Dilal Mohammed Alias Saleha: తల్లడిల్లుతున్న తల్లి ప్రాణం.. కూతురి ఆచూకీ కోసం 39 ఏళ్లుగా పడిగాపులు – hyderabad women waiting for her daughter in kuwait from 39 years


ఒకటికాదు రెండుకాదు.. ఏకంగా 39 సంవత్సరాలుగా ఓ తల్లి తన కూతురికోసం ఎదురుచూస్తూనే ఉంది. హైదరాబాద్‌కు చెందిన సయేదా ఫాతిమా బేగం కువైట్‌లో ఉన్న తన కూతురు వివరాల కోసం పడరానిపాట్లు పడుతోంది. సాధ్యమైనన్ని మార్గాల్లో పయనించినప్పటికీ కూతురు దిలాల్ మహ్మద్ అలియాస్ సలేహా ఆచూకీ మాత్రం లభించలేదు. చివరి ప్రయత్నంగా విదేశీ వ్యవహారాలశాఖ మంత్రి సుష్మాస్వరాజ్‌కు అభ్యర్థనగా ఓ వీడియోను షేర్ చేసింది. ఆ వీడియోలో ‘నేను చనిపోకముందే నా కూతురిని చూడాలనుకుంటున్నాను’ అంటూ భావోద్వేగంతో తన కూతురి కోసం అభ్యర్థించింది. సోమవారం (ఫిబ్రవరి 25) కువైట్‌లోని ఇండియన్ ఎంబస్సీని కూడా సంప్రదించింది. ఈ మేరకు కూతురు సలేహాను గుర్తించడానికి అవసరమైన డాక్యుమెంట్లను పంపింది. వాటిని సామాజికవేత్త అమ్జత్ ఉల్లాఖాన్ ద్వారా పొందినట్లు ఇండియన్ ఎంబస్సీ ధ్రువీకరించింది.

హైదరాబాద్ చాంద్రయణగుట్టకు చెందిన ఫాతిమా బేగమ్, కువైట్ జాతీయుడైన మహ్మద్ హిజాబ్ అలాజ్మీని 1978లో హైదరాబాద్‌లో వివాహమాడింది. అనంతరం వారు కువైట్‌కు వెళ్లారు. ఫాతీమా గర్భవతిగా ఉన్నప్పుడు భర్త అలాజ్మీ ఆమెను భారత్‌కు పంపించాడు. తర్వాత వచ్చి కువైట్ తీసుకెళ్తానని చెప్పాడు. 1979లో ఫాతిమా సలేహాకు జన్మినిచ్చింది. కూతర్ని చూడ్డానికి కూడా భర్త అలాజ్మీ రాలేదు. ఆమె రాసిన ఉత్తరాలకు కూడా సమాధానం ఇవ్వలేదు. దీంతో కువైట్‌లోని ఇండియన్ ఎంబస్సీకీ తన భర్త ఆచూకీ కోసం దరఖాస్తు చేసుకుంది.

అయితే.. అసలు విషయం ఏంటంటే.. ఫాతిమా భర్త అలాజ్మీ సౌదీ అరేబియాలోని దమమ్‌లో జరిగిన రోడ్డు ప్రమాదంలో ప్రాణాలు కోల్పోయినట్లు తెలిసింది. ఆ తర్వాత అలాజ్మీ మొదటి భార్య కుమారుడు 1980లో భారత్‌కు వచ్చి ఫాతిమాను, సలేహాను కువైట్ తీసుకెళ్లాడు. అప్పటికి సలేహా వయసు ఏడాది మాత్రమే. కువైట్ వెళ్లాకా ఫాతిమా పరిస్థితి మరింత దయనీయంగా మారింది. అలాజ్మీ మరణంతో వచ్చే ప్రయోజనాలు అన్నీ కూడా మొదటి భార్య కుటుంబమే పొందింది.

కువైట్‌లో ఉండలేక.. ఇండియా రాలేక.. తీవ్ర మానసిక వ్యధతో పలుమార్లు ఆత్మహత్యకు కూడా ప్రయత్నించినట్లు ఫాతిమా వెల్లడించింది. దీంతో 1981లో అలాజ్మీ కొడుకు తనను ఇండియాకు తీసుకొచ్చి.. ముంబయి ఎయిర్‌పోర్టులో వదిలేసి పోయాడని.. తన కూతురు సలేహా మాత్రం అక్కడే ఉండిపోయిందని తెలిపింది. కొందరి సాయంతో ముంబయి నుంచి హైదరాబాద్ చేరుకున్నట్లు గతం తాలుకు అనుభవాలను నెమరువేసుకుంది.

ఫాతిమా 1987లో మరోసారి కువైట్ వెళ్లిన ఫాతిమా.. కూతురు కోసం ఎంతగా వెతికినా ప్రయోజనం లేకపోయింది. అక్కడ స్థిరపడిన భారతీయుడ్ని వివాహం చేసుకుంది. ఆ తర్వాత 1991 కువైట్-ఇరాక్ యుద్ధ సమయంలో తిరిగి భారత్‌కు చేరుకుంది. అప్పటి నుంచి హైదరాబాద్‌లో నివాసముంటూనే.. కూతరి ఆచూకీ కోసం ప్రయత్నాలు సాగిస్తోంది. భారత ప్రభుత్వ అండతో సాధ్యమైనంత త్వరగా ఆమె తన కూతుర్ని కలుసుకోవాలని ఆశిద్దాం..



Source link

Leave a Reply

Your email address will not be published. Required fields are marked *