Donald Trump : చైనాలో కరోనా మరణాలు అమెరికా కంటే ఎక్కువే ఉంటాయి.. ట్రంప్ మరోసారి విమర్శలు – us president donald trump once again slams china on virus cases “far higher” than admitted


కరోనా వైరస్ విషయంలో చైనా వాస్తవాలను దాచిపెడుతోందని, మరణాలు, కేసుల సంఖ్యలోనూ తప్పుడు వివరాలు వెల్లడిస్తోందని అంతర్జాతీయ సమాజం ముఖ్యంగా అమెరికా ఆరోపణలు గుప్పిస్తోంది. చైనా వల్లే ప్రపంచానికి ఈ దుస్థితి ఏర్పడిందని అమెరికా అధ్యక్షుడు డొనాల్డ్ ట్రంప్ పలుమార్లు దుయ్యబట్టారు. కరోనాను చైనా వైరస్‌గా ఆయన అభివర్ణిస్తూ ఎదురుదాడి చేశారు. తాజాగా, మరోసారి డ్రాగన్‌పై విమర్శలు ఎక్కుపెట్టిన అగ్రరాజ్యాధినేత.. మరణాల సంఖ్య చైనా ప్రభుత్వం చెబుతున్న దానికంటే చాలా ఎక్కువే ఉంటుందని ఆయన ఆరోపించారు.


‘కొవిడ్‌-19 మరణాల సంఖ్యను చైనా ఒక్కసారిగా రెట్టింపు చేసింది. మృతుల సంఖ్య ఇంకా చాలా ఎక్కువే… అమెరికా కంటే కూడా ఎక్కువే ఉంటుంది. మరణాల విషయంలో యూఎస్‌ వారి దరిదాపుల్లోకి కూడా వెళ్లదు’ అని ట్వీట్ చేశారు.

వుహాన్‌లో కోవిడ్‌-19 మరణాల సంఖ్యను సవరిస్తూ శుక్రవారం చైనా అధికారిక ప్రకటన విడుదల చేసిన విషయం తెలిసిందే. వైరస్ తొలిసారి వెలుగుచూసిన వుహాన్‌లో మరణాలకు దాదాపు 50 శాతం అంటే 1,290 మరణాలను అదనంగా చేర్చింది. దీంతో చైనాలో కరోనా వైరస్ కారణంగా సంభవించిన మరణాల సంఖ్య ఒకేసారి 40శాతం పెరిగి 4,632కు చేరింది. ఈ నేపథ్యంలోనే ట్రంప్‌ మరోసారి చైనాపై విరుచుకుపడ్డారు.

ఇప్పటికే, వుహాన్ ల్యాబ్‌ నుంచి ఈ వైరస్ ప్రమాదవశాత్తు లీకయ్యిందని, దీని వల్ల అమెరికాలోని 22 మిలియన్ల ఉద్యోగాలను ప్రమాదంలో పడేసింది.. 2008 మాంద్యం నుంచి కోలుకుని సృష్టించబడిన అన్ని ఉద్యోగాలను నాశనం చేస్తుందని ట్రంప్ దుయ్యబట్టారు. రోజువారీ మీడియా సమావేశంలో భాగంగా గురువారం ట్రంప్ మాట్లాడుతూ.. వుహాన్‌లోని ల్యాబ్‌లోనే వైరస్‌ను జన్యుపరంగా తయారుచేసినట్టు పలు కథలు, కథలుగా చెప్పుకుంటున్నారని, జరిగిన ఈ భయంకరమైన పరిస్థితిని తాము చాలా క్షుణ్ణంగా పరిశీలిస్తున్నామని అన్నారు.

అమెరికా సెనేటర్ల బృందం సైతం చైనాపై అంతర్జాతీయ విచారణకు సిఫార్సులు చేసింది. మిత్రదేశాలైన దక్షిణ కొరియా, జపాన్‌ సహా ఇతర ఐరోపా దేశాలతో కలిసి పనిచేయాలని కోరింది. తద్వారా విచారణ పారదర్శకంగా, విశ్వసనీయంగా సాగుతుందని సూచించింది. అంతేకాదు, వైరస్ వెలుగులోకి వచ్చిన తొలినాళ్లలో ప్రపంచ ఆరోగ్య సంస్థ నిర్ణయాధికారం విషయంలోనూ దర్యాప్తు సాగాలని సెనెటర్లు సూచనలు చేశారు. ఈ మేరకు గురువారం రిపబ్లికన్‌ సెనెటర్‌ మాక్రో రూబియో నేతృత్వంలోని ఓ బృందం ట్రంప్‌నకు ఈ సూచనలతో కూడిన నివేదికన అందజేసింది.





Source link

Leave a Reply

Your email address will not be published. Required fields are marked *