Happy Birthday Rohit Sharma: 33వ పడిలోకి రోహిత్ శర్మ.. హిట్‌మ్యాన్ నెం.1 రికార్డులివే – rohit sharma is celebrating his 33rd birthday today


భారత జట్టు సీనియర్ ఓపెనర్ రోహిత్ శర్మ గురువారం (ఏప్రిల్ 30) 33వ పుట్టినరోజు జరుపుకుంటున్నాడు. 2007లో టీమిండియాలోకి ఎంట్రీ ఇచ్చిన ఈ హిట్‌మ్యాన్.. కెరీర్ ఆరంభంలో చాలా క్లిష్ట పరిస్థితులు ఎదుర్కొన్నాడు. ఒకానొక దశలో అతని కెరీర్ ముగిసిపోయిందనే వార్తలు కూడా వచ్చాయి. కానీ.. అప్పటి కెప్టెన్ మహేంద్రసింగ్ ధోనీ.. అతడ్ని ప్రయోగాత్మకంగా ఓపెనర్‌గా పంపి క్రికెట్ ప్రపంచానికి కొత్త హిట్‌మ్యాన్‌ని పరిచయం చేశాడు. ఇప్పుడు వరల్డ్‌లోనే బెస్ట్ ఓపెనర్లలో ఒకడిగా రోహిత్ శర్మ కొనసాగుతున్నాడు.
2007లో భారత్ జట్టులోకి అరంగేట్రం చేసిన రోహిత్ శర్మ.. టెస్టుల్లోకి ఎంట్రీ ఇచ్చేందుకు ఆరేళ్లు సమయం పట్టిందంటే మీరు నమ్మగలరా..? కెరీర్ ఆరంభంలో మిడిలార్డర్‌లో బ్యాటింగ్ చేసిన ఈ హిట్‌మ్యాన్ ఆశించిన మేర రాణించలేకపోయాడు. కానీ.. ఓపెనర్‌గా మారిన తర్వాత తనలోని సిసలైన ఆటని క్రికెట్ ప్రపంచానికి పరిచయం చేశాడు. ఎంతలా అంటే..? వన్డేల్లో ఏకంగా మూడు డబుల్ సెంచరీలు బాదేశాడు. అలానే టీ20ల్లోనూ ఇప్పటికే నాలుగు సెంచరీలు నమోదు చేసిన హిట్‌మ్యాన్.. టెస్టుల్లోనూ ఓపెనర్‌గా డబుల్ సెంచరీతో రెగ్యులర్‌ ఆటగాడిగా మారిపోయాడు. మొత్తంగా.. ఇప్పుడు రోహిత్ శర్మ కెరీర్ బెస్ట్ ప్రదర్శనని కనబరుస్తున్నాడు.

భారత క్రికెట్‌లో ఫస్ట్ టీ20 సెంచరీ నమోదు చేసిన బ్యాట్స్‌మెన్ అనగానే అందరూ మనీశ్ పాండే, సురేశ్ రైనా పేర్లని చెప్తుంటారు. కానీ.. టీ20లు అభిమానులకి పెద్దగా పరిచయం లేని రోజుల్లోనే రోహిత్ శర్మ సెంచరీ బాదేశాడు. ముంబయి టీమ్ తరఫున ఆడుతూ గుజరాత్ జట్టుపై దేశవాళీ టీ20 మ్యాచ్‌లో హిట్‌హ్యాన్ ఈ ఘనత సాధించాడు. ఇక టెస్టుల్లోనూ అరంగేట్రం చేసిన సిరీస్‌లోనే బ్యాక్ టు బ్యాక్ సెంచరీలు బాదిన రోహిత్ శర్మ.. అజహారుద్దీన్ (3 సెంచరీలు) తర్వాత ఈ రికార్డులో కొనసాగుతున్నాడు.

వన్డేల్లోనూ డబుల్ సెంచరీని సిక్స్‌తో సాధించిన ఏకైక బ్యాట్స్‌మెన్‌గా రోహిత్ శర్మ కొనసాగుతున్నాడు. భారత్ తరఫున సచిన్ టెండూల్కర్, వీరేంద్ర సెహ్వాగ్ వన్డేల్లో ఒక్కో డబుల్ సెంచరీ నమోదు చేయగా.. రోహిత్ శర్మ ఏకంగా మూడు ద్విశతకాలు బాదేయడం అతని జోరుకి నిదర్శనం. ఆఖరిగా 2019 వన్డే ప్రపంచకప్‌లో ఐదు సెంచరీలు నమోదు చేసిన రోహిత్ శర్మ.. వరల్డ్‌కప్‌లో అత్యధిక శతకాలు బాదిన క్రికెటర్‌గా అరుదైన ఘనత సాధించాడు. ఏప్రిల్ 30, 1987లో రోహిత్ శర్మ జన్మించాడు. హ్యాపీ బర్త్‌డే హిట్‌మ్యాన్.



Source link

Leave a Reply

Your email address will not be published. Required fields are marked *