Dwayne Bravo: CSK vs DC: ఆఖరి ఓవర్ బ్రావో ఎందుకు బౌలింగ్ చేయలేదంటే..? కారణం చెప్పిన ధోనీ! – ipl 2020, 34th match: ms dhoni reveals why dwayne bravo not bowled final over against delhi capitals


షార్జా వేదికగా చెన్నై సూపర్ కింగ్స్‌తో జరిగిన మ్యాచ్‌లో ఢిల్లీ క్యాపిటల్స్ 5 వికెట్ల తేడాతో విజయం సాధించింది. చివరి ఓవర్లో ఢిల్లీ విజయానికి 17 పరుగులు అవసరం కాగా.. అక్షర్ పటేల్ మూడు సిక్స్‌లతో జట్టును గెలిపించాడు. ఆఖరి ఓవర్ డ్వేన్ బ్రావో బౌలింగ్ చేస్తాడని అందరూ భావించగా.. ధోనీ మాత్రం అనూహ్యంగా రవీంద్ర జడేజా చేతికి బంతికి అందించాడు. ఇద్దరు లెఫ్ట్ హ్యాండ్ బ్యాట్స్‌మెన్ క్రీజ్‌లో ఉండగా… ఎడమ చేతి వాటం స్పిన్నర్‌తో ఆఖరి ఓవర్ బౌలింగ్ చేయించడం అందర్నీ ఆశ్చర్యపరిచింది.

ఇలాంటి ఉత్కంఠ పరిస్థితుల్లో చివరి ఓవర్ బౌలింగ్ చేసి చెన్నైకి ఎన్నో విజయాలు అందించిన బ్రావో ఉండగా.. ఢిల్లీతో మ్యాచ్‌లో ధోనీ ఆ బాధ్యతలను జడేజాకు ఎందుకు అప్పగించాడనే ప్రశ్న కామెంటేటర్లు సహా అందరి మదిలోనూ మెదిలింది. మ్యాచ్ ముగియగానే ధోనీ ఈ విషయమై క్లారిటీ ఇచ్చాడు.

‘ఫిట్‌గా లేకపోవడంతో బ్రావో మైదానాన్ని వీడాడు. అతడు తిరిగొచ్చి బౌలింగ్ చేస్తాడని భావించలేదు. దీంతో మా ముందు రెండే ఆప్షన్లు ఉన్నాయి. ఒకటి కర్ణ్ శర్మ, రెండోది జడ్డూ. ఈ ఇద్దరిలో నేను జడేజావైపు మొగ్గు చూపాను’ అని ధోనీ తెలిపాడు.

మ్యాచ్ ముగిసిన తర్వాత ప్రెస్ కాన్ఫరెన్స్‌లో మాట్లాడిన చెన్నై సూపర్ కింగ్స్ హెడ్ కోచ్ స్టీఫెన్ ఫ్లేమింగ్.. తమ జట్టు ఆడబోయే తదుపరి కొన్ని మ్యాచ్‌లకు బ్రావో అందుబాటులో ఉండటం అనుమానమేనని ఫ్లేమింగ్ తెలిపాడు. తొడ కండరాల గాయంతో బ్రావో మైదానాన్ని వీడాడని.. తదుపరి కొన్ని మ్యాచ్‌లపాటు అతడు ఆడకపోవచ్చని ఫ్లేమింగ్ వెల్లడించాడు.

చివరి రెండు ఓవర్లలో ఢిల్లీ విజయానికి 21 పరుగులు అవసరమైన దశలో.. 19వ ఓవర్ బౌలింగ్ చేసిన సామ్ కరన్ 4 పరుగులు మాత్రమే ఇచ్చి వికెట్ పడగొట్టాడు. దీంతో ఆఖరి ఓవర్లో ఢిల్లీపై ఒత్తిడి పెరిగింది. జడేజా బదులు బ్రావో బౌలింగ్ చేసి ఉండి ఉంటే కచ్చితంగా ఫలితం మరోలా ఉండేది.



Source link

Leave a Reply

Your email address will not be published. Required fields are marked *