తెలిపారు. సూపర్ సైక్లోన్ ప్రభావంతో వీచిన భీకర గాలులు కోల్‌కతాలో బీభత్సం సృష్టించాయి. పెద్ద ఎత్తున నష్టం వాటిల్లినట్లు తెలుస్తోంది. అంఫన్ తుఫాన్‌పై తమ అంచనాలు నిజమైనట్టు వాతావరణ శాఖ చీఫ్‌ మృత్యుంజయ మహాపాత్ర తెలిపారు. బంగ్లాదేశ్ వైపు వెళ్లిన తర్వాత తీవ్ర వాయు గుండంగా బలహీనపడుతుందని చెప్పారు. బంగ్లాదేశ్‌కు తుఫాన్ హెచ్చరికలు జారీ చేశారు.

Also Read:తెలంగాణలో కరోనాతో మరో ఇద్దరి మృతి, 1661కి చేరిన కేసులు

Must Read:చైనా మోసం: అక్టోబర్‌లోనే కరోనా వ్యాప్తి.. షాకింగ్ అంశం తెరపైకి!



Source link

Leave a Reply

Your email address will not be published. Required fields are marked *