economic package: ఆత్మ నిర్బర్ భారత్ ప్యాకేజీ.. తుది విడతలో ఏడు రంగాలకు కేటాయింపులు – union finance minister nirmala sitharaman announces last tranche of economic package


కరోనా వైరస్ కట్టడికి విధించిన లాక్‌డౌన్ కారణంగా కుదేలయిన ఆర్ధిక వ్యవస్థను చక్కదిద్దడానికి కేంద్రం రూ.20 లక్షల కోట్ల భారీ ప్యాకేజీని ప్రకటించిన విషయం తెలిసిందే. ఆత్మ నిర్బర్ భారత్ ప్యాకేజీకి సంబంధించిన కేటాయింపులను విడతల వారీగా వెల్లడిస్తున్నారు. తాజాగా, తుది విడతకు సంబంధించి కేంద్ర ఆర్థిక శాఖ మంత్రి నిర్మలా సీతారామన్ మరిన్ని వివరాలు తెలిపారు. ఈ విడతలో మొత్తం ఏడు రంగాలకు సంబంధించిన కేటాయింపుల వివరాలు వెల్లడించారు. నరేగా, ఆరోగ్యం, విద్య, వ్యాపారం, సరళతర వాణిజ్యం, వ్యాపార మోసాల నివారణ, రాష్టాలకు ఆర్ధిక వనరులకు కేటాయింపులు ప్రకటించారు. సంక్షోభం తలెత్తింది వాస్తవమేనని, అయితే, సంక్షోభంలోనూ అవకాశాలు వెతుక్కోవాలని ఆమె వ్యాఖ్యానించారు. ప్రధాని మోదీ కూడా ఇదే విషయాన్ని స్పష్టం చేస్తున్నారని చెప్పారు.

అవసరార్థులకు నేరుగా వారి ఖాతాల్లోనే నగదు జమ చేశామని అన్నారు. భవన నిర్మాణాల రంగానికి సంబంధించి లబ్ధిదారుల ఖాతాల్లో రూ.3,955 కోట్లు జమచేసినట్టు తెలిపారు. 12 లక్షల మంది ఈపీఎఫ్‌వో ఖాతాదారులు రూ.3,600 కోట్ల నగదు వెనక్కి తీసుకునే అవకాశం కల్పించామని పేర్కొన్నారు. మూడు నెలల పాటు పేదలకు ఉజ్వల పథకం కింద సిలిండర్లు అందజేస్తున్నామని చెప్పారు. జన్‌ధన్‌కు సంబంధించి రూ.20 కోట్ల ఖాతాల్లో రూ.10 వేల కోట్లు జమ చేశామన్నారు. ఎక్కడ ఉన్నవారు అక్కడే ఉండాలని మోదీ మొదటి నుంచీ చెబుతున్నారని తెలిపారు. టెస్టింగ్ కిట్ల కోసం రూ.3,750 కోట్లు, రాష్ట్రాలకు రూ.4,150 కోట్లు వితరణ చేసినట్టు వివరించారు.

భూమి, శ్రమ, చట్టాలు ఈ మూడింట్లో సంస్కరణలకు శ్రీకారం చుట్టామని తెలిపారు. గరీబ్ కల్యాణ్ యోజన కింద పేదలకు ఆహారధాన్యాలు, పప్పు దినుసులు అందిస్తున్నామని చెప్పారు. గరీబ్‌ కల్యాణ్ యోజనలో భాగంగా వివిధ వర్గాలకు డీబీటీతో నగదు బదిలీ చేశామని చెప్పారు.

సాంకేతిక పరమైన సంస్కరణలు జరగకపోయి ఉంటే అది సాధ్యమయ్యేది కాదని వివరించారు. ఇతర రాష్ట్రాల్లో చిక్కుకున్న కార్మికులను సొంత ప్రాంతాలకు తరలించేందుకు శ్రామిక్‌ రైళ్లు నడుపుతున్నామని తెలిపారు. రైళ్లకు అయ్యే ఖర్చులు 85 శాతం కేంద్రం, 15 శాతం రాష్ట్రాలు భరిస్తున్నాయని తెలిపారు.

ఆరోగ్య రంగంలో పనిచేసేవారికి రూ.50 లక్షల బీమా సౌకర్యం కల్పించామని తెలిపారు. పీపీఈ కిట్ల విషయంలో భారత్ స్వయం సంవృద్ధి సాధించిందన్నారు. విద్యారంగంలో ఆన్‌లైన్ ఎడ్యుకేషన్‌కు మరింత ప్రోత్సాహం ఇవ్వనున్నట్టు తెలిపారు. ప్రస్తుతం ఉన్న మూడు స్వయం ప్రభ ఛానెల్స్‌కు అదనంగా 12 ఏర్పాటుచేయనున్నట్టు తెలిపారు.



Source link

Leave a Reply

Your email address will not be published. Required fields are marked *