David Warner: బ్యాట్ కొనలేని పేదరికం.. రాత్రి 3 గంటల వరకు పని చేసి స్కూల్‌కు.. వార్నర్ ప్రస్థానం ఇదీ! – srh captain and australian cricketer david warner faced tough period in childhood


ఆస్ట్రేలియా స్టార్ క్రికెటర్ డేవిడ్ వార్నర్ పుట్టిన రోజు నేడు (అక్టోబర్ 27). ఐపీఎల్‌లో సన్‌రైజర్స్ హైదరాబాద్ కెప్టెన్‌గా వ్యవహరిస్తోన్న వార్నర్.. అద్భుత ఆటతీరుతో.. అంతకు మించిన వ్యక్తిత్తంతో మనలో ఒకడిలా కలిసిపోయాడు. టాలీవుడ్ పాటలకు స్టెప్పులేస్తూ.. సినీ అభిమానులకు సైతం వార్నర్ దగ్గరయ్యాడు. ఐపీఎల్‌లో అత్యధిక హాఫ్ సెంచరీలు చేసిన ఆటగాడిగా రికార్డ్ సొంతం చేసుకున్న వార్నర్.. ఇండియన్ ప్రీమియర్ లీగ్‌లో 5000కిపైగా పరుగులు చేసిన తొలి విదేశీ ఆటగాడిగా రికార్డ్ క్రియేట్ చేశాడు.

ఆస్ట్రేలియా కంటే ఎక్కువగా భారత్‌లో ఫ్యాన్ ఫాలోయింగ్ సంపాదించుకున్న వార్నర్.. స్టార్ డమ్‌ను సొంతం చేసుకున్నాడు. కానీ చిన్నతనంలో పేదరికంలో పెరిగిన వార్నర్ ఎన్నో కష్టాలను ఎదుర్కొన్నాడు. వార్నర్ పదేళ్ల వయసులో మాట్రవిల్లేలోని హౌసింగ్ కమిషన్ ఫ్లాట్‌లో నివసించే వారు. వార్నర్‌కు బ్యాట్ కొనుగోలు చేయడానికి సైతం అతడి తల్లిదండ్రుల దగ్గర సరిపడా డబ్బులు ఉండేవి కావు.
అంతకు ముందే వార్నర్ అన్నయ్య స్టీవ్‌కు తండ్రి మంచి బ్యాట్ కొనిస్తే విరగ్గొట్టాడు. దీంతో వార్నర్‌కు మామూలు బ్యాట్ కొనిచ్చిన తండ్రి.. ఈ బ్యాట్‌ను సొంత బిడ్డలా జాగ్రత్తగా చూసుకో.. విరగొట్టకు అని చెప్పాడు. ఆ బ్యాట్ విరిగిపోతే మరో బ్యాట్ కొనుగోలు చేయడానికి స్థోమత లేదని అర్థమైన వార్నర్.. దాన్ని ఎంతో జాగ్రత్తగా వాడుకున్నాడు. స్కూల్‌లో ఎవరైనా దాన్ని విరగ్గొట్టే అవకాశం ఉండటంతో.. వార్నర్ ఎవరికీ బ్యాట్‌ను ఇచ్చేవాడు కాదు.

వార్నర్‌ది రెక్కాడితేగానీ డొక్కాడని కుటుంబం. చిన్నతనంలో బొమ్మలు కావాలి, అది కొనివ్వు అని వార్నర్ తల్లిదండ్రులను అడిగేవాడు. కానీ వారికి కొనిచ్చే స్థోమత లేదని అర్థమయ్యాక అడగటం మానేశాడు. పేదరికంలో పెరిగాడు కాబట్టే.. ఐపీఎల్ కోసం హైదరాబాద్ వచ్చినప్పుడు.. తన పిల్లలు చిరు వ్యాపారులతోనూ కలిసిపోయేలా వార్నర్ ప్రోత్సహిస్తుంటాడు.

వార్నర్‌ కొద్దిగా పెద్దవాడయ్యాక.. రాత్రి 3 గంటల వరకు పని చేసి.. ఉదయాన్నే ఏడు గంటలకు స్కూల్‌కు వెళ్లేవాడు. వారాంతాల్లో పేపర్ డెలివరీ బాయ్‌గా పని చేస్తూ.. స్కూల్ క్యాంప్‌లు, ఈస్టర్ షో ట్రిప్‌లకు వెళ్లడానికి డబ్బు సంపాదించేవాడు. ప్రతి క్రిస్మస్ రోజున తల్లిదండ్రులకు ఓ గిఫ్ట్ ఇచ్చేవాడు.

13 ఏళ్ల వయసులో వార్నర్ బ్యాటింగ్ చేస్తున్నప్పుడు పదే పదే బంతిని గాల్లోకి లేపేవాడు. దీంతో కోచ్ అతణ్ని కుడి చేతి వాటానికి మారమనేవాడు. కానీ అతడి తల్లి మాత్రం లెఫ్ట్ హ్యాండర్‌గానే కొనసాగమని సలహా ఇచ్చింది. తల్లి సలహానే పాటించిన వార్నర్.. 1877 తర్వాత ఫస్ట్ క్లాస్ క్రికెట్ ఆడకుండానే.. అంతర్జాతీయ క్రికెట్లోకి అడుగుపెట్టిన తొలి ఆస్ట్రేలియా క్రికెటర్‌గా రికార్డ్ క్రియేట్ చేశాడు. ఆ తర్వాత ఏం జరిగిందో అందరికీ తెలిసిందే.



Source link

Leave a Reply

Your email address will not be published. Required fields are marked *