Darren Sammy: ఐపీఎల్‌లో జాతి వివక్ష వ్యాఖ్యలు.. నల్లోడా అని పిలిచారు: సామీ – former west indies captain darren sammy faced racism in ipl..?


జాతి వివక్షపై ప్రపంచవ్యాప్తంగా నిరసనలు వెల్లువెత్తుతున్నాయి. అమెరికాలో నల్లజాతీయుడు జార్జ్ ఫ్లాయిడ్ ఇటీవల ఓ పోలీసు అధికారి హేయమైన చర్య కారణంగా మృతి చెందడంతో.. జాతి వివక్షకి వ్యతిరేకంగా అన్ని రంగాలకి చెందిన ప్రముఖులు గళం వినిపిస్తున్నారు. భారత దిగ్గజ క్రికెటర్ సచిన్ టెండూల్కర్.. క్రికెట్‌లో జాతి వివక్షకి తావులేదని ఐసీసీ షేర్ చేసిన వీడియోని అభిమానులతో పంచుకుంటూ.. నెల్సన్ మండేలా వ్యాఖ్యల్ని గుర్తుచేశాడు. ‘‘ప్రపంచాన్ని మార్చే శక్తి స్పోర్ట్స్‌కి ఉంది.. ఆటలు అందరినీ ఏకం చేయగలవు’’ అని అప్పట్లో మండేలా వ్యాఖ్యానించాడు. కానీ.. ఐపీఎల్ సమయంలో తనపై భారత్ అభిమానులు ఓసారి జాతి వివక్ష వ్యాఖ్యలు చేసినట్లు తాజాగా వెస్టిండీస్ మాజీ కెప్టెన్ డారెన్ సామీ వెల్లడించాడు. అదీ సన్‌రైజర్స్ హైదరాబాద్ టీమ్ తరఫున ఆడేటప్పుడు ఆ ఘటన జరిగిందని అతను చెప్పడం ప్రాధాన్యత సంతరించుకుంది.

ఐపీఎల్ 2013, 2014 సీజన్లలో సన్‌రైజర్స్ హైదరాబాద్ తరఫున డారెన్ సామీ మ్యాచ్‌లు ఆడాడు. ఈ సమయంలో తనతో పాటు శ్రీలంక క్రికెటర్ తిసార పెరీరా‌ని కూడా జాతి వివక్ష వ్యాఖ్యలతో అభిమానులు అవమానించినట్లు సామీ వెల్లడించాడు. మ్యాచ్ చూసేందుకు వచ్చిన అభిమానులు స్టేడియంలో నుంచి బిగ్గరగా ‘కాలు’ అని పిలిచినట్లు తాజాగా డారెన్ సామీ వెల్లడించాడు. అప్పట్లో ఆ పదానికి అర్థం ‘నల్లోడా’ అని తనకి తెలియదని చెప్పుకొచ్చిన సామీ.. పెరీరాని కూడా అలానే పిలిచారన్నాడు.

ఐపీఎల్‌లో సాధారణంగా ప్రతి జట్టూ లీగ్ దశలో ఏడు మ్యాచ్‌ల్ని సొంతగడ్డపై.. మిగిలిన ఏడు మ్యాచ్‌ల్ని ప్రత్యర్థి టీమ్ సొంత మైదానాల్లో ఆడుతుంది. ఈ లెక్కన సన్‌రైజర్స్ టీమ్.. హైదరాబాద్‌లోని ఉప్పల్ స్టేడియంలో సగం మ్యాచ్‌లను ఆడి ఉంటుంది. ఆ సమయంలో ఈ వివక్ష వ్యాఖ్యలు చేశారా..? అనేదానిపై స్పష్టత రావడం లేదు.



Source link

Leave a Reply

Your email address will not be published. Required fields are marked *