Gene Deitch Died : ‘టామ్ అండ్ జెర్రీ’ దర్శకుడు, దిగ్గజ యానిమేటర్ మృతి – legendary tom and jerry animator gene deitch has died, aged 95


ఆస్కార్ విజేత, దర్శకుడు, దిగ్గజ యానిమేటర్, ఇలస్ట్రేటర్, కామిక్ ఆర్టిస్ట్ అయిన జీన్ డీచ్ కన్నుమూశారు. చెక్ రిపబ్లిక్ రాజధాని ప్రాగ్‌లో ఏప్రిల్ 16న ఆయన తుదిశ్వాస విడిచారు. ఆయన వయసు 95 సంవత్సరాలు. ప్రపంచ వ్యాప్తంగా ప్రఖ్యాతి గడించిన యానిమేటెడ్ సిరీస్ ‘టామ్ అండ్ జెర్రీ’, ‘పొపేయే ది సైలర్’లకు డీచ్ దర్శకత్వం వహించారు. అలాగే.. మున్రో, టామ్ టెర్రిఫిక్, నుండిక్ కార్టూన్లకు డీచ్ సృష్టికర్త. ఈయన 1924 ఆగస్టు 8న అమెరికాలోని చికాగోలో జన్మించారు.


వాస్తవానికి డీచ్ పైలట్‌గా శిక్షణ తీసుకున్నారు. కానీ, ఆయనకు చిత్రలేఖనం అంటే ఆసక్తి. దీంతో మేగజైన్స్‌లో ఇలస్ట్రేటర్‌గా పనిచేయడం మొదలుపెట్టారు. ఆ తరవాత యానిమేషన్ వైపు వెళ్లారు. కెరీర్ ప్రారంభంలో యునైటెడ్ ప్రొడక్షన్స్ ఆఫ్ అమెరికా (యూపీఏ), టెర్రీటూన్స్ వంటి స్టూడియోస్‌లో డీచ్ పనిచేశారు. ఆ సమయంలో సిడ్నీ ది ఎలిఫేంట్, గాస్టన్ లే క్రేయాన్, క్లింట్ క్లాబర్ వంటి కార్టూన్ క్యారెక్టర్లను ఆయన క్రియేట్ చేశారు. 1958లో న్యూయార్క్‌లో డీచ్ సొంతంగా స్టూడియోను ప్రారంభించారు. ఈ స్టూడియో ద్వారా టెలివిజన్ కమర్షియల్స్‌పై డీచ్ ఫోకస్ చేశారు.

స్టూడియోను ప్రారంభించిన సంవత్సరం తరవాత డీచ్ 10 రోజుల విహారయాత్రకు చెకోస్లోవేకియా వెళ్లారు. అక్కడ జెంకా నజ్మనోవాతో ప్రేమలో పడ్డారు. ఆమెను పెళ్లాడి ప్రాగ్‌లో స్థిర నివాసం ఏర్పరుచుకున్నారు. డీచ్‌కు జెంకా రెండో భార్య. 1960లో ‘మున్రో’ చిత్రానికి గాను యానిమేటెడ్ షార్ట్ ఫిల్మ్ విభాగంలో అకాడమీ అవార్డు (ఆస్కార్)ను డీచ్ గెలుచుకున్నారు. ఇదే అవార్డుకు 1964లో కూడా డీచ్ నామినేట్ అయ్యారు. ఆయన రెండు చిత్రాలు ‘హియర్స్ నుండిక్’, ‘హవ్ టు అవైడ్ ఫ్రెండ్‌షిప్’ సినిమాలు ఆ ఏడాది నామినేట్ అయ్యాయి. చెకోస్లోవేకియాలో నివసిస్తున్నప్పుడే డీచ్.. ‘టామ్ అండ్ జెర్రీ’ సిరీస్‌లో 13 ఎపిసోడ్స్‌కి డైరెక్టర్‌గా పనిచేశారు. అలాగే ‘పొపేయే ది సైలర్’ సిరీస్‌లో కూడా కొన్ని ఎపిసోడ్‌లకు దర్శకత్వం వహించారు.

1969 నుంచి 2008‌లో ఆయన రిటైర్ అయ్యేంత వరకు వెస్టన్ ఉడ్స్ స్టూడియో‌స్‌లో డీచ్ పనిచేశారు. అక్కడ మొత్తం 37 సినిమాలకు ఆయన దర్శకత్వం వహించారు. యానిమేషన్ రంగంలో అందించిన విశేష సేవలకు గాను 2004లో ప్రతిష్టాత్మక విన్సర్ మెకే అవార్డ్ డీచ్‌ను వరించింది. యానిమేషన్ రంగంలో ఇచ్చే జీవితసాఫల్య పురస్కారం ఇది. చెకోస్లోవేకియాలో (ప్రస్తుత చెక్ రిపబ్లిక్‌) తన మెమరీస్ గురించి వివరిస్తూ ‘ఫర్ ది లవ్ ఆఫ్ ప్రాగ్’ అనే పుస్తకాన్ని డీచ్ రాశారు. కాగా, ఈ దిగ్గజ యానిమేటర్ మృతి పట్ల యానిమేషన్ లోకం తమ ప్రగాఢ సానుభూతిని తెలియజేసింది. ఈ సందర్భంగా డీచ్ సేవలను గుర్తుచేసుకుంది.





Source link

Leave a Reply

Your email address will not be published. Required fields are marked *