Donald Trump: ఒబామా ఓ అసమర్ధ అధ్యక్షుడు.. అంతకన్నా ఏం చెప్పలేను: ట్రంప్ సంచలన వ్యాఖ్యలు – us president donald trump sensational comments on former president barack obama


అమెరికాలో అప్పుడే అధ్యక్ష ఎన్నికల వేడి రాజుకుంది. ప్రపంచంలోనే అత్యధికంగా కరోనా వైరస్ కేసులు, మరణాలు అమెరికాలోనే చోటుచేసుకుంటున్నాయి. ఈ విషయంలో ప్రస్తుతం అధ్యక్షుడు సక్రమంగా వ్యవహరించలేదంటూ మాజీ అధ్యక్షుడు బరాక్ ఒబామా పరోక్షంగా చేసిన వ్యాఖ్యలకు డొనాల్డ్ ట్రంప్ కౌంటర్ ఇచ్చారు. మరోసారి తన తెంపరితనాన్ని ప్రదర్శించిన అమెరికా అధ్యక్షుడు.. ఒబామాపై తీవ్ర వ్యాఖ్యలు చేశారు. ఒబామా పెద్ద అసమర్థ నాయకుడని ట్రంప్‌ దుయ్యబట్టారు.

శనివారం అమెరికాలోని చరిత్రాత్మక విద్యాసంస్థల గ్రాడ్యుయేషన్‌ వార్షికోత్సవంలో ఒబామా మాట్లాడుతూ.. కరోనా వైరస్‌ కట్టడిపై స్పందించారు. ట్రంప్‌ పేరు ప్రస్తావించకుండా, ఆయనను ఉద్దేశించి పరోక్ష వ్యాఖ్యలు చేశాడు. ఇదే అంశాన్ని మీడియా సమావేశంలో ట్రంప్‌ను ప్రశ్నించగా.. ‘ఒబామా ఒక అసమర్థ అధ్యక్షుడు.. పూర్తిగా అసమర్ధ అధ్యక్షుడు.. ఆయన గురించి అంతకన్నా ఏం చెప్పలేను’ అని తీవ్రంగా స్పందించారు.

ట్రంప్‌ చేసిన వ్యాఖ్యలకు ఒబామా కార్యాలయం నుంచి ఇప్పటికీ ఎలాంటి స్పందన లేదు. అధ్యక్ష బాధ్యతలు నుంచి తప్పుకున్న తర్వాత ఒబామా సాధారణ జీవితానికి అలవాటు పడ్డారు. చాలా అరుదుగా మీడియా సమావేశాల్లో మాట్లాడుతున్నారు. శనివారం జరిగిన కార్యక్రమంలో ాయన మాట్లాడుతూ.. కరోనా మహమ్మారిని ఎదుర్కొనే క్రమంలో ట్రంప్‌ సర్కార్‌ విఫలమైందని విమర్శించారు. ఈ మహమ్మారి ప్రజల జీవితాలను సర్వ నాశనం చేసిందని, అంతా తలకిందులైందని చెప్పారు.

దీనికి ముందు పది రోజుల కిందట ఇలాంటి వ్యాఖ్యలే చేశారు. కొవిడ్‌-19ను ట్రంప్‌ ఎదుర్కొన్న తీరును ‘కచ్చితమైన గందరగోళ విపత్తు’గా ఒబామా‌‌ అభివర్ణించారు. తన అల్యుమినీ అసోసియేషన్‌లోని మూడు వేల మంది సభ్యులతో మాట్లాడిన ఒబామా.. డెమొక్రాట్ అభ్యర్థి జో బిడెన్‌కు మద్దతివ్వాలని పిలుపునిచ్చారు.

గత శతాబ్దంలో ఎన్నడూ లేనివిధంగా అత్యంత ఘోరమైన సంక్షోభం ఎదుర్కొంటుంటే, మార్గనిర్దేశం చేయడంలో విఫలమయ్యారని, నాయకత్వ పాత్ర నుంచి తప్పుకున్నారని విమర్శించారు. మహమ్మారి కట్టిడికి అవసరమైన వైద్య పరికరాలు లభించక రాష్ట్రాలు ఇబ్బందులు ఎదుర్కొంటున్నాయని విమర్శించారు.

స్వార్థం, ఆటవికత, విభజన, ఇతరులను శత్రువులగా చూడటం వంటి పోకడలు ప్రస్తుతం అమెరికన్ల జీవితాల్లో భాగమయ్యాయి. అంతర్జాతీయంగానూ ఇదే తీరు కొనసాగుతోంది. ఈ పరిణామాల వల్లే తాజా సంక్షోభాన్ని ఎదుర్కోవడంలో ప్రపంచ దేశాలు చాలా పేలవంగా స్పందిస్తున్నాయి’ అని ఒబామా అభిప్రాయపడ్డారు.

మరోవైపు, అమెరికాలో వైరస్‌ ఉద్ధృతి కొనసాగుతూనే ఉంది. ఇప్పటివరకు బాధితుల సంఖ్య 15.27 లక్షలు దాటింది. గడచిన 24 గంటల్లో 18 వేలకుపైగా కొత్త కేసులు నమోదయ్యాయి. మొత్తం మృతుల సంఖ్య 90,981కి చేరువైంది. ప్రపంచంలోనే అత్యధిక కరోనా కేసులు, మరణాలు నమోదైన దేశంగా అగ్రరాజ్యం కొనసాగుతోంది.



Source link

Leave a Reply

Your email address will not be published. Required fields are marked *