Donald Trump: చైనాతో వాణిజ్య ఒప్పందంపై ట్రంప్ సంచలన వ్యాఖ్యలు.. నెక్స్ట్ ఏంటి? – us president donald trump once again targeted china and sensational comments on trade deal


కరోనా వైరస్ కారణంగా అమెరికా, చైనాల మధ్య కుదిరిన వాణిజ్య ఒప్పందంపై నీలినీడలు కమ్ముకున్నాయి. రెండేళ్లుగా సాగుతున్న వాణిజ్య యుద్ధానికి తెరదించుతూ ఈ ఏడాది జనవరిలో చరిత్రాత్మక ఒప్పందంపై చైనా, అమెరికాలు సంతకాలు చేశాయి. అయితే, కరోనా పుణ్యమా అని ఈ ఆనందం అంతలోనే ఆవిరయ్యేలా ఉంది. తాజాగా, అమెరికా అధ్యక్షుడు మరోసారి వాణిజ్య ఒప్పందంపై చేసిన వ్యాఖ్యలే ఇందుకు నిదర్శనం. చైనాతో కుదిరిన తొలి దశ వాణిజ్య ఒప్పందంపై అప్పట్లో సంతోషం వ్యక్తం చేసిన తాను ఇప్పుడు అభిప్రాయాన్ని మార్చుకున్నట్లు డొనాల్డ్ ట్రంప్‌ వ్యాఖ్యానించారు. వైరస్ వ్యాప్తి విషయంలో చైనా తీరు తనను తీవ్ర నిరుత్సాహానికి గురిచేస్తోందని ఆయన పునరుద్ఘాటించారు.

ఈ సందర్భంగా చైనాపై విమర్శలు ఎక్కుపెట్టిన ట్రంప్.. పలు ప్రశ్నలు కూడా సంధించారు. ఒక్కసారి వైరస్‌ వ్యాపించిన తర్వాత తాను చాలా నిరాశకు గురయ్యానని. మూడు నెలల క్రితం కుదిరిన ఒప్పందంపై నా అభిప్రాయం ఇప్పుడు భిన్నంగా ఉందన్నారు. అసలు వైరస్‌ ఇతర ప్రాంతాలకు వ్యాపించే వరకు ఏం చేశారు? చైనాలోని ఇతర ప్రాంతాలకు ఎందుకు వ్యాపించలేదు? వుహాన్‌ దాటకుండా ఎలా నిలువరించగలిగారు? అమెరికా సహా ఇతర ప్రపంచ దేశాలకు సంక్రమించకుండా మాత్రం ఆపలేకపోయారు.. అలా ఎందుకు జరిగింది? బీజింగ్‌ సహా ఆ దేశంలోని ఇతర ప్రాంతాల్లో వైరస్‌ ప్రభావం లేదు? అంటూ చైనా తీరుపై ట్రంప్‌ పలు అనుమానాలు వ్యక్తం చేశారు. అయితే, చైనాపై చర్యలు తీసుకుంటారా అన్న ప్రశ్నకు మాత్రం ట్రంప్ సమాధానం దాటవేశారు.

ఇదిలా ఉండగా.. కరోనా వైరస్‌ సంక్షోభం తర్వాత చైనాతో మరింత కఠినంగా వ్యవహరించాల్సిందేనని అమెరికా కాంగ్రెస్‌ ప్రతినిధులు ఒత్తిడి పెంచుతున్నారు. కరోనా గురించి సమాచారాన్ని దాచిపెట్టడం ద్వారా వైరస్‌ను ప్రపంచ దేశాలపైకి చైనా ఎగదోసిందని.. తద్వారా ఒక్క అమెరికాలోనే 93 వేల మందికిపైగా ప్రాణాలు కోల్పోయారని ఆరోపించారు. మొత్తం 3.5 కోట్ల మంది ఉపాధికి దూరమయ్యారని సెనేటర్ మర్థా మెక్సల్లే మండిపడ్డారు. ఇప్పటి వరకు తొలిసారి వైరస్‌ బారినపడ్డ వ్యక్తి ఎవరో కూడా తెలియదని.. వైద్యులు, జర్నలిస్టుల నోళ్లు మూయించడం ద్వారా సమాచారాన్ని తొక్కిపెడుతున్నారని ాయన ఆరోపించారు.

చైనా అమెరికా మధ్య మొదటి దశ వాణిజ్య ఒప్పందంపై జనవరిలో ఇరు దేశాధినేతలు సంతకం చేశారు. ఈ ఒప్పందం ప్రకారం ఏటా 370 బిలియన్ డాలర్ల విలువైన చైనా వస్తువుల దిగుమతులపై 25 శాతం వరకు సుంకం అమలవుతోంది. చైనా ఎగుమతి చేసే కొన్ని రకాల వస్తువులపై సుంకాలను తగ్గింపు ప్రతిపాదన కూడా ఇందులో ఉంది. ప్రస్తుత పరిస్థితుల్లో ఈ ప్రతిపాదనను పక్కనపెట్టి టారీఫ్‌లను ట్రంప్‌ పెంచనున్నారనే ఆందోళన వ్యక్తమవుతోంది.



Source link

Leave a Reply

Your email address will not be published. Required fields are marked *