india australia virtual meeting: చైనాకు చెక్ పెట్టేందుకు.. భారత్, ఆస్ట్రేలియా మధ్య కీలక ఒప్పందం – modi scott virtual summit: india, australia seal deal to use military bases for logistics support


భారత ప్రధాని నరేంద్ర మోదీ, ఆస్ట్రేలియా ప్రధాని స్కాట్ మారిసన్ గురువారం వర్చువల్ సమ్మిట్‌లో పాల్గొన్నారు. ఈ సందర్భంగా ఇరు దేశాల మధ్య ఏడు ఒప్పందాలు కుదిరాయి. మోదీ మాట్లాడుతూ.. కరోనా సంక్షోభాన్ని అవకాశంగా మలుచుకుందాం అని ఆస్ట్రేలియా ప్రధానికి పిలుపునిచ్చారు. హిందూ మహాసముద్రంలో చైనా యుద్ధ నౌకల ప్రాబల్యం ఎక్కువ అవుతున్న నేపథ్యంలో.. ఇండో-పసిఫిక్ రీజియన్‌లో కలిసి పని చేసే విషయమై ఇరు దేశాలు ఓ అవగాహనకు వచ్చాయి.

రవాణా సహాయం కోసం ఒక దేశానికి చెందిన సైనిక స్థావరాలను మరో దేశం ఉపయోగించుకోవడానికి భారత్, ఆస్ట్రేలియా అంగీకరించాయి. ఈ ప్రాంతంలో చైనా ఆర్థిక, సైనిక ప్రాబల్యం పెరుగుతున్న నేపథ్యంలో.. అమెరికాతోనూ భారత్ ఇలాంటి ఒప్పందాన్నే చేసుకుంది.

ఆస్ట్రేలియా నుంచి ఎక్కువ మొత్తంలో ఎగుమతులు చైనాకు వెళ్తున్నాయి. కానీ ఇరు దేశాల మధ్య ఇటీవలి కాలంలో వాణిజ్య ఘర్షణలు తలెత్తుతున్నాయి. చైనాలో కరోనా ఎలా పుట్టింది, వ్యాప్తి చెందిందనే విషయాన్ని సమీక్షించాలని ఆస్ట్రేలియా కూడా డిమాండ్ చేసింది.

కరోనా వైరస్ ప్రభావం ఆర్థిక రంగం, సమాజంపై తీవ్రంగా ఉన్న నేపథ్యంలో భారత్, అమెరికా కలిసి ముందుకు సాగాలని, పరస్పరం సహకరించుకోవాలని ప్రధాని మోదీ నొక్కి చెప్పారు. వర్చువల్ సమ్మిట్‌ను భారత్-ఆస్ట్రేలియా భాగస్వామ్యంలో నూతన మోడల్‌గా, వాణిజ్య నిర్వహణలో నూతన మోడల్‌గా మోదీ అభివర్ణించారు. ఓ విదేశీ నేతతో ద్వైపాకిక్ష చర్చలను వర్చువల్‌గా నిర్వహించడం ఇదే తొలిసారి కాగా.. మారిసన్‌తో చర్చలు అద్భుతంగా జరిగాయని మోదీ తెలిపారు.

సంక్షోభాన్ని అవకాశంగా మలుచుకోవాలన్న ప్రధాని మోదీ.. భారత్‌లో అన్ని రంగాల్లోనూ సమగ్ర సంస్కరణలకు శ్రీకారం చుట్టామని తెలిపారు. త్వరలోనే దీని ఫలితం క్షేత్ర స్థాయిలో కనిపిస్తుందన్నారు. కరోనా క్లిష్ట పరిస్థితుల్లో ఆస్ట్రేలియాలో ఉంటున్న భారతీయులు ముఖ్యంగా విద్యార్థుల పట్ల శ్రద్ధ తీసుకుంటున్నందుకు మారిసన్‌ను మోదీ అభినందించారు. హెల్త్ కేర్, వాణిజ్యం, రక్షణ రంగాల్లో ద్వైపాక్షిక సంబంధాలపై ఈ భేటీలో ప్రధానంగా దృష్టి సారించామన్నారు.

ప్రధాని మోదీ నిర్మాణాత్మకంగా, చాలా సానుకూలంగా వ్యవహరిస్తున్నారంటూ ప్రధాని మోదీకి మారిసన్ కితాబిచ్చారు. ఆస్ట్రేలియా, భారత్ మధ్య సంబంధాలను మరింత బలోపేతం చేసుకోవడానికి ఇదే సరైన తరుణం, సరైన అవకాశమని మోదీ విశ్వాసం వ్యక్తం చేశారు.

2009లో భారత్, ఆస్ట్రేలియా మధ్య సంబంధాలు వ్యూహాత్మక భాగస్వామ్యం స్థాయికి చేరాయి. అప్పటి నుంచి ఇరు దేశాలు కీలక రంగాల్లో సహకరించుకుంటున్నాయి. 2017లో విదేశాంగ విధానంపై శ్వేతపత్రం విడుదల చేసిన ఆస్ట్రేలియా.. హిందూ మహాసముద్ర దేశాల్లో భారత్‌ను గొప్ప శక్తిగా, ఆస్ట్రేలియాకు అధిక ప్రాధాన్య భాగస్వామిగా అభివర్ణించింది. 2018-19లో ఇరు దేశాల మధ్య వాణిజ్యం 21 బిలియన్ డాలర్లుగా ఉంది.. భారత్‌లో ఆస్ట్రేలియా 10.74 బిలియన్ డాలర్లు పెట్టుబడులు పెట్టగా.. ఆస్ట్రేలియాలో మనదేశం 10.45 బిలియన్ డాలర్లను పెట్టుబడి పెట్టింది. ‘AUSINDEX’ పేరిట 2015లో ఇరు దేశాలు తొలిసారిగా నౌకాదళ విన్యాసాలు చేపట్టాయి. గతేడాది ఏప్రిల్‌లో ‘AUSINDEX-2019’ పేరిట మూడోసారి బంగాళాఖాతంలో విన్యాసాలు చేపట్టారు.



Source link

Leave a Reply

Your email address will not be published. Required fields are marked *