doctor sudhakar: విశాఖ డాక్టర్ కేసులో ట్విస్ట్.. ఆస్పత్రి నుంచి సుధాకర్ డిశ్చార్జ్, కానీ! – vizag doctor sudhakar discharged from hospital


విశాఖ డాక్టర్ సుధాకర్ కేసు కీలక మలుపులు తిరుగుతోంది. ఓవైపు ఈ కేసును సీబీఐ దర్యాప్తు చేస్తుండగా.. మరోవైపు సుధాకర్‌ ఆస్పత్రి నుంచి డిశ్చార్జ్ అయ్యారు. కోర్టు ఆదేశాలు అందిన తర్వాత డాక్టర్‌ సుధాకర్‌ ఆస్పత్రి సూపరింటెండెంట్‌కు లేఖ రాశారని.. వీటి ఆధారంగా డిశ్ఛార్జి చేసినట్లు ఆస్పత్రి వర్గాలు తెలిపాయి. కోర్టు తీర్పు కాపీలను ఆస్పత్రి అధికారులకు అందించిన సుధాకర్ తల్లి కావేరి బాయి, బంధువు విజయ్కుమార్, తెలుగు మహిళ అధ్యక్షురాలు వంగలపూడి అనితలు ఆయన్ను బయటకు తీసుకువచ్చారు. సుధాకర్కు కొన్నాళ్లు ప్రైవేటు ఆస్పత్రిలో ఉంచి ట్రీట్మెంట్ అందించనున్నట్లు తెలుస్తోంది. డాక్టర్‌ సుధాకర్‌కు చికిత్స కొనసాగాల్సిన అవసరం ఉందని, వేరే ఆసుపత్రిలోనైనా చేర్పించాలని, మందులు తప్పనిసరిగా వాడేలా చూడాలని కుటుంబసభ్యులకు డాక్టర్లు సలహా ఇచ్చారు.

డాక్టర్ సుధాకర్ తల్లి కావేరిబాయి గురువారం హైకోర్టులో హెబియస్‌ కార్పస్‌ పిటిషన్‌ దాఖలు చేశారు. సుధాకర్‌ను అక్రమంగా కస్టడీలోకి తీసుకున్నారని.. 24 గంటల్లో డాక్టర్ ఆయనను కోర్టులో ప్రవేశపెట్టాలంటూ పిటిషన్‌‌ వేశారు. సుధాకర్ తల్లి దాఖలు చేసిన హెబియస్ కార్పస్ పిటిషన్‌పై శుక్రవారం హైకోర్టు విచారణ జరిపింది. మానసిక ఆస్పత్రి సూపరింటెండెంట్‌కు తెలిపి.. అనుమతితో సుధాకర్ డిశ్చార్జ్ కావొచ్చని హైకోర్టు సూచించింది. అయితే సీబీఐ విచారణకు సహకరించాలని సుధాకర్‌ను ఆదేశించింది.

గత నెల 16న డాక్టర్ సుధాకర్‌ను విశాఖ పోలీసులు అరెస్ట్ చేసిన సంగతి తెలిసిందే. సుధాకర్‌ మానసిక పరిస్థితి సరిగా లేదని కేజీహెచ్‌ వైద్యులు చెప్పడంతో.. పోలీసులు ప్రభుత్వ మెంటల్ ఆస్పత్రికి తరలించారు. అయితే డాక్టర్ సుధాకర్‌ విషయంలో విశాఖ పోలీసులు వ్యవహరించిన తీరుపై వీడియోలతో ఏపీ టీడీపీ రాష్ట్ర మహిళా అధ్యక్షురాలు వంగలపూడి అనిత హైకోర్టుకు లేఖ రాశారు. దీంతో కోర్టు ఈ లేఖను సుమోటో పిల్‌గా పరిగణించి విచారణ జరిపింది. అలాగే మరో వ్యక్తి పిటిషన్ దాఖలు చేశారు.

విశాఖ మెంటల్ ఆస్పత్రిలో చికిత్సపొందుతున్నట్లు ప్రభుత్వం కోర్టులో కౌంటర్ దాఖలు చేసింది. దీంతో కోర్టు కీలక ఉత్తర్వులు జారీ చేసింది. సుధాకర్‌ చికిత్సపొందుతున్న ఆస్పత్రికి వెళ్లి వాంగ్మూలం నమోదు చేయాలని విశాఖ సెషన్స్‌ జడ్జిని ఆదేశించింది. గురువారం సాయంత్రంలోగా వాంగ్మూలాన్ని హైకోర్టుకు సమర్పించాలని సూచించింది. తర్వాత సుధాకర్ స్టేట్మెంట్ పరిశీలించి.. ఈ కేసును సీబీఐకి అప్పగించింది.

డాక్టర్ సుధాకర్ విశాఖ జిల్లా నర్సీపట్నం ప్రభుత్వ ఆస్పత్రిలో పనిచేస్తున్నాడు. కరోనా సమయంలో ఆస్పత్రిలో మాస్కులు, పీపీఈ కిట్లు లేవంటూ ఆరోపించారు. ఆ తర్వాత ప్రభుత్వం ఆయన్ను సస్పెండ్ చేసింది.. ఈ నిర్ణయంపై విపక్షాల నుంచి విమర్శలు వచ్చాయి. సుధాకర్‌పై సస్పెన్షన్ ఎత్తేయాలని డిమాండ్ చేశారు. ఆ తర్వాత కొద్దిరోజులు ఆయన కనిపించ లేదు. మళ్లీ గత నెల 16న విశాఖలో ప్రత్యక్షమయ్యారు.



Source link

Leave a Reply

Your email address will not be published. Required fields are marked *