hyderabad doctor family : కరోనా రోగుల సేవలో దంపతులు, వారి కుమార్తె.. హైదరాబాద్‌లోని 3 కీలక ఆస్పత్రుల్లో సేవలు – couple and daughter from hyderabad doctor’s family treating covid-19 patients in gandhi, fever and chest hospital


ప్రపంచ దేశాలను వణికిస్తున్న కరోనా మహమ్మారితో వైద్యులు తమ ప్రాణాలను పణంగా పెట్టి పోరాడుతున్నారు. కరోనా రోగులకు చికిత్స అందించడంలో ఎంతో తెగువ కనబరుస్తున్నారు. ఈ క్రమంలో ఎన్నో త్యాగాలు కూడా చేస్తున్నారు. కష్టకాలంలో నిద్రాహారాలు మాని, తమ కుటుంబసభ్యుల ముఖం కూడా చూడకుండా ఆస్పత్రులకే పరిమితమై కొంత మంది డాక్టర్లు విశేష సేవ అందిస్తున్నారు. నివారణకు మందు కూడా లేని ఈ వైరస్‌తో పోరాడటం అంత సులువైన పనికాదు. ఏమాత్రం తేడా వచ్చినా వైద్యుల ప్రాణాలూ ప్రమాదంలో పడతాయి. ఇలాంటి పరిస్థితుల్లోనూ హైదరాబాద్‌కు చెందిన ఓ డాక్టర్ కుటుంబం ఆదర్శంగా నిలుస్తోంది. కుటుంబంలోని ముగ్గురూ కరోనా రోగులకు సేవ అందించడంలో నిమగ్నమయ్యారు.



హైదరాబాద్‌కు చెందిన డాక్టర్ మహబూబ్‌ఖాన్‌.. ఎర్రగడ్డలోని ఛాతీ ఆసుపత్రిలో సూపరింటెండెంట్‌గా పనిచేస్తున్నారు. ఆయన భార్య షహనాఖాన్‌ గాంధీ ఆసుపత్రిలో స్కిన్ స్పెషలిస్ట్. వీరి కుమార్తె రషిఖాఖాన్‌.. నల్లకుంటలోని ఫీవర్ ఆస్పత్రిలో హౌస్‌సర్జన్‌‌గా పనిచేస్తున్నారు. ఈ డాక్టర్ కుటుంబం గురించి ఈనాడు ఓ కథనం ప్రచురించింది. కరోనా వ్యాధి చికిత్స కోసం హైదరాబాద్‌లో ఏర్పాటు చేసిన మూడు కీలక ఆస్పత్రులలో ఈ ముగ్గురూ పనిచేస్తుండటం విశేషం.

Also Read:
మర్కజ్‌ వెళ్లొచ్చిన ఓనర్.. అద్దెకు ఉంటున్నవాళ్లు పరార్!

శ్వాసకోశ వ్యాధుల నిపుణులైన డాక్టర్ మహబూబ్‌ఖాన్‌.. ఛాతీ ఆసుపత్రిలో కరోనా బాధితులకు చికిత్సలు అందిస్తున్నారు. ఇండోనేసియా బృందానికి కీలక సేవలు అందించింది ఈయనే కావడం గమనార్హం. ఛాతీ ఆస్పత్రిలో ఈ బృందంలోని 9 మంది కరోనా మహమ్మారి నుంచి పూర్తిగా కోలుకున్నారు. ఇక మహబూబ్‌ఖాన్ భార్య షహనాఖాన్‌ గాంధీ ఆసుపత్రిలోని కరోనా వార్డ్‌లో కీలక విధులు నిర్వహిస్తున్నారు. చర్మవ్యాధి నిపుణురాలైన ఆమెకు.. క్లిష్ట సమయంలో కీలక బాధ్యతలు అప్పగించారు.

మహబూబ్‌ఖాన్, షహనాఖాన్ కుమార్తె రషిఖాఖాన్‌ కూడా వైద్యురాలే. ఈమె నల్లకుంటలోని ఫీవర్‌ ఆసుపత్రిలో విధులు నిర్వహిస్తున్నారు. కరోనా వైరస్ బారిన పడిన రోగులు, అనుమానితుల నుంచి నమూనాలు సేకరించడం తదితర విధుల్లో వైద్యులకు సహాయంగా పనిచేస్తున్నారు. కరోనా మహమ్మారిని దేశం నుంచి తరిమి కొట్టడానికి తమ వంతు పాత్ర పోషిస్తున్న ఈ వైద్య కుటుంబానికి హ్యాట్సాఫ్ చెబుదామా..

Photo Credit: Eenadu





Source link

Leave a Reply

Your email address will not be published. Required fields are marked *