flight for migrants: వలస కూలీల కోసం చార్టెడ్ ఫైట్.. బెంగళూరు లా స్కూల్ పూర్వ విద్యార్థుల దాతృత్వం – bengaluru law school alumni charters flight for migrant workers to reach jharkhand


స్వరాష్ట్రాలకు కాలినడక వెళ్తున్న వలస కార్మికుల కష్టాలను చూసి కొందరు చలించిపోతున్నారు. వారిని పంపేందుకు తమ వంతు సాయం చేస్తున్నారు. తాజాగా, వలస కార్మికులను వారి స్వస్థలానికి పంపేందుకు బెంగళూరు లా స్కూల్‌ పూర్వపు విద్యార్థులు ప్రత్యేక విమానం ఏర్పాటుచేశారు. ఇలా వలస కార్మికుల కోసం ప్రత్యేకంగా విమానాన్ని దాతలు ఏర్పాటుచేయడం దేశంలో ఇదే తొలిసారి అని అధికారులు తెలిపారు.

ఈ ప్రత్యేక విమానంలో ఝార్ఖండ్‌కు చెందిన 169 మంది వలస కార్మికులు, ఐదుగురు చిన్నారులు మే 28న ముంబయి నుంచి రాంచీకి చేరుకున్నారని ఎయిర్ ఆసియా సంస్థ అధికార ప్రతినిధి తెలిపారు. నేషనల్ లా స్కూల్ పూర్వపు విద్యార్థుల సంఘం.. 180 సీట్ల సామర్థ్యం గల ఏ320 విమానాన్ని అద్దెకు తీసుకుని, మొత్తం ఖర్చును వారే భరించారని పేర్కొన్నారు.

లాక్‌డౌన్ కారణంగా అనేక కష్టాలు ఎదుర్కొంటున్న వలస కార్మికులను వారి స్వస్థలాలకు తరలించడానికి చేపట్టిన కార్యక్రమంలో తామూ పాలుపంచుకున్నందుకు ఎంతో గర్వంగా ఉందని ఆయన వ్యాఖ్యానించారు. ముంబయి నుంచి రాంచీకి వలస కార్మికులను తరలించే ప్రయత్నాల్లో భాగంగా నేషనల్ లా స్కూల్ పూర్వ విద్యార్థుల సంఘం స్వంతంగా నిధులు సమకూర్చిందని, నిర్వాహకులతో తాము కలిసి పని చేస్తున్నామని వివరించింది.

ముంబయి నుంచి రాంచీలో బిర్సా ముండా విమానాశ్రయానికి చేరుకున్న వలస కార్మికులకు స్క్రీనింగ్ పరీక్షలు నిర్వహించిన తర్వాత, క్వారంటైన్ కేంద్రాలకు తరలించే ముందు ఆహారాన్ని అధికారులు అందజేశారు. తమ రాష్ట్రానికి చెందిన వలస కార్మికులను విమానంలో పంపడానికి ఏర్పాట్లు చేసిన నేషనల్ లా స్కూల్ పూర్వ విద్యార్థుల సంఘానికి ఝార్ఖండ్ ముఖ్యమంత్రి హేమంత్ సోరేన్ కృతజ్ఞతలు తెలిపారు. లాక్‌డౌన్ వేళ వలస కార్మికులను విమానం ద్వారా స్వరాష్ట్రానికి పంపడం దేశంలోనే ఇది తొలిసారని, మానవత్వంతో ఇలాంటి మంచి పనికి తొలి అడుగులు వేసిన బెంగళూరు లా స్కూల్ పూర్వ విద్యార్థుల సంఘానికి అభినందనలు అని అన్నారు.

వలస కూలీలను విమానంలో తరలించడానికి చేసిన ప్రయత్నాల్లో పాలుపంచుకున్న షయేల్ త్రెహాన్ మాట్లాడుతూ… భారీ సంక్షోభంలో చిన్న సహకారాన్ని అందించినందుకు చాలా సంతోషిస్తున్నాం. ఈ ప్రయత్నంలో తమకు సహకరించిన ఎయిర్ ఏషియాకు కృతజ్ఞతలు చెబుతున్నానని అన్నారు. ఐఐటీ బాంబే హ్యుమానిటీస్ అండ్ సోషల్ సైన్సెస్ విభాగం ప్రొఫెసర్ ప్రియా శర్మతో కలిసి నేషనల్ లా స్కూల్ పూర్వ విద్యార్థులు కలిసి పనిచేసిన ప్రయత్నం ఫలించిందన్నారు.



Source link

Leave a Reply

Your email address will not be published. Required fields are marked *